“Ko Te Fakatau Māsima” ʼi Mosapike

KO FRANCISCO COANA, ko he tahi ʼe kau ʼi te komite fakafenua ʼo Mosapike, neʼe nofo ia taʼu e hogofulu ʼi te “lotoʼā fakamamahi.” ʼE ina fakamatala fēnei te meʼa ʼaē neʼe hoko kia ia totonu: “Neʼe ʼau ʼiloʼi ko mātou ʼe mātou ʼi henī anai lolotoga he temi fualoa, koia neʼe ʼau fehuʼi ai ki te taupau faka silikosikilipisio peʼe mole feala ke hoko atu taku gāue pionie katoa. Kae neʼe ina fehuʼi mai peʼe feafeaʼi anai haku maʼu he temi ki te gāue faka minisitelio, mai tona ʼaluʼaga ʼaē ʼe teitei pe ko nātou fuli ʼo te ʼu nofoʼaga ko te kau Fakamoʼoni ʼa Sehova? Neʼe ʼau ʼui ʼe ʼau ʼalu anai ki Milange, ko he kolo ʼe tuʼu ia kilometa e 47, moʼo maʼu ʼo te hahaʼi ke ʼau fai age kia nātou te fagonogono.

“Logope neʼe mole fakagafua mātou e te puleʼaga ke mātou mavae ʼi te nofoʼaga, neʼe mole fakakinauʼi te lao ʼaia. ʼE ʼau manatuʼi neʼe ʼau ʼalu ki te vao, mo tuʼutuli, pea mo faikole ke maʼu he puleʼaki ki te faka mafola ki te hahaʼi ʼo te kolo. Mole fualoa pea neʼe tali mai e Sehova.

“Neʼe ʼau ʼalu ki te tagata neʼe ʼi ai tana lelue, pea neʼe ʼau fai te fakatuʼutuʼu mo ia. Neʼe ina tali ke ina totogi ʼau ʼaki tana lelue mo kapau ʼe ʼau gāueʼi tona kele ʼaē ko tona lahi ko ares e 300 ʼi muʼa ʼo te temi ʼua. Koia ʼi te uhu fuli neʼe ʼau gāueʼi tona kele. Neʼe tapuakina e Sehova te fakatuʼutuʼu ʼaia, koteʼuhi neʼe ʼau maʼu leva taku lelue.

“Ko te meʼa neʼe hoko ai neʼe ʼau lava ʼalu ki te kolo lahi ʼo Milange pea mo hoko fakalelei ai taku gāue pionie ʼi te telituale ʼaia ʼaē ʼe lahi tona ʼu fua. Mai tona ʼaluʼaga ʼaē neʼe tapu tamatou gāue, neʼe tonu ai ke ʼau fai he fakatuʼutuʼu ke ʼau fakahā te moʼoni ki te hahaʼi. ʼAki te ʼu tohi pea mo te ʼu nusipepa ʼe fufū ʼi toku loto kofu, neʼe ʼau toʼo te māsima ʼi te kato pea neʼe ʼau fakatuʼu taku matani gāue, ko te fakatau ʼo te māsima. Mole ʼui ke ʼau fakatau ki te 5 meticais (ʼi te falā ʼo Mosapike), neʼe ʼau hiki ki te 15 meticais. (Kapau ʼe veliveli tona totogi, ʼe toʼo fuli anai e te hahaʼi, pea ʼe mole toe ʼi ai anai he māsima ke fakaʼaogaʼi ki te fai faka mafola!) Neʼe fēnei taku ʼu fai palalau:

“ ‘Mālo! ʼE ʼau fakatau māsima ʼi te temi nei.’

“ ‘ ʼE fia tona totogi?’

“ ‘E meticais hogofulu-ma-nima.’

“ ‘ ʼOiaue. ʼE totogi kovi fau!’

“ ‘ ʼE moʼoni, ʼe totogi kovi. Kae koutou fakakaukauʼi age ʼe totogi kovi ʼi te temi nei, kae talitali muʼa pea ʼi he temi ka haʼu ʼe kovi age anai tona totogi. ʼE ke ʼiloʼi ko te potu ʼaia neʼe fakakikite e te Tohi-Tapu?’

“ ‘ ʼE mole heʼeki ʼau lau he meʼa feiā ʼi taku Tohi-Tapu.’

“ ‘Kae, ʼe tuʼu ai. ʼAumai tau Tohi-Tapu, ke ʼau fakahā atu.’

“ ʼAki tona faʼahiga fai ʼaia, neʼe hoko ai te fai palalau ʼe fakaʼaogaʼi ai tana Tohi-Tapu, kae tuku pe taku Tohi-Tapu ʼi toku loto kofu. ʼE ʼau fakaʼaogaʼi te kapite 6 ʼo te Fakahā, ʼo ʼuhiga mo te ʼu ʼaluʼaga fakamataku pea mo te ʼu hoge. Kapau ʼe ʼau fakatokagaʼi ʼe tali lelei, ʼe ʼau fakatoʼo age te tohi La vérité qui conduit à la vie éternelle peʼe ko te tohi Une bonne nouvelle qui vous rendra heureux pea ʼe ʼau kamata fakalelei ai he ako faka Tohi-Tapu.

“Neʼe iku ai ki taku lava kamata te ako faka Tohi-Tapu mo te kūtuga ko te toko 15 ʼi Milange. Kae neʼe mole fualoa pea neʼe fakatokagaʼi e te puleʼaga tamatou gāue. ʼI te tahi ʼaho ʼi taku lolotoga fai te ako faka Tohi-Tapu, neʼe hū fakapuna’maʼuli te kau polisi ki te ʼapi ʼo te tagata ʼe ina ako te Tohi-Tapu pea neʼe nātou puke mātou. Ko mātou fuli, ʼo kau ai mo te ʼu tamaliki liliki ʼo te ʼapi, neʼe ʼave ki te fale pilisoni ʼo te kolo. Hili te māhina katoa, neʼe toe fakaliliu fuli ia mātou ki te nofoʼaga.”

Ko te ʼu meʼa ʼaia neʼe hoko neʼe mole fakasiʼisiʼi ai te gāue mālohi ʼo totatou ʼu tēhina. Kae, ko Francisco mo tona famili, ʼo feiā mo ʼonatou ʼu tēhina ʼe lauʼi afe neʼe nonofo ʼi te ʼu nofoʼaga, ʼi te temi nei ʼe nātou atolasio pea mo faka mafola faʼifaʼitaliha ʼi Mosapike.