Ko Te Fakatahi ʼAē e Taʼu 403 ʼe Tau Mo Te Fihifihia
ʼI SUÈDE, ko te ’Ēkelesia pea mo te Puleʼaga neʼe nā felogoi lelei talu mai ia taʼu e 400 tupu. Kae ʼe vaivai ʼi te temi nei te ʼu felogoi ʼo te puleʼaga pea mo te lotu.
Ko te luthéranisme neʼe fakatuʼu ko te lotu faka Puleʼaga ʼi te 1593, pea ko te kau Suédois fuli neʼe tonu ke papitemaʼi nātou ʼi te lotu ʼaia. Hili kiai ni ʼu taʼu, ʼi te ʼu taