ʼE Faka Maʼuhiga Fau Koa Te ʼu Foʼi Huki Toto?
Ko te ʼu foʼi huki toto ʼe ko he meʼa māhani ʼi te ʼu faitoʼo ʼo te temi nei, kae ʼe ko he ʼu faitoʼo lelei koa ohage ko tona felauʼaki? Koteā takotou manatu?
ʼI te nusipepa The American Journal of Medicine (fepualio 1993), neʼe fehuʼi fēnei e te tōketā ko Craig S. Kitchens: “ ʼE faka maʼuhiga fau koa te ʼu foʼi huki toto?” Neʼe ina fakatokagaʼi ʼe tau vakavakaʼi fakalelei e te kau tōketā peʼe koteā te lelei ʼo he faitoʼo ʼo laka age ia ʼi hanatou vakavakaʼi fakalelei te tuʼutāmaki ʼe feala ke hoko ai. E feafeaʼi te ʼu foʼi huki toto?
Neʼe toe fakatokagaʼi e Kitchens te fakamoʼoni mole heʼeki faʼa fualoa ʼo te ʼu tuʼuga tuʼutāmaki ʼe fakapipiki ki te ʼu foʼi huki toto, ohage la ko te hépatite, ʼe fakatupu tuʼutāmaki ki te gāue hāofaki ʼo te sino, ko te mole kei gāue ʼo he koga, pea mo te tekeʼi e te sino te ʼu koga kehe ʼaē neʼe fakapipiki kiai. Ko te ako neʼe ina tānaki te ʼu “faigataʼaʼia ʼe lauʼi afe” tupu mai te ʼu foʼi huki toto, “neʼe iku ki te manatu ʼaē, ki te foʼi huki fuli ʼe fakafuafua ko te 20 ki te teau tana lave kovi ki te sino, ko ʼihi kovi ʼe ko te ʼu kiʼi meʼa noa kae ko ʼihi ʼe fakatupu tuʼutāmaki ki te sino”, kaku ai ki te mate.
Kae, ko te ʼu lelei ʼaē ʼe ʼui, ʼe nātou faka lākatonuʼi koa te ʼu taʼi tuʼutāmaki ʼaia ʼe feala ke hoko?
Neʼe toe fakatokagaʼi e te tōketā ko Kitchens te ʼu sivi e 16 ʼo ʼuhiga mo te tafa e 1 404 neʼe hoko ki te kau Fakamoʼoni ʼa Sehova, ʼaē neʼe nātou fakafisi ki te ʼu foʼi huki toto ʼi tanatou fakalogo ki te folafola ʼa te Tohi-Tapu ʼaē ke ‘fakamamaʼo ʼi te toto’. — Gāue 15:28, 29.
Koteā tona fua? “Ko te tonu ʼaē ʼa te kau Fakamoʼoni ʼa Sehova ʼaē ko te fakafisi ki te ʼu foʼi huki toto ʼi te ʼu faitoʼo maʼuhiga ʼe hā ia ko te fua ʼo te ʼu mate ʼe ko te 0,5 % ki te 1,5 % ʼi te ʼu tuʼutāmaki fuli ʼo te tafa. Ko te meʼa ʼe mole mātala, peʼe ko mahaki pea mo mate e fia ʼe fakasiʼisiʼi ʼi te fakafisi ʼaē ki te foʼi huki toto, kae ʼe mahino papau ia ko te ʼu lelei ʼe laka age ia ʼi te fealagia ʼaē ki te ʼu tuʼutāmaki mokā kita fakafisi ki te foʼi huki toto.” (Ko mātou ʼaē ʼe mātou fakaʼiloga keheʼi te faʼahi ʼaia). Koteā te ʼuhiga ʼo te ʼui ʼaia? ʼE mahino ko te ʼu tuʼutāmaki ʼi te fakafisi ki te toto ʼe siʼisiʼi age ia ʼi te ʼu kovi ʼaē ʼi te tali ʼo te ʼu foʼi huki toto.
Koia, koʼeni te fehuʼi ʼa Kitchens ʼe tonu: “Kapau ko te mole ʼai ʼo he toto ki te kau Fakamoʼoni ʼa Sehova ʼe fakatupu ʼaki ai he mahaki kovi pea mo he mate ʼe siʼisiʼi pea mo ina tekeʼi he ʼu toe totogi maʼuhiga pea mo he ʼu faigataʼaʼia hoholo, ʼe mole tonu koa la ke fakasiʼisiʼi te ʼai ʼo te toto ki te kau mahaki?”
Ko nātou ʼaē ʼe nātou fakafisi ki te ʼu foʼi huki toto ʼuhi ko te fakamoʼoni ʼaia ʼe nātou toe fai foki ʼo mulimuli ki te ʼu fakatotonu mai totatou Tupuʼaga.