“ ʼE Tuʼu Koa ʼIfea Tokotou ’Ēkelesia?”

KO TE fehuʼi ʼaia ʼaē ʼe tautau fai ki te kau Fakamoʼoni ʼa Sehova ʼi Mozambique. ʼI tona fakahagatonu, neʼe faigataʼa te tali ki te fehuʼi ʼaia ʼo aʼu mai ki te temi nei. Mai tona ʼaluʼaga ʼaē neʼe mole tali te lotu ʼo te kau Fakamoʼoni ʼa Sehova ʼi te fenua ʼaia talu mai te taʼu 1991. Koia, neʼe mole feala ai ke ʼiloʼi lelei pe kofea te koga meʼa ʼaē ʼe tuʼu ai tonatou ʼu fale tauhi.

Kae, ko te ʼaluʼaga ʼaia neʼe fetogi ʼi te ʼaho 19 ʼo Fepualio 1994. ʼI te ʼaho vevela ʼaia pea mo laʼā, neʼe avahi ai te ʼu ʼuluaki fale ʼo te Puleʼaga e lua ʼaē neʼe hoki laga ʼi Mozambique. Neʼe ko te toko 602 neʼe nātou kau ki te avahi ʼo te ʼu fale ʼaia ʼi te ʼuafu ʼo Beira, ʼi te kauvai ʼo Mozambique. ʼE ʼaoga anai te ʼu Fale ʼo te Puleʼaga ʼaia ki te ʼu meʼa ʼe ʼaoga ki te ʼu kokelekasio e tolu ʼaē ʼe tuʼu ʼi te kolo ʼaia.

Ko te gāue katoa, mai te kamata ʼo tona fakatafito ki tona ʼosi katoa, neʼe fakahoko ʼi te taʼu katoa pea mo māhina e lua. Ko te toko 30 peʼe laka age ʼo te kau gāue neʼe tau mai Zimbabwe, pea ʼe nātou gāue tahi mo te kau Fakamoʼoni ʼo te fenua. Mai tona ʼaluʼaga ʼaē neʼe mole feala tanatou nonofo fuli ʼi te ʼapi faka misionea ʼaē ʼi Beira, ʼaē neʼe fakaʼaogaʼi moʼo fakatuʼutuʼu te ʼu gāue, ko ʼihi neʼe nātou fakatuʼu tonatou ʼu falelā ʼi te ʼu tafaʼaki ʼo te ʼapi faka misionea, lolotoga te ʼu fakaʼosi vāhaʼa pea ʼi ʼihi temi ʼe nātou nonofo ʼi te lolotoga vāhaʼa.

Ko te koga meʼa ʼaē ʼe laga ai te Fale ʼo te Puleʼaga ʼo te kokelekasio ʼo Massamba pea mo Munhava, ʼe tuʼu ʼi te vaʼe ala lahi ʼo Beira. Neʼe ʼui fēnei e te misionea: “ ʼI te tahi ʼaho ʼaē neʼe haʼele vave ai te gāue, pea mo fakatokagaʼi e te hahaʼi tona haʼele ki muʼa, neʼe mātou sisio ki te ʼu motokā neʼe teitei pe ke nātou feʼīʼaki, he neʼe sioʼi e te kau taki motokā ia te Fale ʼo te Puleʼaga, ka mole nātou sisio ki tonatou ala.” Tokolahi neʼe tutuʼu ʼo sisio ki te gāue, pea neʼe nātou punamaʼuli tāfito ʼi te gāue fakatahi ʼo te ʼu hahaʼi lanu kehekehe.

