Ke Mū Tokotou Mālama!

KUA kaku mai te temi ke sio ai te matuʼa ki te Mesia ʼaē neʼe fakapapau mai! ʼAki te fakahā e te ʼatua neʼe ʼiloʼi ai e Simeone “ ʼe mole mate anai [ia] ka mole heʼeki sio ki te Kilisito ʼa Sehova.” (Luka 2:​26) Kae ʼi fiafia leva ʼo Simeone ʼi tana hū atu ki te fale lotu pea tuku age e Malia pea mo Sosefo te kiʼi tamasiʼi ko Sesu ki ʼona nima! Neʼe ina fakavikiviki te ʼAtua, ʼo ʼui fēnei: “ ʼI te temi leva ʼaē, ʼAliki Hau, ke ke tuku tau kaugana ke ʼalu ʼi te ʼāteaina pea mo te fīmālie . . . he kua sio ʼoku mata ki tau meʼa fakamaʼuli . . . ia te mālama ʼaē kua teuteuʼi moʼo toʼo ʼo te pūlou ʼi te ʼu puleʼaga ko te kolōlia ʼo tau hahaʼi ko Iselaele.”​—Luka 2:​27-​32; vakaʼi ia Isaia 42:​1-6.

Ko Sesu, mai tona papitema ʼi tona taʼu 30 ʼo aʼu ki tona mate, neʼe ina fakamoʼoni ko ia ʼe ko te “mālama” ʼo te malamanei. ʼI te ʼu faʼahi fea? Neʼe ina foaki te mālama fakalaumālie ʼaki tana fai faka mafola ʼo ʼuhiga mo te Puleʼaga ʼo te ʼAtua pea mo Tana ʼu fakatuʼutuʼu. Neʼe ina toe fakahā foki mo te ʼu akonaki hala ʼa te lotu pea mo ina fakahā fakalelei te ʼu gāue ʼaē ʼe kau ki te fakapōʼuli. (Mateo 15:​3-9; Kalate 5:​19-​21) Koia, neʼe feala ai ke ʼui totonu e Sesu: “Ko ʼau ko te mālama ʼo te malamanei.”​—Soane 8:​12.

Neʼe mate ia Sesu ʼi te taʼu 33 ʼo totatou temi. Neʼe puli ai koa te mālama? Kailoa! ʼI tana kei nofo ʼi te kele, neʼe ʼui e Sesu ki tana kau tisipulo: “Ke toe feiā pe te mū ʼo tokotou mālama ʼi muʼa ʼo te hahaʼi.” (Mateo 5:​16) ʼO toe feiā pe ʼi te hili ʼo te mate ʼo Sesu, neʼe haga fakamū e tana ʼu tisipulo te mālama.

ʼI te faʼifaʼitakiʼi ʼo Sesu, ko te kau Kilisitiano ia ʼaho nei ʼe nātou fakaʼata te mālama ʼo Sehova ʼaki tanatou kau ki te gāue fai faka mafola. ʼE nātou “haga haʼele ohage ko he fānau ʼo te mālama,” ʼo nātou fakamoʼoni totonu ko nātou ko he ʼu faʼifaʼitakiʼaga ʼo te mālama ʼo te maʼuli faka Kilisitiano.​—Efesi 5:⁠8.