Ko Te Kau Faka Mafola ʼe Nātou Fakamatala

“ ʼE Nātou Hoko Tuʼumaʼu”

TALU mai te temi ʼo Sesu Kilisito pea mo tana ʼu ʼapositolo, neʼe fakaʼaogaʼi e te ʼu takitaki lotu te ʼu meʼa fuli ʼaē neʼe feala ʼi tanatou faiga ʼaē ke nātou tāʼofi te faka mafola ʼo te logo lelei ʼo te Puleʼaga ʼa te ʼAtua. Neʼe tuʼa lahi pea neʼe “fakatotonu” mālohi age e te ʼu pule ʼo te fenua ʼo Selusalemi ke “fakagata [te ʼu ʼapositolo] tanatou palalau ʼo nātou fakaʼaogaʼi te higoa ʼa Sesu.” (Gāue 5:27, 28, 40) Kae, ʼe tou lau ʼi te fakamatala ʼa te Tohi-Tapu “neʼe haga tuputupu aipe te folafola ʼa te ʼAtua, pea neʼe tuputupu te kau tisipulo ʼo hahaʼi ʼaupito ʼi Selusalemi.”—Gāue 6:7.

Kua hili kiai taʼu e lua afe, ʼe kei tou maʼu ʼi Iselaele te ʼu takitaki lotu ʼe nātou fakaloto mālohiʼi te ʼu pule kolo ke nātou fakafeagai ki te gāue ʼo te kau Kilisitiano moʼoni ʼi te fenua ʼaia. ʼAki te mālohi ʼaē neʼe fakahā e te ʼu hahaʼi lotu, neʼe fakatotonu e te ʼu pule ʼi Tel-Aviv, ʼi Iselaele, ʼi Novepeli 1987, ki te kau Fakamoʼoni ke fakagata tanatou ʼu fono faka Kilisitiano ʼi te Fale ʼo te Puleʼaga ʼaē ʼe tuʼu ʼi te pilō ʼo te filiale ʼo te Sosiete Watch Tower. Ko te fakatotonu ʼaia neʼe kamata ʼi ʼOketopeli 1989. ʼO mulimuli ki te faʼahi ʼaia, neʼe fai te ʼu fono ʼa te kau Fakamoʼoni ʼi te ʼu koga meʼa neʼe totogi lolotoga taʼu e tolu, kae tukunoa feiā tanatou Fale ʼo te Puleʼaga ʼo mole fakaʼaogaʼi.

Kae, ʼi te temi ʼaia, neʼe kaku te faʼahi ʼaia ki te Telepinale Lahi ʼo Iselaele. Neʼe toe vakaʼi e te pilō ʼo te tagata ʼaē ʼe ina fakafofoga te puleʼaga, te ʼu manatu ʼaē neʼe fakahā age e te kau Fakamoʼoni pea neʼe ina tala ʼe mole he fakafeagai ki te faʼahi ʼaia, he ko te tapuʼi ʼaia neʼe fakatafito ki he ʼu fehiʼa faka lotu. Koia, neʼe tonu ai leva ke molehi te fakatotonu ʼa te ʼu pule ʼo te fenua, pea neʼe toe ʼolo te kau Fakamoʼoni ʼa Sehova, ʼaki he loto fiafia, ki tonatou Fale ʼo te Puleʼaga.

Neʼe mole tuputupu koa te faka mafola ʼo te ʼu moʼoni ʼo te Tohi-Tapu ʼi te ʼu taʼu ʼaia? Kailoa. ʼI te temi ʼaē neʼe māpunu ai te Fale ʼo te Puleʼaga, neʼe ko kokelekasio e lua ʼi Tel-Aviv pea mo te tahi ako faka Tohi-Tapu neʼe ōvi ki te kolo ko Lydda. Hili kiai te ʼu taʼu e tolu, ʼi te toe avahi ʼaē ʼo te Fale ʼo te Puleʼaga, neʼe tuputupu te kau Fakamoʼoni ʼa Sehova ʼo kokelekasio e fā, pea neʼe toe fakatahi ʼi Beersheba te ako faka Tohi-Tapu foʼou.

Ko te tuputupu ʼi Iselaele neʼe mole faka tuʼakoi pe ki te ʼu lea tāfito ʼaē ko te faka Alape pea mo te faka Hepeleo. Neʼe hoko te toe mavae lahi ʼa te hahaʼi mai te Lusia ʼāfea, koia neʼe maʼumaʼua te kau Fakamoʼoni ʼa Sehova ʼaē ʼe palalau faka Lusia ʼi te vaevae ʼo te logo lelei mo nātou. ʼE fai te ʼu fono ʼi te lea faka Lusia ʼi te ʼu kokelekasio e tolu; mole heʼeki faʼa fualoa, ko te toko teau tupu hahaʼi neʼe nātou kau ki te fakatahi lea faka Lusia.

ʼE mahino papau ia ʼe hoko atu pe anai te fehiʼa ʼa te kau tagata lotu ki te tauhi moʼoni. Kae ʼe haga faʼifaʼitakiʼi aipe e te kau fai faka mafola ʼo te Puleʼaga te ʼu Kilisitiano ʼo te ʼuluaki sēkulō ʼaē, logope te fakafeagai, “neʼe nātou haga akoʼi pea mo tala te logo lelei ʼo ʼuhiga mo Kilisito, Sesu.”—Gāue 5:42.