Te ʼu Foʼi Piesi ʼe Tuʼu Ai Te Huafa ʼo Te ʼAtua
KOUTOU vakavakaʼi fakalelei te ʼu foʼi piesi siliva ʼaē ʼe fakahā ʼi henī. Neʼe tā te ʼu foʼi piesi ʼaenī e te tuʼi Siamani ko Wilhelm 5 lolotoga tona temi pule mai te taʼu 1627 ʼo aʼu ki te taʼu 1637. ʼI te temi ʼaia, neʼe lolotoga tau te potu loto ʼo te Eulopa, ʼi te Guerre de Trente Ans, ko te fihi ʼa te kau Katolika pea mo te kau Polotesita. Neʼe kau ia Wilhelm 5 ki te kau Polotesita. Moʼo huʼi ʼaki te totogi maʼuhiga ʼo te tau ʼaia, neʼe ina tānaki fuli te siliva ʼaē neʼe ina maʼu pea neʼe ina tā ʼaki ai te ʼu foʼi piesi.
Ko te potu ʼaē ʼe lelei ke fakatokagaʼi, ʼe lahi te ʼu foʼi piesi neʼe ʼi ai tona fakatātā, ʼe tuʼu ai te laʼā ʼe ina takatakai te huafa ʼo te ʼAtua, ʼaē ko Sehova, ʼi tona tuʼu ʼaki te Tetalakalame faka Hepeleo. ʼE ʼi ai mo te fuʼu piu, ʼe ina fakatātā ai te mālohi. Ko te faka ʼuhiga ʼe fai ki te fuʼu ʼakau ʼaia, ʼe logope tona fakamapelu e te matagi, ʼe tuʼu maʼu pe ia ʼo mole fasi ʼaki te puipui ʼa te ʼAtua. ʼE tou lau fēnei te tohi faka Latina ʼi te tākai ʼo te foʼi piesi: “ ʼAki te temi loaloaga ʼaē ʼe loto kiai ia Sehova, ʼe puipui anai ia ʼau.”
Ko te taʼi fakaʼaogaʼi ʼaia ʼo te huafa ʼo te ʼAtua neʼe mole hona ʼuhiga e tahi, neʼe mole feala ia ke ina ʼaumai ai te puipui ʼa Sehova, koteʼuhi ʼe mole kau ia Sehova ki te ʼu fihi ʼa te tagata ʼaē ʼe ʼi ai te agamālohi. Koia, ko te tau ʼaia, La Guerre de Trente Ans, neʼe mole feala ia ke tapuakina e te ʼAtua. ʼE ʼui fēnei e te encyclopédie (Funk & Wagnalls New Encyclopedia), “ ʼi te fakafuafua ʼo te ʼu fakamatala ʼaē neʼe tānaki, neʼe laka ʼi te vaelua ʼo te hahaʼi ʼo Siamani ʼaē neʼe mamate ʼi te tau. Neʼe mole lauʼia te ʼu kolo Siamani, te ʼu kolo veliveli mo te ʼu kolo lalahi, pea mo te ʼu fale ki te gāue kele ʼaē neʼe molehi katoa. ʼE lau ko te vahe lua ki te tolu ʼo te matani gāue ʼi te gāue masini, mo te gāue ki te kele, pea mo te fakatau koloā ʼo Siamani neʼe ʼalunoa tonatou ʼu koloā.”
Ko te fakaʼaogaʼi ʼo te huafa ʼo Sehova ʼi te ʼu foʼi piesi ʼaia ʼe ina fakamanatuʼi mai te fakatotonu ʼaē neʼe tuku age ki Iselaele: “ ʼAua naʼa koutou toʼo te huafa ʼo Sehova, tou ʼAtua, ʼo takua noaʼi.” (Ekesote 20:7) Kae, ko te ʼu foʼi piesi ʼaia ʼe nātou fakamoʼoni ko te huafa ʼo te ʼAtua, ʼaē ko Sehova, neʼe kua māhani kiai te hahaʼi ʼo Siamani. ʼE koutou ʼiloʼi lelei koa te ʼAtua ʼaē ʼe higoa feiā?