“ ʼE Tou Kau Fuli Ki Te Foʼi Famili Pe e Tahi”
TALU mai ni ʼu taʼu, kua mafola ʼi te malamanei katoa te fakapalatahi ʼo ʼuhiga mo te lotu pea mo te fakakeheʼi ʼo te lanu ʼo te hahaʼi. Neʼe hoko te ʼu fakapō, te ʼu meʼa fakatupu mamahi pea mo te ʼu meʼa fakalialia ʼuhi ko te kehekehe ʼo te ʼu lanu. ʼO mulimuli ki te fakamatala ʼo te Amnesty International, ʼi te malamanei katoa ʼi te 1994, ʼuhi ko te mole fakaʼapaʼapaʼi ʼo te loto faʼitaliha ʼa te tagata, neʼe fakamaʼua ai ki te hahaʼi e toko 23 miliona tupu, ke nātou mavae ʼi tonatou ʼapi.
ʼI Rwanda pe, neʼe tāmateʼi te toko 500 000 pea ko te toko 2 000 000 tupu neʼe nātou feholaki ʼi te hoko ʼi te fetāmateʼiʼaki ʼa te kau Hutu pea mo te kau Tutsi. ʼE ʼui fēnei e te nusipepa faka Pelesike Le Soir: “Neʼe fakatagaʼi tāfito te kau Fakamoʼoni ʼa Sehova ʼuhi ko tanatou fakafisi ki te fakaʼaogaʼi ʼo te mahafu.” ʼE mole kau te kau Fakamoʼoni ʼa Sehova ki te ʼu tau. Kae ko te lauʼi teau ia nātou neʼe mamate ʼi te ʼu agamālohi ʼaia. Ko te faʼahi ʼaia ʼe ina fakamanatuʼi mai kia tatou te ʼu palalau ʼaē neʼe fai e Sesu ki tana ʼu tisipulo: “Mai tona ʼuhiga ʼaē ʼe mole koutou kau ʼi te malamanei, . . . ko te tupuʼaga la ʼaia ʼo te fehiʼa ʼa te malamanei kia koutou.”—Soane 15:19.
Ko te famili Fakamoʼoni ʼa Sehova, ko Eugène Ntabana, mo tona ʼohoana pea mo tanā ʼu tamaliki e lua, neʼe nātou nonofo ʼi te kolo tāfito ʼaē ko Kigali. ʼI te ʼu temi ʼaē neʼe fakamahino ai e Eugène ki tona ʼu vāhaʼa vale pe koʼe ʼi tona ʼuhiga Kilisitiano ʼe mole kau ki te ʼu meʼa faka politike, neʼe tautau palalau ʼo ʼuhiga mo te pukavila, ko te ʼulu ʼakau ko ʼona fisiʼi teu ʼe maʼuli lelei ʼi te ʼaele vela.—Mateo 22:21.
Neʼe fakamahino fēnei e Eugène, “ ʼI henī ʼi Kigali, ko te ʼu fisiʼi teu ʼo te pukavila, ʼe lanu kula, mo huʼalisi peʼe hina ʼi ʼihi temi. Kae ko te ʼu faʼahiga fisiʼi teu ʼaia ʼe nātou kau ki te faʼahiga ʼulu ʼakau pe e tahi. ʼE toe feiā mo te tagata. Tatau aipe peʼe lagi tou kehekehe ʼi totatou lanu peʼe ko totatou fenua, kae ʼe tou kau fuli ki te foʼi famili pe e tahi, ko te famili fakatagata.”
Meʼa fakaʼofaʼofa foki, logope la tonatou ʼuhiga tokalelei, pea mo tanatou fakafisi ki te ʼu meʼa faka politike, kae neʼe matehi e te hahaʼi aga fekai te famili Ntabana. Kae neʼe nātou mamate agatonu. Tou tui papau, ko Sehova ʼAtua ʼe ina fakahoko anai tana fakapapau kia nātou ʼaia, pea ʼe ina fakatuʼuake anai nātou ke nātou maʼu te mālama ʼaē ka pulihi ai anai te fakapalatahi. (Gāue 24:15) ʼI te temi ʼaia, ko te famili Ntabana ʼo toe feiā pe mo te tahi ʼu hahaʼi, ʼe nātou “fiafia ʼaupito anai ʼi te mahu ʼo te tokalelei.”—Pesalemo 37:11.