Ko Te Kau Kapaonite—Neʼe Nātou Kumi Te Tokalelei
KO TE taulaga ʼaenī ʼe tou sisio ki ai ʼi ʼoluga, ʼi te fuga moʼuga, ʼe tuʼu ʼi te koga meʼa ʼaē neʼe tuʼu ai ia te Kapaone ʼāfea, ia kilometa e hogofulu ki te potu Tokelau ʼo Selusalemi.
Lagi ʼe koutou mahino foki ko te kau Kapaonite ʼaē neʼe ʼomai kia Sosue ia ia ʼaē neʼe ina fakahu te kau Iselaele ki te Kele fakapapau pea mo mālo ʼi Seliko. Ko te kau Kananeane ʼo Kapaone neʼe nātou ʼiloʼi ʼe mole feala hanatou feala fakafeagai ki te kau Iselaele, ʼaē ʼe ʼiloga lelei tanatou nonofo mo te tokoni fakaʼatua. Koteā te meʼa neʼe nātou fai ? Neʼe nātou fai te meʼa fakakākā, ʼo fekauʼi e te kau Kapaonite te ʼu fakafofoga ʼonatou ke nātou ʼolo ohage ko he ʼu hahaʼi neʼe folau mai he fenua mamaʼo. Ko te ʼu faiga ʼaia ki he tokalelei neʼe fua lelei, ʼo fai e Iselaele te fuakava mo nātou. ʼI te temi ʼaē neʼe maʼu ai tonatou kākā, ko te kau Kapaonite neʼe liliu ko te ʼu tagata ōhu vai pea mo taʼakau.
Neʼe mole ʼaoga ki te ʼAtua ke ina tauʼi te hahaʼi ʼaia ʼe nātou kumi te tokalelei. Neʼe ina lagolago Sosue ʼi tana hāofaki te kau Kapaonite ʼi te temi ʼaē neʼe nātou tauʼi ai te ʼu hau e nima. Neʼe fai e Sehova te milakulo ʼi tana fakaloaloaga te ʼaho lolotoga te tau. — Sosue 9:3-27; 10:1-14.
Ko te kau alekeoloke neʼe nātou maʼu ʼi te fuga tumutumu ʼaia te pu loloto, pe ʼe ko te liua, neʼe keli ki te maka. Ko te kau Kapaonite neʼe nātou hihifo ʼi te fahaʼi ʼaia pea mo maʼu ai te vai ʼi te ava ʼi te lalo kele. Lagi ko te meʼa foki ʼaia ko te “liua ʼo Kapaone” ʼaē ʼe tuʼu ia 2 Samuele 2:13? Ko te kau Alekeoloke neʼe nātou toe maʼu foki mo te ʼu pu neʼe keli ki te maka pea mo te ʼu toega meʼa gāue moʼo fai vino. ʼIo, ʼe ʼiloga mai ko te kau Kapaonite neʼe ko te lotolotoiga ʼo te fai te vino.
ʼI te temi ʼo Tavite, ko te tapenakulo ʼo te ʼAtua moʼoni neʼe tuʼu ʼi te kolo ʼaia. Ko te hau ko Salomone neʼe hau ki te kolo ʼo fai te ʼu failaulau. Neʼe hā ia Sehova kia Salomone ʼi te moemisi pea mo ina fakapapau kia ia “he loto fakatokatoka pea mo poto” pea mo maʼu koloā (1 Hau 3:4-14; 2 Fakamatala 1:3). Ko te alatike ʼo te ʼu pasina 12 ki te 17 ʼo ʼuhiga mo te fahaʼi ʼaia ʼe ina fakahā ko te hōloga ʼo te hahaʼi ʼo Kapaone neʼe nātou maʼu tāfito te ʼu pilivilesio ʼi te fenua ʼo te ʼAtua ki ʼa muli mai. ʼE koutou ʼiloʼi pe neʼe feafeaʼi?
[Haʼuʼaga ʼo te paki pasina 32]
Pictorial Archive (Near Eastern History) Est.