Neʼe Ina Maʼu “Te Kolona ʼo Te Maʼuli”
KI TE ʼaselo ʼo te kokelekasio ʼi ‘Smyrne’, neʼe tonu ke tohi e te ʼapositolo ko Soane, ʼo fēnei: “Fakahā tau agatonu, ʼo kaku ki te mate, pea ʼe ʼau foaki atu anai te kolona ʼo te maʼuli.” (Fakahā 2:8, 10). Koia ʼaē, ko te logo ʼaē ʼe mātou fakahā atu ʼe fakaloto mamahi pea mo fakafiafia: ko te pelesita ko Frederick William Franz ʼo te Watch Tower Bible and Tract Society of Pennsylvania pea mo te Watchtower Bible and Tract Society of New York, Inc., feiā aipe mo ʼihi kolesi faka teokalatike, neʼe ina fakaʼosi tana lele ʼi te kele ʼi te uhu ʼo te ʼaho 22 ʼo tesepeli 1992.
ʼE ko he logo fakaloto mamahi he neʼe talanoa ki te fakaʼosi ʼo te ʼu gāue fakakelekele ʼo te kaugana ʼa Sehova, neʼe lahi tona ʼofaina pea neʼe makehe ʼi tana agatonu. Kae, neʼe ko he logo fakafiafia koteʼuhi ʼi te temi nei ko te ʼu palalau ʼi te tohi ʼo te Fakahā 14:13 ʼe faka ʼuhiga ki totatou tēhina ko Franz, ʼaē ʼe ʼui fēnei: “Manuʼia te kau mate ʼaē ʼe mamate ʼo tahi mo te ʼAliki ʼo kamata atu ʼi te temi nei. ʼIo, ʼe ʼui e te laumālie, ke nātou mālōlō ʼi ʼanatou gāue, heʼe ko te ʼu meʼa ʼaē neʼe nātou fai ʼe ʼolo mo nātou.” Ko te tēhina ko Franz neʼe fia mālalo pea neʼe agavaivai, ko he tagata gāue kinakina pea neʼe fakaʼaoga ʼaupito e Sehova ʼi te “kaugana agatonu mo poto” moʼo tokoni ki te tufa ʼo te meʼa kai fakalaumālie ki te “hahaʼi gāue” pea mo ʼonatou kaumeʼa. — Mateo 24:45-47.
Neʼe tupu te tēhina ko Franz ʼi te ʼaho 12 ʼo sepetepeli 1893, ʼi Covington, ʼi Kentucky. Neʼe logo ki te moʼoni ʼi tona taʼokete. ʼI te lakaga ʼaia neʼe ako ʼi te univelesitē ʼo Cincinnati, ke liliu ʼi he temi ko he minisi faka pelepitelo. ʼO mole hoko leva te faʼahi ʼaia, neʼe mavae ia mai te ’Ēkelesia faka pelepitelo ʼo kaugā gāue mo te kau Ako ʼo te Tohi-Tapu, ʼaē neʼe higoa ki muli age ko te kau Fakamoʼoni ʼa Sehova. Neʼe papitema ʼi te ʼaho 30 ʼo novepeli 1913, pea hili ki ai te taʼu katoa, neʼe mavae ʼi te univelesitē pea neʼe kau ʼi te gāue ʼave-logo (pionie). ʼI te ʼaho 1 ʼo sūnio 1920, neʼe kau ʼi te famili ʼo te Petele ʼi Brooklyn. Neʼe mole tuai pea fakanofo ia ko te pule ʼi te Pilo ʼo te kau ʼave-logo pea ʼi te taʼu 1926, neʼe fakanofo ia ki te gāue faitohi, ʼaē ʼe ko he koga meʼa neʼe gāue ʼaupito ai. ʼI te taʼu 1945 neʼe fakanofo ko te “vice-président” ʼo te Sosiete Watch Tower pea mo ʼihi fakatuʼutuʼu ʼe pipiki ki te kautahi ʼaia. ʼI te mate ʼo te pelesita ko Nathan Knorr ʼi te taʼu 1977, neʼe fakanofo ia ia ko te pelesita ʼo te Sosiete Watch Tower, ʼaē neʼe ko he faʼahi neʼe gāue ʼi ai ʼo aʼu ki tona mate. ʼI tona temi maʼuli, neʼe sio te tēhina ko Franz ki te tuputupu ʼo te kau Fakamoʼoni ʼaē mai te lauʼi afe ki te fā miliona tupu. Neʼe ina maʼu te ʼu tuʼuga pilivilesio, ohage la ko te fai akonaki ʼi te ʼu fakatahi faka fenua feiā aipe ki te ʼaʼahi ʼo te ʼu filiale pea mo te ʼu fale ʼo te kau misionea ʼi te ʼu koga meʼa ʼo te malamanei. Ko te hisitolia ʼo tona maʼuli neʼe fakamatala ʼi Te Tule Leʼo ʼo te ʼaho 1 ʼo maio 1987.
ʼI te afiafi ʼo te ʼaho 28 ʼo tesepeli 1992, ko te fakamanatu neʼe fai ʼi te Fale ʼo te Puleʼaga ʼi te Petele ʼi Brooklyn. Ko te toe akonaki maʼuhiga fakalaumālie pea mo fakaloto māfana neʼe fai e te tēhina ko Albert Schroeder e kau ʼi te Kolesi pule. Neʼe fagono ki te akonaki ʼaia te ʼu famili ʼo te Petele ʼo te fale gāue ʼo te Watchtower, ʼo Patterson, pea mo te fale gāue ʼo te Moʼuga pea mo te fale gāue ʼo te Fale ʼo te Puleʼaga feiā aipe mo te famili ʼo te Petele ʼo te filiale ʼo Kanata ʼaki te telefoni.
Ko nātou fuli, tāfito ia nātou ʼaē neʼe nātou gāue lahi mo ia, neʼe lave ʼaupito kia nātou te mate ʼo te tēhina ko Franz. Neʼe loto mahino pea mo fakaloto mālohi, pea mo faʼa kātaki kia nātou ʼaē neʼe gāue mo ia pea mo kaugā fagona mo ia. ʼIo, ko tona ʼu kaumeʼa ʼi te tui neʼe nātou maʼu te aga ʼaē ʼi te tohi ʼo Hepeleo 13:7, ʼo ʼuhiga mo ia: “Koutou manatuʼi ia nātou ʼi ʼokotou fuga ʼulu, ʼaē neʼe nātou tala atu te folafola ʼo te ʼAtua, pea, ʼo tokagaʼi te iku ʼo tanatou aga, koutou faʼifaʼitakiʼi tanatou tui.”
ʼI te ʼaho 30 ʼo tesepeli 1992, ko te tēhina ko Milton G. Henschel neʼe fakanofo ko te nima pelesita ʼo te Sosiete neʼe hoa atu ki te tēhina ko Franz.
[Paki ʼo te pasina 31]
Frederick Franz ʼi te taʼu 1913
ʼI te fale ta tohi ʼo te Sosiete, Myrtle Avenue, ʼi te 1920.
Ko ia mo Nathan Knorr ʼi te Yankee Stadium, ʼi te taʼu 1953.