Te Fīmālie Moʼoni—ʼE Faigataʼa Tona Fakahoko

KO ARNOLD neʼe ko te kiʼi tamasiʼi neʼe ina leleiʼia ʼaupito tana meʼa gaoʼi ʼaē ko te taika. ʼI te faʼahi fuli pe ʼaē neʼe ʼalu kiai, neʼe ʼalu mo tana taika​—ʼi te ʼu temi ʼaē ʼe gaoʼi ai, ʼi te temi kai, peʼe ʼi tona palepale. Kia ia, ʼe foaki age e te taika he loto fiafia, he fīmālie. ʼI te tahi ʼaho, neʼe lotomamahi ia ia. Neʼe puli te taika!

Neʼe tagi ia Arnold, pea ko tana faʼe, mo tana tāmai, pea mo tona ʼu tēhina lalahi neʼe nātou kumi te taika ʼi tonatou ʼapi. Ki muli age neʼe maʼu e te tahi ia nātou te taika ʼi te puha. ʼE mahino ia, neʼe ai e Arnold te taika kiai pea kua galo ia ia pe neʼe ina ai kifea te manu. Neʼe ʼaumai kia ia te taika, pea neʼe holoholoʼi e Arnold ʼona ʼu loʼimata. Neʼe toe fiafia ia pea mo fīmālie.

ʼI meʼa lelei foki, kanapaula neʼe feala ke fakatokatoka feiā te ʼu fihifihia fuli​—ohage pe ko te maʼu ʼo te taika ʼi te puha! Kae, ki te tokolahi, ko te ʼu fehuʼi ʼo ʼuhiga mo te fīmālie ʼe mole tatau ia mo te faʼahi ʼaia pea ʼe faigataʼa age ia. ʼI te potu fuli pe, ʼe feʼuiʼaki e te hahaʼi, ‘ ʼE hoko anai koa kia ʼau he fai fakapō peʼe ko te agamālohi? ʼE feala koa ʼi he ʼaho ke fakamavae ʼau ʼi taku gāue? ʼE feʼauga koa te meʼa kai ʼo toku famili? ʼE līaki anai koa ia ʼau e ʼihi ʼuhi ko te kehe ʼo taku lotu pea mo toku lanu?’

ʼE kaugamālie te hahaʼi ʼaē ʼe mole nātou maʼu te fīmālie. ʼE ʼui e te Kautahi ʼo te ʼAtu Puleʼaga Fakatahi, kua teitei pe ke toko tolu miliale te hahaʼi ʼaē ʼe mole nātou maʼu te ʼu faitoʼo ki te ʼu mahaki māhani, pea mo te ʼu faitoʼo ki te tahi ʼu mahaki. Ko te lauʼi miliale tupu hahaʼi ʼe nātou māsisiva. ʼE teitei ke lauʼi miliale hahaʼi, ʼaē ʼe logope la tanatou poto gāue, kae ʼe mole lahi tonatou fakaʼaogaʼi ʼi te gāue. Kua lahi ʼaupito te hahaʼi ʼaē ʼe nātou feholaki ʼi tonatou fenua, ʼo ʼolo ki te ʼu fenua matāpule. ʼI te fakaʼosi ʼo te taʼu 1994, ko te toko 1 ʼi te toko 115 hahaʼi ʼi te kele neʼe tonu ke mavae ʼi tona ʼapi. Ko te lauʼi miliona hahaʼi kua nātou maumauʼi tonatou maʼuli ʼuhi ko te ʼu gāue ʼaē ʼe pipiki ki te gaohi ʼo te toloke, ʼaē ʼe lau ʼe nātou maʼu ai te 500 000 miliale ʼi te taʼu, pea ko te ʼu gāue ʼaia ʼe tupu ai te ʼatu ʼu fakapō pea mo te ʼu agamālohi. Ko te ʼu tau ʼe tupu ai te mamate ʼa te lauʼi miliona hahaʼi. ʼI te lolotoga ʼo te taʼu 1993, ko te ʼu fenua e 42 neʼe kau ki te ʼu tau lalahi, kae ko ʼihi ʼu fenua e 37 neʼe hoko ai te ʼu maveuveu faka politike.

Ko te tau, te masiva, te fai fakapō, pea mo te tahi ʼu meʼa ʼaē ʼe nātou fakatupu tuʼutāmaki ki te maʼuli fīmālie, ʼe ko he ʼu meʼa ʼe hoko fakatahi, pea ʼe nātou ʼāsili tuputupu. ʼE mole maʼu he ʼu puleʼaki faigafua ki te ʼu fihifihia ʼaia. ʼI tona fakahagatonu, ʼe mole feala anai ke fakatokatoka e te tagata te ʼu meʼa ʼaia.

“ ʼAua naʼa ke falala ki te kau ʼaliki, peʼe ki te foha ʼo te tagata ʼaē neʼe toʼo mai te kele, ia ia ʼaē ʼe mole maʼu ai te fakamaʼuli,” ko te fakatotonu ʼaia ʼa te Folafola ʼa te ʼAtua, te Tohi-Tapu. Ko ai koa ʼaē ʼe feala ke tou falala kiai? ʼE hoko e te vaega ʼaia ʼo ina ʼui fēnei: “Manuʼia ia ia ʼaē ko tona tokoni ko te ʼAtua ʼo Sakopo, pea ko tona falalaʼaga ko Sehova, tona ʼAtua, te Tupuʼaga ʼo te lagi pea mo te kele, pea mo te tai, pea mo meʼa fuli ʼaē ʼe maʼu ʼi ai.”​—Pesalemo 146:​3-6.

He koʼe ʼe feala ke tou falala ʼe ʼaumai anai e Sehova te fīmālie ki te kele? ʼE feala koa hatatou maʼu te fīmālie, pea mo te maʼuli fiafia ʼi te temi nei? ʼE toʼo feafeaʼi anai koa e te ʼAtua te ʼu meʼa ʼaē ʼe mole feala ai te maʼuli fīmālie ʼa te tagata?