Te ʼu Fafine ʼi Te Malamanei Katoa

ʼI TE temi ʼaē neʼe talagataʼa ai te ʼuluaki taumatuʼa ki te ʼAtua, neʼe fakakikite e Sehova te ʼu ikuʼaga fakamataku ʼe hoko anai kia nāua pea mo tonā hākoga. Neʼe ʼui fēnei e Sehova kia Eva: “ ʼE tuʼu anai tou holi ki tou ʼohoana pea ko ia, ʼe ina puleʼi anai koe.” (Senesi 3:16) ʼE fakahā fakalelei e te Tohi-Tapu te fakaʼapaʼapa lahi ʼaē ʼo ʼuhiga mo te ʼu fafine, pea ko te toko miliona fafine ʼe nātou ʼāsili fiafia age, pea mo nātou maʼuli fīmālie koteʼuhi ko nātou pea mo ʼonatou ʼu famili ʼe nātou maʼuliʼi te ʼu pelesepeto ʼo te Tohi-Tapu.

Kae ʼe fakahā ʼi te nusipepa ʼo ʼuhiga mo te ʼu meʼa ʼaē ʼe tonu ke fai e te hahaʼi tagata, tokolahi te ʼu hahaʼi fafine ʼi te malamanei ʼe fakalainoaʼi, ʼe fakapōpulaʼi, pea mo gaohi koviʼi. ʼO ʼuhiga mo te talanoa ʼaē neʼe fai e te nusipepa, ʼe ʼui fēnei e te International Herald Tribune: “Neʼe fakahā lelei e te fakamatala ʼo ʼuhiga mo te ʼu fenua e 193 . . . ʼe ina fakamatalatala te paki fakaʼofaʼofa ʼo ʼuhiga mo te ʼu meʼa ʼaē ʼe fakakeheʼi ai te fafine pea mo tona gaohi koviʼi.”

Koʼeni te ʼu faʼifaʼitaki: ʼI Afelika ʼo te lotomalie, ʼe tonu ke lahi age te ʼu gāue ʼa te ʼu taʼahine, pea ko te vahe tahi ki te tolu ia nātou ʼe ako ʼo mole hage ko te kau tamaliki tagata heʼe lahi age tanatou ako ʼi te kau taʼahine. ʼI te tahi fenua ʼo Afelika ʼo te lotomalie, ʼe mole fakagafua e te puleʼaga ki te hahaʼi fafine ke nātou tono kae ʼe fakagafua ia ki te hahaʼi tagata. Ko te lao ʼi te tahi fenua ʼo Afelika, ʼe mole nātou fakatūʼa te tagata ʼaē ʼe ina matehi tona ʼohoana mo kapau ʼe ina ʼiloʼi neʼe tono, kae ko te lao ʼe mole ina fakamolemole mokā ko he fafine ʼaē ʼe ina matehi tona ʼohoana ʼaē neʼe tono.

ʼE ʼui e te nusipepa ko te ʼu koga meʼa ʼi Amelika ʼo te Potu Toga, ko te kau polisi ʼe mole nātou fakameʼameʼa mokā nātou tā te hahaʼi fafine. Pea ko te gāue ʼaē ʼo ʼuhiga mo te ʼu fafine, ʼi te agamāhani ʼe ko te 30 peʼe ko te 40 ki te teau tona veliveli ʼi te totogi ʼaē ʼa te ʼu tagata.

ʼI te ʼu faʼahi ʼo Asia, ʼe fakamālohiʼi te hahaʼi fafine ke nātou paʼa pea mo nātou fakatō fatu. ʼI te tahi fenua, ʼe ko te kau paomutu e toko 500 000, tokolahi ia nātou ʼaia neʼe ko tanatou ʼu mātuʼa ʼaē neʼe nātou fakamaʼua kia nātou ke nātou fai te aga ʼaia, ke feala ai hanatou maʼu he paʼaga moʼo totogi honatou ʼu ʼapi foʼou. Ko te kau polisi ʼi te tahi fenua ʼe tonu ke nātou tauʼi te mafola ʼaē ʼo te “matehi [ʼo te hahaʼi fafine] ʼuhi ko te totogi”—ʼe matehi te hahaʼi fafine e tonatou ʼohoana peʼe ko tonatou famili koteʼuhi ko tonatou totogi neʼe mole feʼauga mo te meʼa ʼaē neʼe nātou fakaʼamu ki ai.

ʼO ʼuhiga mo Sesu Kilisito, ʼe fakahā lelei mai e te Tohi-Tapu kia tatou: “ ʼE ina hāofaki anai te masiva ʼaē ʼe pāui ke tokoni age ki ai, ʼo toe feiā ki ʼaē ʼe mamahi pea mo ʼaē ʼe mole tokoni ki ai he tahi. ʼE ʼofa anai kia ia ʼaē ʼe veliveli pea mo ʼaē ʼe masiva, pea ʼe ina hāofaki anai te ʼu nefesi ʼo te kau masiva. Pea ʼe ina totogi anai tonatou ʼu nefesi mai te fatogia pea mo te agamālohi, pea ko tonatou toto ʼe maʼuhiga anai ki ʼona ʼu mata.” (Pesalemo 72:12-14) Koia ʼe tou falala moʼoni, ko te hahaʼi fafine ʼi te malamanei ʼe feala ke nātou falala ʼe nātou maʼu anai he ʼu ʼaluʼaga lelei ʼi te temi ʼaia.