“Ko Sehova Neʼe Ina Tali Ki Taku ʼu Faikole!”

ʼI TE malamanei katoa, ʼe teitei ko ako Tohi-Tapu e nima miliona ʼaē ʼe fai e te kau Fakamoʼoni ʼa Sehova mo te hahaʼi ʼaē ʼe nātou fia maʼu te ʼatamai mālama totonu, ʼo ʼuhiga mo te ʼAtua pea mo tana ʼu fakatuʼutuʼu fakaofoofo ʼo ʼuhiga mo te malamanei. ʼI te kau Fakamoʼoni ʼa Sehova, māʼiape la mo nātou liliki, ʼe nātou kau ʼi te gāue ʼaia. Koʼeni te faʼifaʼitaki ʼo te tama ko Soele. Neʼe ina foaki tona maʼuli kia Sehova pea mo papitema ʼi tona taʼu hiva. Hili kiai te taʼu katoa, koʼeni te meʼa ʼaē neʼe hoko kia ia:

“Lolotoga taku fai faka mafola, neʼe ʼau felāveʼi mo te fafine ko Candy. Neʼe ʼau tuku kia ia te kaupepa ‘Voici, je fais toutes choses nouvelles.’ Neʼe kua ʼi ai tana kaupepa feiā, koia neʼe ʼau tuku ai kia ia te tohi E Feala Keke Mauli O Heegata Ite Palatiso Ite Kele. Kae neʼe kua ʼi ai mo tana tohi feiā. Pea neʼe ʼau manatu fēnei, ‘ ʼE feala ke ʼau fakaafe te fafine ʼaenī ke fai hana ako Tohi-Tapu.’ Neʼe ina tali!

“Ko te tēhina ʼo Candy, ʼaē neʼe ʼamanaki mate ʼuhi ko te kosea, neʼe haʼu ke nā nonofo tahi. Tahi ʼaē meʼa, neʼe ako ia Candy ke liliu ko he afilimie. Koia ʼi te tahi temi neʼe mole fai ai tana ako Tohi-Tapu. Kae ko ʼau mo taku ʼu mātuʼa, neʼe mātou ʼaʼahi tuʼumaʼu ia ia pea mo tona ʼohoana, ia Dick, ʼo mātou tuku kia nāua te ʼu nusipepa. Neʼe ina ʼui mai kia mātou ʼe ina tuku ōvi te ʼu nusipepa ki tona moeʼaga, pea ʼe ina lau tuʼumaʼu ʼi te pōʼuli.

“Ki muli age neʼe mate te tēhina ʼo Candy. Pea ko ʼau mo taku tāmai pea mo taku faʼe, neʼe mātou palalau kia Candy ʼo ʼuhiga mo te ʼaluʼaga ʼo te kau mate. Pea neʼe ina fakatotonu ke toe fai tana ako Tohi-Tapu. ʼI te tahi ʼaho, neʼe mātou fehuʼi kia Dick peʼe fia ako mo Candy ke nā ako toko lua. Neʼe ina leleiʼia te fakatuʼutuʼu ʼaia. Koia ia ʼaho nei ko ʼau mo taku tāmai ʼe ma fai te ako ʼa Dick pea mo Candy. ʼE haʼele ki muʼa tanā ako, pea ʼe nā loto fakafetaʼi ki tanā ako Tohi-Tapu.

“Neʼe ʼau faikole ke ʼau maʼu he ako Tohi-Tapu, pea neʼe tali e Sehova taku ʼu faikole!”