Ko Te Tahi Mālo Maʼa Te Kau Fakamoʼoni ʼa Sehova ʼi Kelesi

ʼI TE ʼaho 6 ʼo ʼOketopeli 1995, neʼe fakamāu te ʼu minisi katoa e lua ʼo te kau Fakamoʼoni ʼa Sehova, e te ʼu tuʼi Fakamāu e toko tolu ʼi te Telepinale ʼo Ateni. Ko te tukugakoviʼi neʼe fai kia nāua, neʼe ʼui ʼe nā fakamaliu te hahaʼi mai tanatou lotu, pea ʼe fakamāuʼi nāua, he neʼe tala nāua e te polisi, neʼe nā fai faka mafola ki ai ʼi tona ʼapi.

Ko te ʼu fehuʼi ʼaē neʼe fai e te fafine fai fakamāu neʼe fakahā ai tana fia ʼiloʼi ia te gāue ʼa te kau Fakamoʼoni ʼa Sehova. Ohage la, neʼe ina fehuʼi age: “Kua fualoa takolua kau ki te gāue ʼaia ʼe koulua fai? Neʼe gaohi feafeaʼi koutou e te hahaʼi lolotoga te ʼu taʼu? Koteā te aga ʼa te hahaʼi ʼo ʼuhiga mo takotou gāue? Koteā koa te ʼu meʼa ʼaē ʼe koutou ʼui ki te hahaʼi mokā koutou ʼolo ki tonatou ʼu ʼapi?” Ko nātou fuli ʼaē neʼe nonofo ʼi te telepinale, neʼe nātou fakalogo fakalelei ki te ʼu tali ʼaē neʼe fai e te ʼu Fakamoʼoni ʼa Sehova.

Neʼe punamaʼuli te ʼu Fakamoʼoni ʼa Sehova, he neʼe lagolago kia nāua te tuʼi fakamāu ʼaē ʼe ina fakafofoga te puleʼaga. Neʼe ina ʼui fēnei ʼi tana ʼu palalau fakaʼosi: “Ko te lao ʼe mole gata pe ʼi tana fakagafua ki te kau Fakamoʼoni ʼa Sehova ke nātou tui pea mo nātou tauhi ki tonatou ʼAtua, kae ʼe ina toe fakagafua foki ke nātou faka mafola tanatou tui ʼi te ʼu ʼapi, mo te ʼu koga meʼa ʼaē ʼe feʼoloʼaki ai te hahaʼi, pea mo te ʼu ala, ʼo nātou tufa faʼifaʼitaliha tanatou ʼu tohi mo kapau ʼe nātou loto kiai.” Neʼe talanoa te tuʼi fakamāu ʼaia ki te ʼu tonu kehekehe ʼaē neʼe fai e te telepinale pea mo te Fono ʼo te Puleʼaga. Neʼe toe talanoa ki te meʼa ʼaē neʼe hoko ʼi te fakamāu ʼaē neʼe fai kia Kokkinakis ʼi Kelesi, ʼaē neʼe lagolago ai te Telepinale ʼo Eulopa ʼo ʼUhiga Mo Te ʼĀteaina ʼo Te Hahaʼi ki te kau Fakamoʼoni ʼa Sehova.a Neʼe fakatokagaʼi fēnei age e te tuʼi fakamāu ʼaia, “Koutou manatuʼi neʼe totogi te tūʼa e te puleʼaga ʼo Kelesi ʼi te fai fakamāu ʼaia. Koia ʼe tonu ke tou tokakaga mokā tou fakamāuʼi te ʼu hahaʼi ʼaenī. ʼI tona fakahagatonu, neʼe mole tonu ia ke tou fakamāuʼi te ʼu hahaʼi ʼaenī talu mai te kamata ʼo te telepinale.”

ʼI te ʼosi palalau ʼa te tuʼi fakamāu, neʼe mole kei ʼaoga ke lahi te ʼu palalau ʼa te avoka ʼa te ʼu Fakamoʼoni ʼa Sehova ʼo ʼuhiga mo te tukugakovi ʼaia. Kae neʼe ina fakaʼaogaʼi te faigamālie ʼaia moʼo fakahā ko te tapuʼi ʼo te fakamaliu ʼo te hahaʼi ki he tahi lotu, ʼe mole ʼalutahi ia mo te lao, pea neʼe ko he mele ʼo Kelesi ʼi te malamanei katoa.

Neʼe sioʼi e te fafine fai fakamāu te ʼu tuʼi fakamāu e lua, pea neʼe nātou lototahi ʼo faka ʼāteaina te tēhina pea mo te tuagaʼane. Ko te fakamāu ʼaia ʼaē neʼe fai ʼi te hola katoa pea mo minuta e hogofulu, neʼe ko he mālo ʼaia ki te huafa ʼo Sehova pea mo tana hahaʼi.

Ko te tuʼa fā ʼaia ʼo te faka ʼāteaina ʼo he kau Fakamoʼoni ʼa Sehova e te Telepinale ʼo Eulopa ʼo ʼUhiga Mo Te ʼĀteaina ʼo Te Hahaʼi, ohage ko te meʼa ʼaē neʼe hoko kia Kokkinakis. ʼE fiafia te kau Fakamoʼoni ʼa Sehova ʼo Kelesi, ʼi te kua fakatokatoka ʼo te fihifihia ʼaia ʼaē ko te mole fakagafua ʼo tanatou fai faka mafola, pea kua feala ke hoko lelei atu te gāue.

[Nota ʼi te lalo pasina]