“Neʼe Hāofaki ʼAu e Te Kau Fakamoʼoni ʼa Sehova!”
LOLOTOGA te ʼu ʼaho fakamuli ʼaenī, tokolahi ʼe nātou fakamoʼoni ko nātou ʼe nātou aga ‘fekai, pea mo heʼe manako ki te meʼa ʼaē ʼe lelei.’ (2 Timoteo 3:1, 3) Neʼe fakamoʼoni te faʼahi ʼaia e Isaac, ko he tēhina ʼe gāue ʼi te filiale ʼo te Sosiete Watch Tower ʼi te Potu Hihifo ʼo Afelika. ʼE ina fakamatala fēnei:
“ ʼI Sanualio ʼo te taʼu 1992, neʼe ʼau fagona ʼi te potu ala lāvaki ʼi te takisi fakatahi mo te toko nima. Neʼe ʼau kamata fai palalau mo te fafine neʼe heka ʼi ʼoku tafa, pea neʼe ina tali fakalelei te nusipepa ʼe fakatafito tana ʼu fakamatala ki te Tohi-Tapu.
“Fokifā pe, ʼi te lagi hola fā ʼo te hili hoʼatā, neʼe tuʼusi tamatou ala e te motokā foʼou ʼe mole ʼi ai hona numelo, pea neʼe kikī te ʼu teka ʼo tamatou motokā ʼi tana tāʼofi. Ko te toko tolu tagata fuafua lelei, takitahi te fana, neʼe nātou hihifo mai te motokā, pea mo nātou avahi te ʼu matapā ʼo tamatou motokā. Neʼe kalaga fēnei te tahi, ‘Koutou fehūfi mai ki tuʼa, ia koutou fuli.’
“Ko te tahi tagata neʼe fā ki taku kato tohi. Pea ʼi tana sio ʼaē neʼe gata pe ki te ʼu tohi faka Tohi-Tapu neʼe tuku ʼi loto, neʼe ina haga ʼo ʼatufi taku kato. ‘Koteā he tahi age meʼa ʼe ke maʼu?’ ko tana fehuʼi mai ʼaia pea mo ina fakahaga mai tana fana kia ʼau. Neʼe ʼau foimo fakatoʼo age te falā ʼaē neʼe ʼi taku kato. ‘Ko te gataʼaga ʼaia ʼo te meʼa ʼe ke maʼu?’ ko tana fehuʼi mai ʼaia. Neʼe ʼau ʼui age ki ai ko ʼau ko te Fakamoʼoni ʼa Sehova, pea ʼe mole loi te kau Fakamoʼoni ʼa Sehova. Neʼe ina faʼao taku kato, pea neʼe sio ia ki taku kate fakamoʼoni ʼo te Watch Tower pea ina ʼui: ‘Fai ʼaki, Watchtower. Talitali ʼi henī.’
“ ʼOsi ʼaia, pea neʼe haga ki te fafine ʼaē neʼe fai palalau mo ʼau ʼi te takisi. Neʼe foimo fakatoʼo age e te fafine te seini ʼaē neʼe ʼi tona kia pea mo ina fakatoʼo age te falā ʼaē neʼe ʼi tona kato. ʼI te fakatokagaʼi e te tagata kaihaʼa te nusipepa ʼaē ʼi tona nima ʼaē ʼe tekelili, neʼe manatu ai ia ʼe ma fakatahi, pea koia neʼe ina fakatotonu age ai ki te fafine ke nofo mo ʼau.
“Lolotoga te temi ʼaia, ko te ʼu tagata māmio kovi ʼaē neʼe nā haga ʼo haha fakaʼita tomā ʼu kaugā fagona. Neʼe nātou haga ʼo tā pea mo kaihaʼa te tagata uli takisi pea mo te tahi age tagata neʼe fagona tahi mo māua. Ko te tahi tagata kaihaʼa neʼe ina taʼaki te seini ʼo te lua fafine. ʼI te fakafifihi ʼo te fafine, neʼe haga ai te kau tagata kaihaʼa ʼo tuki tona ʼulu pea mo tona fatu ʼaki te ʼu muliʼi fana, ʼo aʼu ki tona mate. Neʼe nātou toho ki tuʼa te tolu fafine, pea neʼe nātou aka tona fatu. Ko he malaʼia foki, he neʼe mate mo ia. Neʼe ko ʼau pe mo te fafine ʼaē neʼe nofo mo ʼau, neʼe ma haohaoa.
“Ki muli age ʼi te fakaheka ʼo māua e te tagata taki motokā neʼe fakalaka ʼi ai, neʼe ʼui faka liuliuga e te fafine ʼaē kua mataku ʼaupito, ‘Neʼe hāofaki ʼau e te kau Fakamoʼoni ʼa Sehova!’ ”