Neʼe Fai He Puleʼaki ʼo ʼUhiga Mo Te Fakafeagai Neʼe Fai Ki Te Kau Fakamoʼoni ʼa Sehova
ʼI TE hili ʼo te talitali fualoa, neʼe fakatahitahi te Telepinale ʼo Tesalonika, ʼi Kelesi, ʼi te ʼaho 8 ʼo Sūnio 1995 ʼo fakalogo ki te fakafeagai ʼaē neʼe fai ki te ʼu fafine Fakamoʼoni ʼa Sehova e toko fā. Koteā te meʼa ʼaē neʼe faka lākahalaʼi ai ia nātou? Neʼe lau neʼe nātou fakamaliu fakamālohi te hahaʼi mai tanatou lotu, ʼo tapuʼi ai e te lao faka Keleka talu mai taʼu e 50 tupu.
Kae, ʼi te temi ʼaē neʼe hoko ai te fakamāu, neʼe kua ʼosi mate te fakamoʼoni tāfito—ko te patele ʼaē neʼe ina fakatupu te fakafeagai ki te ʼu fafine ʼaia e toko fā. Neʼe faiga te tahi patele ke ina fai he fakamoʼoni moʼo fetogi ʼo te patele ʼaē kua mate, kae neʼe mole tali e te telepinale tana kole. Koia, ʼe mole ko he meʼa fakapunamaʼuli te hoko ʼo te fakamāu ʼaia ʼi te ʼu minuta e 15! Neʼe vakaʼi e te tuʼi fakamāu te tahi fakafeagai ʼe fai ki te kau Fakamoʼoni, pea neʼe ina fai te puleʼaki ʼo ʼui maʼana, ʼe mole moʼoni te ʼui ʼaē ʼe fakamaliu fakamālohi e te kau Fakamoʼoni te hahaʼi mai tanatou lotu. Neʼe hā ʼi te puleʼaki ʼaia ʼe lotolelei te telepinale faka Keleka, ʼo fakaʼapaʼapa pea mo mulimuli ki te tonu ʼaē neʼe fai ʼi te taʼu 1993 e te Telepinale ʼo Eulopa ʼo ʼuhiga mo te Faʼitaliha ʼa te Tagata.
Neʼe ko he meʼa fakapunamaʼuli tāfito te sio ki he ʼu fafine e toko tolu ʼaē neʼe kau ki te kau fakafeagai, ʼe nātou fakaōvi ki te ʼu fafine Fakamoʼoni ʼo fakamālo kia nātou mo tonatou loto katoa. ʼE ʼui e te tahi fafine ia nātou ʼaia, “ ʼE mātou fai fakalelei atu ʼo ʼuhiga mo te ʼu meʼa fuli ʼaē neʼe hoko.” Neʼe ina toe ʼui fēnei: “ ʼE mole ko hamatou hala. Neʼe fakamālohiʼi mātou e te patele ke mātou fakafeagai kia koutou. ʼI te temi nei kua mate ia, ʼe mātou loto ke koutou ʼōmai ki tomatou kolo pea mo tomatou ʼu ʼapi.”
Koia, ko Sehova neʼe ina toe foaki te mālo taulekaleka ki tana hahaʼi ʼi Kelesi. Ko te ʼu lao ʼaē ʼe nātou tapuʼi te fakamaliu fakamālohi ʼa te hahaʼi mai tanatou lotu, neʼe fakatuʼutuʼu ʼi Kelesi ʼi te taʼu 1938 pea mo te taʼu 1939. ʼI te taʼu 1993 neʼe ʼui e te Telepinale ʼo Eulopa ʼo ʼuhiga mo te Faʼitaliha ʼa te Tagata, ʼe mole lelei te lao ʼaia ʼaē neʼe fakaʼaogaʼi moʼo fakatagaʼi ʼo te kau Fakamoʼoni ʼa Sehova.—Vakaʼi Te Tule Leʼo, fakafalani, ʼo te ʼaho 1 ʼo Sepetepeli 1993, ʼi te ʼu pasina 27 ki te 31.