He Koʼe Koa ʼe Tuputupu Te Kau Agakovi?
“HE KOʼE koa ʼe haga maʼuʼuli te kau agakovi?” Ko te fehuʼi ʼaia neʼe fai e te tagata agatonu ko Sopo, pea neʼe tuʼa lahi te liuliuga ʼo te fehuʼi ʼaia talu mai tona temi. Ko te fehuʼi ʼaia ʼe hake ʼi te fakakaukau ʼa te hahaʼi tokolahi ʼi te telituale ʼo te Iukoselavia ʼāfea (ohage ko te fafine ʼaē ʼe hā ʼi te takafi ʼo te nusipepa) ʼe nātou tagiʼi ia nātou ʼaē ʼe maʼuli mamahi ʼi te tau fakamataku. He koʼe koa ʼe maʼuʼuli te kau agakovi pea mo nātou tuputupu? Ohage ko tona fakatokagaʼi e Sopo, ko te meʼa ʼe tautau hoko, “ko tonatou ʼu ʼapi ʼe ko te tokalelei totonu, ʼo nātou haohaoa mai te tuʼania, pea ko te tokotoko ʼa te ʼAtua ʼe mole ia nātou.”—Sopo 21:7, 9.
ʼE faka ʼuhiga koa e te meʼa ʼaia ʼe mole he ʼaoga ʼo te tauhi ki te ʼAtua, pea mo ʼofa ki te kāiga, pea mo fakamamaʼo mai te fai ʼo te meʼa ʼaē ʼe kovi? Kailoa ia! ʼE tuku mai kia tatou e te Tohi-Tapu te manatu ʼaē ʼe tonu, ʼi tana ʼui ʼaē: “ ʼAua naʼa ke faiga ke ke mālo ʼi te kau agakovi peʼe ke faʼifaʼitakiʼi ia nātou ʼaē ʼe nātou fai te meʼa ʼaē ʼe kovi. Heʼe ohage ko he mohuku, ʼe nātou ʼamanaki fefe, pea ʼe nātou mae anai ohage ko he muko ʼaē kei mata. Falala ki te ʼALIKI pea mo fai te meʼa ʼaē ʼe lelei.”—Pesalemo 37:1-3, The New English Bible.
ʼIo, ko te tuputupu ʼa te kau agakovi, ʼaē ʼe hā ki tuʼa, ʼe faka temi pe ia. ʼI tona fakahagatonu, ko tonatou maʼuli ʼe nounou ʼaupito, kae ko nātou ʼaē ʼe nātou tauhi ki te ʼAtua ʼe nātou maʼu te ʼamanaki faka kolōlia ʼo ʼuhiga mo te temi ka haʼu. Ka ʼamanaki hoko pe nei te fakapapau ʼaenī ʼa te ʼAtua: “ ʼE holoholoʼi anai [e te ʼAtua] te ʼu loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he tagilāulau, he mamahi. Ko te ʼu meʼa ʼāfea kua puli ia.” (Fakahā 21:4) ʼE gata pe ki te kau faitotonu, kae mole ko te kau agakovi, ʼe sisio anai ki te temi ʼaia. ʼE ko he fakaloto mālohi ia te fakaōviōvi ki te ʼAtua pea mo ako te fai ʼo tona finegalo, ʼo mole tou tokagaʼi peʼe feafeaʼi te ʼaluʼaga ʼo te kau agakovi ʼaē ʼi ʼotatou ʼu tafaʼaki!
Kapau ʼe koutou loto ki he tahi age ʼu logo peʼe koutou loto ki he ʼaʼahi ʼo he tahi ke ina fai he ako faka Tohi-Tapu mo koutou ʼe mole totogi, koutou faitohi ki te tuʼasila ʼaenī: Association “Les Témoins de Jéhovah,” B.P. 787, Nouméa, Nouvelle-Calédonie, peʼe vakaʼi te ʼu tuʼasila ʼaē ʼi te pasina 2.