“Te Lilio ʼo Te Fenua”

KO TE mole ʼi ai he gāue. Ko te hake ʼo te ʼu totogi ʼo te ʼu meʼa. Ko te masiva. Ko te lakilisi faka ekonomike. Ko te ʼu kupu ʼaia ʼe kua lahi tana hā ʼi te ʼu tala logo. Pea ʼe ko he ʼu fakaʼiloga ia ʼo te ʼu faigataʼaʼia ʼe tau mo te toko miliona hahaʼi ʼi tanatou faigaʼi ʼaē ke nātou fafaga tanatou ʼu famili pea mo teuʼi pea mo kumi he meʼa nofo.

Ko te hahaʼi tui, feiā mo te hahaʼi ʼe mole tui ʼe nātou tau mo te fihifihia ʼaia. Kae ko te hahaʼi tui ʼe mole tuku ʼāteaina pe ia nātou mo tanatou ʼu fihifihia. Ko Sesu, ʼi tana palalau ki te hahaʼi agavaivai ʼo te ʼuluaki sēkulō, neʼe fēnei tana lea: “Koutou vakavakaʼi lelei te ʼu manu lele ʼo te lagi, heʼe mole nātou to magisi, pea ʼe mole nātou utu magisi, pea ʼe mole nātou tānaki ki he ʼu faleoko; kae fafaga nātou e takotou Tāmai ʼe ʼi selo. ʼE mole koa la maʼuhiga age koutou ia nātou?” — Mateo 6:26.

Neʼe toe ʼui age fēnei e Sesu: “Koutou ako te lilio ʼo te fenua, pe ʼe feafeaʼi tanatou tupu ake; ʼe mole nātou gāue pea ʼe mole nātou fai filo; kae ʼau tala atu kia koutou, māʼiape la mo Salomone, ʼi tona kolōlia katoa, neʼe mole feiā hona teu ke hage ko te teuteuʼi ʼo he lilio e tahi. Koia, kapau ʼe teuteuʼi feiāʼi e te ʼAtua ia te vao ʼo te fenua, (...) ʼe mole koa la lahi ake anai hana teuteuʼi koutou?” — Mateo 6:28-30.

ʼE faka ʼuhiga koa te talanoa ʼaia ʼe mole ʼaoga ki he kilisitiano ke gāue ki te maʼuli? Kailoa! Ko te kilisitiano ʼe gāue kinakina moʼo totogi tona ʼu maʼua. ʼE fēnei te ʼui ʼa te ʼapositolo ko Paulo: “Ka mole fia gāue he tahi, ke mole kai!” (2 Tesalonika 3:10). Kae, ko te kilisitiano ʼe mahino ia ki te tokaga ʼa te ʼAtua pea ʼe tui ia ko tana Tāmai ʼe ʼi selo ʼe sio ifo kia ia. Koia, ʼe mole tokaga fakavale ki te ʼu tuʼania ʼo te maʼuli. Māʼiape la mo te ʼu temi faigataʼa, ʼe ina faka takimuʼa aipe te ʼu meʼa fakalaumālie. ʼE tui ia ki te ʼu palalau ʼaenī ʼa Sesu: “Ke koutou haga kumi muʼa te puleʼaga pea mo Tona faitotonu, pea ʼe toe foaki atu anai mo te ʼu meʼa fuli ʼaia kia koutou.” — Mateo 6:33.