Ko Ai ʼAē ʼe Tukugakoviʼi ʼi Te Tau?

ʼE TONU koa ke tukugakoviʼi te ʼAtua ʼo ʼuhiga mo te ʼu tau ʼaē neʼe fai e te tagata? “Kailoa, ʼe mole fia fai te ʼAtua ki te tau.” Ko te tali ʼaia neʼe fai ʼi te hili ʼo te Lua Tau Faka Malamanei, e te tagata ʼiloa ko Martin Niemöller, ko te takitaki lotu Polotesita ʼi Siamani. Ko tana ʼu palalau neʼe tā ʼi te taʼu 1946 ʼi te tohi faka Siamani Ach Gott vom Himmel sieh darein​—Sechs Predigten (Ê ʼAtua, Mamata Mai Te Lagi​—Ko Te Akonaki e Ono). ʼE ʼui fēnei e te tohi:

“Ko ia ʼaē ʼe ina fia tukugakoviʼi te ʼAtua [ʼo ʼuhiga mo te ʼu tau], ʼe mole ina ʼiloʼi ia, peʼe mole ina fia ʼiloʼi ia te Folafola ʼa te ʼAtua. ʼE mahino papau ia, ʼe ko he tahi ia meʼa mo kapau ʼe tonu ke tou ʼiloʼi peʼe kau tāfito koa te kau Kilisitiano peʼe kailoa ki te ʼu tau ʼaē ʼe hoko tuʼumaʼu. Pea ʼe mole feala ke tou hāo feiā mai te faʼahi ʼaia. . . . Tahi ʼaē meʼa, ʼe feala ke tou fakamanatuʼi, ʼi te ʼu temi fuli, neʼe tali tuʼumaʼu e te ʼu lotu faka Kilisitiano ke nātou tapuakina te ʼu tau, te kau solia, mo te ʼu fana pea neʼe nātou faikole ʼaki he aga ʼe fakafeagai ki te aga Faka Kilisitiano, ke mamate tonatou ʼu fili lolotoga te ʼu tau. Ko te ʼu meʼa fuli ʼaia, ʼe ko tatatou hala pea ko te hala ʼa tatatou ʼu kui, kae ʼe mole ko te hala ia ʼa te ʼAtua. Pea, ia ʼaho nei, ko tatou Kilisitiano ʼe tou ufiufi mokā tou manatuʼi te toko lauʼi teau mo afe hahaʼi ʼaē neʼe ʼui ʼe ko he magaʼi lotu, pea neʼe nātou ako fakamalotoloto te Tohi-Tapu [ko te kau Fakamoʼoni ʼa Sehova], pea neʼe nātou ʼolo ki te ʼu lotoʼā fakamamahi, pea neʼe nātou mamate koteʼuhi neʼe mole nātou fia kau ki te tau pea mo tāmateʼi te tahi ʼu hahaʼi.”

Ia ʼaho nei, hili kiai taʼu e 50 ʼi te kua ʼosi ʼo te Lua Tau Faka Malamanei, ko te ʼu palalau ʼa Niemöller ʼe ko te ʼu palalau ʼe feala ke fakakaukauʼi e te hahaʼi ʼaē ʼe manako ki te tokalelei. Kailoa, ʼe mole feala ke tou tukugakoviʼi te ʼAtua ʼo ʼuhiga mo te ʼu ligi toto ʼaē neʼe fakahoko e te ʼu puleʼaga! Koia, ʼaki tana kau atolasio moʼoni, ʼaē ʼe mole nātou kau ki te ʼu tau ʼo te malamanei, ʼe fakahā e te ʼAtua kua fakaōvi mai te fakaʼosi ʼo te ʼu tau fuli.​—Pesalemo 46:9; Soane 17:⁠16.

[Haʼuʼaga ʼo te paki pasina 32]

USAF photo