Neʼe mātou fai he fakatuʼutuʼu lahi ʼo ʼuhiga mo te gāue ʼaia. ʼO mole tatau mo ʼihi ʼu fakatuʼutuʼu ʼi te potu ʼaia ʼo te mālama, ʼaē ʼe tahitahiga te maʼu ai ʼo te ʼu meʼa gāue pea mo te falā, neʼe mole he temi neʼe tuʼu ai te laga ʼo te ʼu Fale ʼo te Puleʼaga ʼuhi he neʼe mole ʼi ai he ʼu meʼa gāue. ʼI te tahi lakaga, neʼe ʼaoga kia nātou he ʼu taga simā e 800, pea ko te koga meʼa pe e tahi ʼaē neʼe feala ke maʼu ai kae neʼe mole maʼu ai he ʼu taga moʼo fakafonu ʼo te simā. Neʼe faka felogoi te ʼu tēhina ki te filiale ʼo te Sosiete Watch Tower ʼaē ʼe tuʼu ʼi te kolo tāfito ko Maputo, pea neʼe ʼaumai te ʼu taga ʼi te vakalele, ʼo ʼave ki te fale ʼaē ʼe gaohi ai te simā, pea fakafonu ai. Neʼe hoko atu aipe te gāue.

ʼI te tahi lakaga, ʼi te temi ʼaē neʼe nātou ʼai ai te ʼu ukamea ʼo te ʼato, neʼe nātou fakatokagaʼi ʼe mole kei ʼi ai he ʼu pou ukamea. ʼUhi ko te mole lahi ʼo te ukamea ʼaē ʼe maʼu ʼi te koga meʼa ʼaia, neʼe fetuku mai te ukamea ia kilometa e 600 ki te laga fale! Ko te tagata neʼe ina sioʼi te gāue neʼe fakaōvi ki te tahi ʼi te kau gāue pea ina fehuʼi age kia ia peʼe ina ʼiloʼi he koga meʼa ʼe feala ke nātou maʼu ai te ukamea moʼo fakaʼosi ʼaki te gāue. Neʼe tali age e te tagata: “Kua hola katoa taku tuʼu ʼi henī, pea ʼe mahino ia ʼe ʼi ai te tupuʼaga ʼo taku ʼi henī. ʼE mole feala ke ʼau tokoni atu kia koutou kae ʼau leleiʼia te gāue ʼaē ʼe koutou fai pea mo te faʼahiga fai ʼo takotou gāue. ʼE ʼau maʼu te ukamea ʼaē ʼe ʼaoga ki takotou gāue, pea ʼe ʼau fia foaki atu kia koutou ko haku meʼa ʼofa.” Neʼe foaki te ʼu ukamea ʼaia ʼi te lakaga tonu ʼaē neʼe ʼaoga ai kia nātou.

ʼE lahi te ʼu hahaʼi ʼaē neʼe nātou sioʼi te laga fale, neʼe nātou feʼuiʼaki pe ko ai te matani gāue lahi ʼaē ʼe ina fai te laga fale ʼaia. Koia, ko te kau gāue, neʼe nātou fiafia ʼaupito ʼi te fakahā, ʼe ko nātou ko te kau Fakamoʼoni ʼa Sehova ʼe nātou foaki tonatou temi ʼaki tonatou lotolelei moʼo fai tanatou ʼu gāue. Koteā ʼaē neʼe punamaʼuli tāfito ai te hahaʼi? Neʼe ʼui e te tahi ia nātou ʼaia: “ ʼE koutou logo tahi. Logope la ʼe koutou lanu kehekehe, kae ʼe koutou gāue fakatahi ohage ko ni ʼu tēhina.” Ko te meʼa ʼaē neʼe hoko ai, ko te tokolahi neʼe nātou ʼōmai ʼo fakaʼui ke fai hanatou ʼu ako Tohi-Tapu. Neʼe toe ʼi ai foki mo tona ʼu fua lelei ki te ʼu fono. Ohage la, neʼe fakafuafua ai ko te lahi ʼo te ʼu hahaʼi ʼaē ʼe ʼolo ki te ʼu fono ʼo te kokelekasio ʼo Manga, neʼe tuʼa lua age tona kaugamālie ʼi te kau Fakamoʼoni.

