Faʼahi 10
Koteā Anai Te ʼu Tapuakina ʼAē Kā Maʼu e Nātou ʼAē ʼe Fakalogo Ki Te ʼAtua?
Ko te hahaʼi mamate ʼe toe fakatuʼuake anai ke natou māʼuʼuli ʼi te kele. Gāue 24:15
Kotou fakakaukauʼi age muʼa te ʼu tapuakina ʼaē kā kotou maʼu anai ʼi te temi kā haʼu mo kapau ʼe kotou fakalogo kiā Sehova ʼi te temi nei! ʼE kotou maʼuli haohaoa anai—ʼe mole toe mahaki anai he tahi pea mo māʼimoa. ʼE mole toe ʼi ai anai he hahaʼi agakovi pea ʼe kua feala anai ke kotou falala ki te hahaʼi fuli pē.
ʼE mole toe ʼi ai anai te maʼuli mamahi, mo te maʼuli tuʼania peʼe ko te tagi. ʼE mole toe ʼi ai anai he tahi ʼe matuʼa pea mo mate.
ʼE kotou māʼuʼuli tahi anai mo tokotou ʼu kaumeʼa pea mo tokotou fāmili. ʼE fakafiafia ʼaupitō anai te maʼuli ʼaē ʼi te Palatiso.
ʼE mole toe ʼi ai anai te mataku. Ko te hahaʼi ʼe natou maʼuli fiafia anai.