Ko Te Maʼuli ʼo Te Kau Faka Mafola ʼo Te Puleʼaga
Ko Te ʼAtua ʼe Mole Fakapalatahi
KUA hili nei kiai taʼu e 1 900, neʼe fagonogono ia te ʼapositolo ko Petelo ki te tagata solia ko Kolonelio, ʼo ʼui maʼana: “Ko te ʼAtua ʼe mole fakapalatahi, ʼi te fenua fuli pe ko te tagata ʼaē ʼe manavasiʼi kia te ia pea mo maʼuli ʼi te faitotonu ʼe ina leleiʼia.” (Gāue 10:34, 35) Neʼe fakahā e Kolonelio te manavasiʼi ki te ʼAtua pea mo te ʼofa ʼaē ki te faitotonu. Neʼe ina tali te fagonogono ʼaē neʼe fai e Petelo pea neʼe liliu ia ko te Kilisitiano.
Ko te pelesepeto ʼaia ʼe toe moʼoni pe ia ʼaho nei—ko te ʼAtua ʼe mole fakapalatahi. ʼE mātou maʼu te faʼahi ʼaia ʼi te meʼa neʼe hoko ʼi Siamani. ʼE ʼui fēnei e te fakamatala:
“ ʼI te telituale ʼo tamatou kokelekasio, ʼe lahi te ʼu fale solia ʼa te kau Lusia. ʼI te taʼu 1989, ʼi te hili pe ʼaē ʼo te maumauʼi ʼo te Kaupā ʼo Berlin, neʼe fehuʼi e te ʼu tagata ʼāfea peʼe ʼi ai he kau fai faka mafola ʼe nātou palalau pea mo mahino ki te lea faka Lusia. Ko ʼihi ia mātou neʼe nātou palalau ki te lea ʼaia, pea neʼe mātou ʼolo ʼo faka mafola ʼi te telituale ʼaia, pea neʼe ko he faʼahi ia neʼe fakatupu fiafia. Ko te fakamatala ʼaē ka hoa mai ʼe kau ki te ʼu faʼahiga meʼa ʼaē neʼe hoko kia mātou.
“Ko te meʼa ʼaenī neʼe hoko ki te tagata fai faka mafola (kua papitema ʼi te temi nei). Neʼe fagono te pule lahi ki te meʼa ʼaē neʼe tonu ke mātou palalau kiai pea ʼosi leva ʼaia pea ina fakaafe mātou ke mātou palalau ki tana kau solia. Neʼe ina ʼui ʼe toe tonu pe foki mo nātou ke nātou fagono ki te ʼu meʼa ʼo ʼuhiga mo te ʼAtua pea mo te Tohi-Tapu, koia neʼe mātou fakatuʼutuʼu he ʼaho ke mātou toe liliu mai.
“Neʼe mātou kole age ki te tuagaʼane ʼe palalau fakalelei ʼi te lea faka Lusia ke mātou kaugā ʼolo koteʼuhi ke ina fakahoko tamatou ʼu palalau. ʼI te fale fono ʼo te fale solia, neʼe mātou fakatokatokaʼi te ʼu tohi ʼi te fuga laupapa pea neʼe lava ke mātou palalau ki te kau solia e toko 68 pea mo tali ki tanatou ʼu fehuʼi. ʼOsi ʼaia te felogoi neʼe nātou toʼo te ʼu tohi e 35 pea mo te ʼu nusipepa neʼe teitei pe ke 100. ʼI tamatou mavae mai te fale fono, neʼe mātou sisio ki te ʼu kiʼi kūtuga ʼe nātou fai palalau ʼo ʼuhiga mo te ʼu tohi ʼaia.
“Neʼe mātou fakatuʼutuʼu ke mātou toe liliu ʼi te ʼaho 4 ʼo Sūlio 1992. ʼI tamatou tau atu ʼi te hola 11 toe 10, ko te tagata leʼo ʼo te matapā ʼo te ʼu nofoʼaga solia neʼe ina ʼui mai kia mātou ko te kau solia ʼe nātou fakatalitali kia mātou. Ko te tagata maʼu tuʼulaga ʼi te solia neʼe ina fakahū mātou ki te fale fono, pea neʼe mātou maʼu te logo ʼaē ko te fafine fakatau tohi, ʼaē neʼe ina toʼo ki muʼa atu, tana ʼu tohi ia mātou maʼa te fale tohi, neʼe ina fakahāhā tamatou ʼōmai ʼaki te ʼu pepa neʼe ina fakapipiki ʼi te ʼu nofoʼaga. Ko te ʼu tēhina e tolu neʼe nātou fai te ʼu kiʼi akonaki ʼo ʼuhiga mo tamatou gāue faka malamanei pea mo nātou fakahā pe koteā te tupuʼaga ʼaē ʼo tamatou falala ai ki te Tohi-Tapu. Pea neʼe fai mai tanatou ʼu fehuʼi, ʼo mātou foaki kia nātou te ʼu tali ʼaki te Tohi-Tapu. ʼI te ʼu fehuʼi ʼaia neʼe ʼi ai te ʼu fehuʼi ʼaenī, Koteā te manatu ʼa te kau Fakamoʼoni ʼa Sehova ʼo ʼuhiga mo te solia, pea ʼe ʼi ai koa he kau solia ʼi te kau Fakamoʼoni ʼa Sehova? Ko te meʼa ʼaia neʼe ina faka fealagia ki te kaugā fagona ʼaē neʼe ʼuluaki kaugā gāue pea mo ʼau, ke ina fakamatala te ʼu taʼu 25 ʼaē neʼe solia ai ʼi te solia ʼo te Potu Hihifo ʼo Siamani, pea ʼi te ʼu taʼu fakaʼosi ʼaki te tuʼulaga ʼaē ko te kapiteni ʼi te solia vakalele. Neʼe ina fakamatala age pe neʼe feafeaʼi tana ʼiloʼi te ʼAtua pea mo te Tohi-Tapu pea ʼi te temi nei kua fia liliu ia ko te Fakamoʼoni ʼa Sehova. Neʼe ʼofolele te kau solia ʼi te ʼu meʼa ʼaē neʼe nātou logo kiai. Ia minuta pe e fitu ko te ʼu tohi fuli ʼaē neʼe ʼōmai mo mātou neʼe kua ʼi te ʼu nima ʼo te kau solia, pea tokolahi ia nātou neʼe nātou loto ki ni ʼu Tohi-Tapu. ʼI te fale fakatau tohi neʼe mātou maʼu te ʼu Tohi-Tapu e fitu ʼi te lea faka Lusia, pea neʼe fiafia te kau solia ʼi tanatou maʼu te ʼu Tohi-Tapu ʼaia. Neʼe ko he meʼa fakaloto fiafia ia te foaki ki te hahaʼi pakupaku ʼaia ʼi te faʼahi fakalaumālie te mālama ʼo te Tohi-Tapu, pea ʼe mātou fakaʼamu pe ʼe nātou maʼuliʼi anai te Tohi-Tapu.”
ʼE moʼoni, ko te ʼAtua ʼe mole fakapalatahi ia. ʼAki tana Folafola ʼe ina pāuiʼi te hahaʼi fuli ʼe holi moʼoni ki tana Folafola. ʼE ina fakaafe nātou ke nātou ako ia ia pea mo tona ʼAlo, ko Sesu Kilisito, pea ko te tokolahi, mai ni ʼu ʼaluʼaga kehekehe ʼi te faʼahi faka sosiale peʼe ko te faʼahi faka ekonomike, ʼe nātou lolotoga fai te faʼahi ʼaia.—Soane 17:3.