ʼAua Naʼa Koutou Taupau Ia Te Lotokovi
E LAGI ʼe faigataʼa ʼaupito hatatou tekeʼi te ʼita mokā hala mai he tahi kia tatou. ʼE foaki mai e te Tohi-Tapu te ʼu tokoni ʼaoga ʼo ʼuhiga mo te ʼu faʼahiga ʼaluʼaga ʼaia. Neʼe tohi fēnei e te ʼapositolo ko Paulo, “Koutou ʼiʼita, kae ʼaua naʼa koutou agahala; ke ʼaua naʼa tō te laʼā ki tokotou ʼita.”—Efesi 4:26.
ʼI te agamāhani, ka fai mai e he tahi he meʼa kovi kia tatou, ʼe tou ʼiʼita ai. ʼI te ʼui ʼa Paulo “koutou ʼiʼita” ʼe hā ʼaki ai ko te ʼita ʼe lelei ʼi ʼihi temi—lagi ʼe tou ʼiʼita he neʼe gaohi koviʼi tatou, pe ko he aga heʼe faitotonu. (Vakaʼi ia 2 Kolonito 11:29.) Kae kapau ʼe mole fakatokatoka te ʼu fihifihia ʼaia, tatau aipe peʼe tonu tokita ʼita, kae ʼe ʼi ai anai hona ʼu fua kovi, ʼo hoko ai mo he agahala mamafa. (Senesi 34:1-31; 49:5-7; Pesalemo 106:32, 33) Koia, koteā koa te meʼa ʼe feala ke koutou fai mo kapau ʼe koutou ʼiʼita?
Kapau ko he ʼu kiʼi hala ʼe mole faʼa maʼuhiga, ʼe feala ke koutou fakatokatoka te ʼaluʼaga ʼaia ʼi tokotou loto “pea mo koutou nofo fakalogologo,” peʼe koutou ʼalu kia ia ʼaē neʼe hala atu kia koutou pea ke koulua palalau ʼo ʼuhiga mo te faʼahi ʼaia. (Pesalemo 4:4; Mateo 5:23, 24) Tatau aipe pe koteā te faʼahiga puleʼaki ʼaē ka koutou fai, ʼe lelei age takotou fakatokatoka fakavilivili te ʼu fihifihia ʼaia, ke ʼaua naʼa koutou taupau te lotokovi pea mo hoko ai he ʼu meʼa fakatupu mamahi.—Efesi 4:31.
ʼE loto fakamolemole ʼaupito ia Sehova ki ʼatatou ʼu agahala, ʼo feiā aipe ki te ʼu hala ʼaē ʼe tou fai kae mole tou ʼiloʼi. ʼE feala koa hatatou fakamolemole feiā te ʼu kiʼi hala veliveli ʼo totatou ʼu kaumeʼa?—Kolose 3:13; 1 Petelo 4:8.
ʼE lelei hatatou ʼiloʼi ko te kupu faka Keleka ʼaē ʼo ʼuhiga mo te “loto fakamolemole,” ko tona faka ʼuhiga ke “ ʼaua naʼa tokagaʼi.” Ko te loto fakamolemole ʼe mole faka ʼuhiga ia ʼe tou meʼa noaʼi, peʼe mole tou fia tokagaʼi te meʼa ʼaē ʼe kovi. Kae ʼi ʼihi temi e lagi feala ke koutou ‘tuku feiāʼi te meʼa ʼaē neʼe hoko,’ heʼe kua mahino kia koutou ko te lotokovi ʼe ina fakaʼāsili mamafa anai takotou kavega, pea ʼe ina maumauʼi anai te logo tahi ʼa te kokelekasio faka Kilisitiano. Tahi ʼaē meʼa, ko te lotokovi ʼe feala ke fakatupu kovi ki tokotou maʼuli mālōlō!—Pesalemo 103:9.