Ko He ʼu Manatu ʼe Fakahā ʼAki Lelei Mai ʼe Lagolago Ki Te Tui
ʼAKI te kua fakaʼau ʼo te sēkulō fakamuli ke fakaʼosi, ko te ʼu manatu ʼaē neʼe tala fakahagatonu ʼe lagolago ki te science, ki te filosofia, pea mo te mālama neʼe nātou fakatupu kovi ki te tui ʼaē ki te ʼAtua pea mo te ʼui ʼaē ko te Tohi-Tapu ʼe haʼu mai te ʼAtua.
Kae neʼe mole gata ʼaki pe te logoʼi ʼo te ʼu manatu ʼaia. Ki te manatu ʼa te tokolahi ʼi te hahaʼi ʼaē kumi meʼa, ʼe lahi age te ʼu meʼa ʼe feala ke fakamatala moʼo lagolago ʼaki te tui ki te ʼAtua ʼi te ʼu meʼa ʼaē ʼe feala ke fakamatala moʼo lagolago ki te mole tui ʼaē ki te ʼAtua. Ko tanatou ʼu ako neʼe nātou toe fakahā pe foki te ʼu tuʼuga fakamoʼoni ko te Tohi-Tapu ʼe ko te Folafola ia ʼa te ʼAtua.
Neʼe fakahā fakahagatonu e C. T. Russell te ʼu manatu ʼo ʼuhiga mo te faʼahi ʼaia. Ko te lauʼi miliona hahaʼi neʼe nātou lau tana tohi ʼaē neʼe tā ʼi te 1886 Le Divin Plan Des Ages (fakapilitānia). Neʼe tuʼu ai te kapite ʼe maʼuhiga ʼaupito, neʼe fēnei tona kupu tāfito “Kua Fakamoʼoni Te Maʼuli Moʼoni ʼo He Tupuʼaga ʼAtamai ʼe Māʼoluga ʼAupito.”
ʼI te ʼu taʼu ʼe lauʼi hogofulu ki muli mai, neʼe tohi e Russell te ʼu alatike, te ʼu kiʼi pepa lotu pea mo te ʼu tohi ʼe nātou foaki he ʼu tupuʼaga tāfito ki te tui ʼaē ki te ʼAtua pea mo te Tohi-Tapu. Ko te ʼu tohi ʼaia neʼe tā e te Sosiete Watch Tower Bible and Tract Society. Ko tona lua pelesita ia J. F. Rutherford, neʼe ina fai te tohi Création (ʼi te taʼu 1927) pea mo te tahi age ʼu tohi neʼe nātou lagolago mālohi ki te ʼu manatu ʼe fakahā fakahagatonu ʼo ʼuhiga mo te tui.
Ko te sosiete ʼaia neʼe hoki ʼosi atu pe tana teuteuʼi te tahi age ʼu logo ʼe tau tonu mo totatou temi ʼo ʼuhiga mo te ʼu faʼahi ʼaia. ʼE feala ki te kau Fakamoʼoni ʼa Sehova ke nātou foaki atu te ʼu tohi ʼaia ʼuhi ko takotou loto tokaga.
Kapau ʼe koutou fia ʼiloʼi tona tahi ʼu naunau peʼe koutou loto ke fai hakotou ako faka Tohi-Tapu, koutou faitohi ki te Association “Les Témoins de Jéhovah,” B.P. 787, Nouméa, Nouvelle-Calédonie, peʼe vakaʼi te lisi ʼaē ʼi te pasina 2.