Kotea Ia Te Finegalo ʼo Te ʼAtua?

ʼE loto e te ʼAtua ke tou maʼuʼuli ʼo heʼe gata ʼi te tokalelei pea mo te fiafia ʼi te palatiso ʼi te kele.

ʼE lagi ke ui anai pe ʼe feala koa ke hoko ia te faʼahi ʼaia. Kaʼe ʼe ui ʼi te Tohi-Tapu ʼe fakahoko anai e te Puleʼaga ʼo te ʼAtua ia te faʼahi ʼaia, pea ʼe ko te finegalo ʼo te ʼAtua ke akoʼi ia te hahaʼi ke natou iloʼi ia te Puleʼaga ʼaia pea mo tana fakatuʼutuʼu ʼo ʼuhiga mo tatou.​—Pesalemo 37:​11, 29; Esaia 9:⁠6.

ʼE loto e te ʼAtua ke fua lelei totatou maʼuli.

Ohage ko he tamai agalelei ʼe ina fia foaki te meʼa ʼae ʼe lelei ki ʼana fanau, ʼe toe fakaʼamu ia tatatou Tamai ʼae ʼe ʼi selo ke tou maʼu ia te fiafia heʼe gata. (Esaia 48:​17, 18) ʼE ina fakapapauʼi fenei mai: “Ko ia ʼae ʼe ina fai te finegalo ʼo te ʼAtua ʼe nofo anai ia ʼo talu ai.”​—1 Soane 2:⁠17.

ʼE loto e te ʼAtua ke tou haʼele ʼi ʼona ala liliki.

ʼE ui ʼi te Tohi-Tapu ʼe loto e totatou Tupuʼaga “ke ina ako mai kia tatou ona ala” ke feala hatatou “haele i ona ala liliki.” (Esaia 2:​2, 3) Neʼe ina fakatuʼutuʼu ke ʼi ai “he hahaʼi ke natou fua tona huafa” ke iloʼi e te malamanei katoa ia tona finegalo.​—Gaue 15:⁠14.

ʼE loto e te ʼAtua ke tou tauhi age kia te ia ʼi te logo tahi.

Ko te tauhi maʼa ʼae kia Sehova ʼe ina fakatahiʼi ia te hahaʼi ʼi te ʼofa moʼoni. (Soane 13:35) Ko ai ia ʼaho nei ʼe natou akoʼi ia te hahaʼi ʼi te ʼu potu kehekehe ʼo te kele ke natou tauhi ki te ʼAtua ʼi te logo tahi? ʼE matou fakaafe koe ke ke kumi tona tali ʼi te kaupepa lahi ʼaeni.