“ ʼI Muʼa ʼo Te Tupu ʼo Te ʼu Moʼuga”
“KO KOE ko te tauʼaga moʼoni kia mātou taʼiake fuli. ʼI muʼa ʼo te tupu ʼo te ʼu moʼuga, peʼe ʼi muʼa ʼo tau fakatupu ʼi te mamahi te kele pea mo te kele maʼuli, ʼio, mai te ʼu temi heʼegata ʼo aʼu ki te ʼu temi heʼegata ʼe ke ʼAtua pe.” (Pesalemo 90:1, 2, New International Version). Ko te ʼu palalau ʼaenī neʼe fai ki totatou Tupuʼaga, pea ʼe ko he ʼu palalau fakaloto mālohi — tāfito ʼi te temi nei, ʼaē ʼe hage ʼe mole ʼi ai he meʼa ʼe maʼu!
ʼI he ʼaluʼaga tokakovi faka ekonomike, ko ʼihi ʼe nātou falala ki te ka haʼu. Ko he tuputupu fakamataku ʼo te ʼu fakapō feiā mo te fakaʼaogaʼi fakavale ʼo te toloke neʼe ina fakaliliu ʼihi kolo ko he ʼu koga meʼa tau. Māʼia mo te fakatuʼutuʼu ʼāfea, ʼaē ko te famili, ʼe fakaʼau nei ki te pulinoa. ʼE tou logo ki te ʼu meʼa foʼou ohage ko te ʼu famili ʼe nofo pe te tagata mo te tagata, te fafine mo te fafine. Ko te ʼu famili ʼaē ko te tokotahi pe ʼe ina taupau te famili ʼe nātou lolotoga tuputupu, pea ko ia ʼaē ʼe ina taupau te famili ʼe tautau felāveʼi mo te ʼu mamahi lahi. Ko te tokalelei ʼo te ʼu famili tokolahi neʼe maumauʼi ʼuhi ko te ʼu faʼahiga meʼa fakalialia, ohage la ko he tahi ʼe ina ta tona ʼohoana pea mo te fakaʼalikiʼi ʼo te tamaliki.
Ko ai anai ka ina taki tatou ʼi te ʼu temi faigataʼa ʼaenī? ʼIo, ʼe mole hāla mo he tokoni mai te kau ‘psychologues’, mo te kau faiako, pea mo ʼihi, kae lahi ʼi te ʼu tokoni ʼaia ʼe fefakafeagaiʼaki. ʼI te potu Hihifo, lolotoga he temi loaloaga, ko te tōketā ko Benjamin Spock neʼe ko te faitokoni lahi ʼaia ki te akonakiʼi ʼo te tamaliki. Kae, neʼe ina fakamoʼoni ko tana tokoni neʼe hāla!
ʼE ko he manatu poto hatatou maʼu te ʼAtua ko totatou “nofoʼaga”! ʼI te ʼu temi maveuveu ʼaenī, ko ia ko te maka ʼo te nofo maʼu, ʼe maʼuli “mai te temi heʼegata ki te temi heʼegata”. ʼAki te polofeta ko Malakia, neʼe ina ʼui ʼo ʼuhiga mo ia: “Ko ʼau ia Sehova; ʼe mole heʼeki ʼau fetogi.” (Malakia 3:6). ʼE feala hatatou falala katoa ki te ʼu lekula ʼa te ʼAtua, ʼaē ʼe tuʼu ʼi te Tohi-Tapu. Neʼe tuʼu “ ʼi muʼa ʼo te tupu ʼo te ʼu moʼuga”, pea ko tana tokoni, ʼaē maʼu gafua ʼi te Tohi-Tapu, ʼe fakatafito ki tona poto heʼegata. Ko te meʼa tonu ʼaia ʼe ʼaoga kia tatou ki te fiafia mo te fua manuʼia.
Koia, ko he manatu fakapotopoto ia te falala ki te Folafola ʼa te ʼAtua, te Tohi-Tapu. Koutou ako te Tohi-Tapu ke koutou maʼu ai te poto ʼo te ʼAtua. Koutou tui ki te meʼa ʼaē ʼe koutou ako, pea ke liliu ko he mālama moʼo taki ʼo koutou ʼi te ala ʼo te maʼuli (Pesalemo 119:105). ʼE gata pe kia nātou ʼaē ʼe nātou fai te meʼa ʼaia ʼe moʼoni tanatou falala ʼaē ki te ka haʼu pea mo maʼu te fīmālie moʼoni ʼo te ʼatamai.