Ko te ʼu Fale foʼou ʼo te Puleʼaga ʼe ko he ʼu fakamoʼoni ʼaia ʼo te tapuakina lahi ʼaē ʼe foaki ki te kau Fakamoʼoni ʼa Sehova ʼo te fenua. Tokolahi neʼe fakatahitahi ʼi te temi muʼa ʼi he ʼu fale veliveli neʼe ʼato ʼaki te vao, pea mo pūlouʼi ʼaki te ʼu kie ʼi he malaʼe, peʼe ʼi he koga fale veliveli ʼo he ʼapi ʼo he tēhina pe ko he tuagaʼane. Neʼe nātou palapala ʼi te ʼu temi ʼua, kae neʼe nātou kau tuʼumaʼu aipe ki te ʼu fono. Talu mai te ʼu taʼu e hogofulu neʼe ko te ʼu fale ʼaia ʼaē neʼe ʼui ko te ʼu “Fale ʼo te Puleʼaga” ʼo te kau Fakamoʼoni ʼi Mozambique. Ko te tēhina ko Caetano Gabriel, ko te tagata ʼāfea ʼi te kokelekasio ʼo Massamba, neʼe ina ʼui fēnei: “ ʼE mātou loto fakafetaʼi ki tomatou ʼu tēhina ʼi te malamanei katoa, ʼaē neʼe kau ki te fakahoko ʼo te gāue ʼaia.” Neʼe manatuʼi fēnei e te tūpulaga Fakamoʼoni: “ ʼI tamatou nonofo ʼi Carico (“te ʼu lotoʼā fakamamahi” ʼaē neʼe nonofo ai te kau Fakamoʼoni ʼa Sehova ʼo teitei taʼu e 12), neʼe mātou ʼui fēnei, ‘ ʼE mātou faʼa kātaki anai, pea ʼe fakapale anai mātou e Sehova.’ Ko te Fale foʼou ʼo te Puleʼaga ʼe ko he fakapale ʼaia mai ia Sehova.” Ko tanatou ʼu palalau ʼe hā ʼaki ai tonatou loto fakafetaʼi pea mo tonatou lotomālohi ʼaē ʼo fakavikiviki kia Sehova.

ʼE lahi te kau tūpulaga neʼe kau ki te gāue laga fale neʼe nātou fia kau ki te selevisi pionie pea ki muli age neʼe nātou liliu ʼo pionie katoa. Ko te finemui ko Isabel, ko he pionie katoa ʼi te kokelekasio ʼo Manga, neʼe ina fakatokagaʼi te maʼa lelei ʼo te Fale ʼo te Puleʼaga ʼi muʼa ʼo tona avahi: “Kia ʼau ko te fale ʼaenī ʼe ko te fale ʼaē ʼe matalelei ʼaupito tokotahi ʼi te kolo ʼo Beira. ʼE ko he meʼa fakafiafia ʼaupito kia ʼau taku haʼu ki henī.” Ko Adão Costa, ko te misionea, neʼe ina fakamahino fēnei ko te ʼu takitaki ʼo te puleʼaga ʼo te fenua neʼe nātou lagolago lelei kia nātou ki te ʼaumai ʼo te ʼu meʼa gāue, ʼuhi ko tanatou ʼiloʼi ʼaē ʼe faitotonu te kau Fakamoʼoni ʼa Sehova. Pea neʼe ina toe ʼui fēnei: “Logope la tomatou kua gaʼegaʼe ʼaupito, neʼe ko he meʼa fakafiafia tamatou sisio ki te ʼu fua ʼo te gāue ʼaia ʼaē ʼe ina faka maʼuhigaʼi pea mo faka kolōliaʼi ia Sehova.”

Koia, ʼi te temi nei mokā fehuʼi e he tahi ʼo te kolo ʼo Beira, “ ʼE tuʼu koa ʼifea tokotou ʼēkelesia?” ʼe taki e te kau Fakamoʼoni ʼa Sehova ia ia ki he Fale ʼo te Puleʼaga ʼi te ʼu fale foʼou ʼaia e lua, pea ʼe nātou tali fakafiafia age fēnei, “Ko tomatou ʼēkelesia ʼe tuʼu ʼi te ala International Road, Avenida Acordo ʼo Lusaka, ʼo haga ki te fale polisi.” Kae ʼe nātou fakahā lelei age “ ʼe mole ko he ʼēkelesia. ʼE ko te Fale ʼo te Puleʼaga!”

[Mape/Paki ʼo te pasina 20]

AFELIKA

Mozambique

Beira

Maputo

[Haʼuʼaga ʼo te paki]

Map: Mountain High Maps® Copyright © 1995 Digital Wisdom, Inc.