Ko Ai Te Pule?
“KO AI ʼaē ʼe ina puleʼi te malamanei?” Kapau ʼe fai atu te fehuʼi ʼaia, koteā anai takotou tali? ʼE ʼui anai e te tokolahi ʼo te hahaʼi lotu, ko te “ ʼAtua” peʼe ko “Sesu.” Ko te alatike ʼaē neʼe fakahā ʼi te The Freeport News, te nusipepa ʼo Bahamas, neʼe ina fai te tali neʼe mole ʼamanaki kiai te tokolahi.
ʼE kamata fēnei te fakamatala ʼa te fafine ʼaē neʼe ina tohi te alatike ʼaia, “Neʼe ʼau maʼu te kiʼi pepa lotu ʼi toku muʼa matapā. ʼI te agamāhani, ʼe mole ʼau lau te taʼi pepa ʼaia, kae ʼi te moʼi lakaga ʼaia neʼe ʼau fakatotonu ke ʼau lau. Ko te kupu tāfito neʼe ina lagaʼi te fehuʼi ʼaenī, ‘Ko ai koa te ʼu pule ʼo te malamanei?’ ” ʼI tana lau te kiʼi pepa lotu ʼaia ʼaē ʼe fakatafito ki te Tohi-Tapu, neʼe fakatokagaʼi e te fafine ko te pule ʼo te malamanei ʼe mole ko te ʼAtua pea mo Sesu, kae ko Satana te Tevolo.—Soane 12:31; 14:30; 16:11; 1 Soane 5:19.
ʼE fakamahino fēnei e te kiʼi pepa ʼaia: “Tou fakatokagaʼi age muʼa te lahi ʼo te ʼu fakapō fakamataku. Neʼe fakaʼaoga e te tagata te ʼu kogafale kasa, te ʼu lotoʼā fakamamahi, te ʼu fana ulo, te ʼu pulu tu fenua, pea mo ʼihi age faʼahiga meʼa moʼo matematehi ai te hahaʼi. . . . Ko ai koa te mālohi ʼaē ʼe ina taki te ʼu hahaʼi pea mo gaohi te ʼu faʼahiga meʼa ke nātou fai ai he ʼu toe fakapō feiā? ʼE mole koutou punamaʼuli anai koa mokā ko he mālohi fakapulipuli mo agakovi ʼe ina uga te hahaʼi ke nātou fai te ʼu agamālohi ʼaia?” ʼE fakapunamaʼuli koa te fakahigoaʼi e te Tohi-Tapu ia Satana ko “te ʼatua ʼo te ʼu faʼahiga meʼa ʼo te tuʼu ʼaenī”?—2 Kolonito 4:4.
Ko he meʼa fakafiafia heʼe kua fakaōvi mai te temi ʼaē ka pulihi ai anai ia Satana pea mo tana ʼu temonio. “ ʼE mole te malamanei pea mo tona loto, kae ko ʼaē ʼe ina fai te finegalo ʼo te ʼAtua ʼe nofo maʼu ia ʼo talu ai.” (1 Soane 2:17) Ei, ʼe fakapapau mai e te Tohi-Tapu ko nātou ʼaē ʼe nātou fai te finegalo ʼo te ʼAtua, ʼe nātou maʼu anai te ʼamanaki ʼaē ko te maʼuli ʼo heʼegata ʼi he malamanei foʼou mo faitotonu. (Pesalemo 37:9-11; 2 Petelo 3:13; Fakahā 21:3, 4) ʼE ko he meʼa fakafimālie te pulihi ʼo te mālohi ʼo Satana pea mo tana ʼu temonio!
ʼI tana ʼosi fakamatala fakanounou te ʼu manatu ʼo te kiʼi pepa lotu ʼaia, pea neʼe fakaʼosi fēnei te fakamatala ʼa te fafine ʼaē neʼe ina tohi te alatike ʼi te The Freeport News: “ ʼE ʼau fiafia ʼaupito ʼi taku lau te kiʼi pepa lotu ʼaia . . . he neʼe ʼau tuʼania foki mo ʼau ʼo ʼuhiga mo te ʼaluʼaga ʼo te malamanei, pea mo ʼau fia ʼiloʼi pe ko ai ia ia ʼaē ʼe ina puleʼi.”