Ko Te Kau Faka Mafola ʼo Te Puleʼaga ʼe Nātou Fakamatala
ʼE Hoko Atu Te Faka Mafola ʼo Te ʼu Moʼoni ʼo Te Tohi-Tapu ʼi Irlande
ʼI TE ʼu taʼu pe ʼaenī kua hili, neʼe hoko te ʼu maveuveu lahi ʼi te fenua ʼo Irlande. Pea ʼi te tahi faʼahi, neʼe tali lelei e te hahaʼi ʼo Irlande te logo ʼo te Tohi-Tapu ʼo ʼuhiga mo te ʼamanaki ʼaē neʼe fakahā age kia nātou e te kau Fakamoʼoni ʼa Sehova. Ko te ʼu fakamatala ʼaē ʼe hoa mai neʼe hoko ʼi Irlande, pea ʼe nātou fakamoʼoni ki te faʼahi ʼaia.
■ ʼI Dublin, ko te Fakamoʼoni ʼa Sehova pea mo tana kiʼi taʼahine, neʼe nā kau ki te gāue fai faka mafola ʼi te ʼu ʼapi. Neʼe nā tō mo te fafine ʼe higoa ko Kati, neʼe maʼumaʼua ʼaupito mo tana ʼu fānau tokolahi. Neʼe kole age e te Fakamoʼoni peʼe feala ke fakahā fakanounou age e tana kiʼi taʼahine te logo ʼaē neʼe nā ʼōmai mo nāua, he neʼe ako e tana kiʼi taʼahine peʼe feafeaʼi te fai faka mafola. Neʼe tali e Kati, pea neʼe mahino lelei pea mo matala lelei te ʼu palalau ʼaē neʼe fai e te kiʼi taʼahine. Neʼe punamaʼuli ia Kati ʼi te fakamalotoloto pea mo te loto fakaʼapaʼapa ʼa te kiʼi taʼahine, pea neʼe ina tali te kiʼi pepa lotu.
Ki muli age, neʼe fakakaukauʼi e Kati te teuteu lelei ʼo te ʼu palalau ʼa te kiʼi taʼahine pea mo tana aga. Neʼe ina ʼui fēnei: “Neʼe ʼau punamaʼuli ʼi te kua feala ʼa he kiʼi taʼahine ke ina fakahā he logo maʼuhiga, logope la tana kei veliveli. Neʼe ʼau fakatotonu ka toe ʼōmai anai te kau Fakamoʼoni ʼa Sehova, pea ʼe ʼau fagono anai kia nātou.”
ʼAki te temi, neʼe mavae ia Kati ki te kiʼi kolo ʼi te potu toga mo te potu hihifo ʼo Irlande, ʼe ōvi ki te ʼu kiʼi kolo ʼo Cork pea mo Kerry. Ki muli age, neʼe fisifisi te kau Fakamoʼoni ki tona matapā, pea neʼe ina fakaafe nātou ki tona ʼapi. Neʼe ina tali te ako Tohi-Tapu pea ʼi te temi nei, ʼe kau ki te ʼu fono ʼo te kokelekasio mo te tokolahi ʼo tana ʼu fānau. ʼE loto fakafetaʼi ia Kati ki te kiʼi taʼahine, he neʼe loto moʼoni ke ina fakahā age kia ia te logo lelei.
■ ʼI te koga meʼa ʼo Tullamore, lolotoga taʼu e fitu, neʼe fai palalau te kau Fakamoʼoni ʼa Sehova ʼo ʼuhiga mo te Tohi-Tapu, mo te fafine ʼe higoa ko Soana. ʼI ʼihi temi, neʼe ina fakahā ʼe ina leleiʼia te faʼahi ʼaia pea mo ina tali te ʼu tohi, kae ʼi ʼihi temi, neʼe mole loto kiai. ʼI te tahi ʼaho, neʼe ʼita ia Soana ʼi te temi ʼaē neʼe ʼolo age ai te Fakamoʼoni ko Falani pea mo tona kaugā fai faka mafola. ʼE fakamatala fēnei e te Fakamoʼoni: “Neʼe mole ina fakatokagaʼi te ʼu meʼa ʼaē neʼe ma ʼui age, kae neʼe toe ʼāsili tona ʼita. Moʼo fakaʼosi, neʼe ina kapu māua, pea neʼe ina pupunu fakaʼita te matapā.”
Neʼe ʼeke e Falani peʼe toe feiā anai koa tana tali mokā ina toe ʼaʼahi ia ia. Neʼe manatu fēnei ia Falani: ‘Lagi mole kei ʼaoga ke ʼau toe liliu ʼo ʼaʼahi ia ia mo kapau ʼe mole kei loto ia ki te logo lelei.’ Kae, neʼe fai palalau ki te faʼahi ʼaia mo tona ʼohoana, ia Tomasi, pea neʼe ʼamanaki ia ʼe lelei anai tana fai palalau mo Soana. ʼI te tahi lakaga neʼe nā ʼolo ai ki te koga meʼa ʼaia, neʼe nā toe ʼolo ʼo ʼaʼahi ia Soana. Neʼe agalelei pea neʼe ina tali te ʼu nusipepa Te Tule Leʼo pea mo te Réveillez-vous! Ki muli age, neʼe lelei te ʼu ʼaʼahi ʼaē neʼe fai, pea neʼe kamata e Tomasi pea mo Falani tana ako Tohi-Tapu.
He koʼe neʼe hoko te fetogi ʼaia? ʼE fakamahino e Soana ko te temi ʼaē neʼe ʼita ai ki te kau Fakamoʼoni, neʼe tupu koteʼuhi neʼe hoki fai fānau pea ko tana ʼosi mavae pe ʼaia mai te lopitali. ʼI te pōʼuli, neʼe moe pe ʼi te hola e tahi vaelua, he neʼe ina fafaga tana kiʼi toe veliveli, pea mo tana tahi kiʼi toe kua lahilahi. ʼE ina ʼui fēnei: “Koia neʼe mole ʼau fia palalau ai ʼo ʼuhiga mo te lotu.”
Hili māhina e lua, neʼe kau ia Soana ki te ʼu fono fuli ʼo te kokelekasio, pea hili māhina e fā pea kau ki te minisitelio. Hili kiai māhina e hogofulu ʼi tana kamata ako te Tohi-Tapu, pea neʼe papitema. ʼI te temi nei, kua ʼaoga kia ia ʼi te minisitelio, te meʼa ʼaē neʼe ina fai ki te kau Fakamoʼoni. ʼE ina ʼui fēnei: “Kapau ʼe ʼau felāveʼi mo he tahi ʼe ʼitaʼita, ʼe ʼau faiga ke ʼau mahino kia ia. ʼE ʼau tohi tuʼumaʼu te ʼu faʼahi ʼaia. ʼE lagi fetogi anai ʼi taku toe liliu mai; ʼe lagi lotolelei anai pea mo ina tali lelei.”