“ ʼE Fakaofoofo Toku Gaohi”

“NEʼE ʼau haʼu maifea?” ʼE ʼi ai pe te temi ʼe fai ai e te tokolahi ʼi te tamaliki liliki te fehuʼi ʼaia. Mokā lalahi age te tamaliki, ʼe ʼāsili age pe te loloto ʼo tanatou fehuʼi: “Neʼe haʼu maifea te maʼuli?” Ko te fehuʼi ʼaia neʼe talanoaʼi lolotoga he ʼu taʼu ʼe lauʼi afe, pea ʼi te temi nei ʼe lahi te kau popoto lalahi ʼe nātou ʼui ko te tali, ʼaē ʼe fakapotopoto age ki te faigataʼaʼia ʼo ʼuhiga mo te tupuʼaga ʼo te maʼuli ko te evolisio. ʼI hona ʼaluʼaga lahi, ko te fakamatala ʼa te hahaʼi ʼaē ʼe lagolago ki te evolisio ʼe ina ʼui ko te maʼuli neʼe haʼu fakafokifā.

Kua hili kiai taʼu e 3 000, neʼe tohi e te Hau ko Tavite: “ ʼI fakamanavahe pea mo fakaofoofo ʼo toku faʼu.” (Pesalemo 139:14) ʼE ʼāsili age pe te moʼoni ʼo te ʼu palalau ʼaia kia tatou ʼi te ʼāsili age pe ʼo tatatou ako ʼo ʼuhiga mo te maʼuli. ʼI tona fakahagatonu, neʼe tohi fēnei e te physicien ko Fred Hoyle: “ ʼI te ʼāsili age pe ʼo te ʼu meʼa ʼaē ʼe maʼu e te kau biochimistes ʼo ʼuhiga mo te faigataʼa fakaofoofo ʼo te maʼuli, ʼe mahino papau ia ʼi te veliveli fau ʼo te ʼu fealagia ʼaē ke haʼu fakafokifā pe ʼo te maʼuli ʼe feala ia ke toʼo kehe. Neʼe mole feala ke haʼu fakafokifā pe te maʼuli.”

Koia ʼe haʼu maifea te maʼuli? Ko te ʼu ʼuluaki alatike e lua ʼo te nusipepa ʼaenī ʼe talanoa ki te fehuʼi ʼaia. Kapau ʼe koutou fia fai ki he tahi age ʼu logo, koutou faitohi ki te tuʼasila ʼaenī “Les Témoins de Jéhovah,” B.P. 787, Nouméa, Nouvelle-Calédonie, peʼe vakaʼi te lisi ʼaē ʼi te pasina 2.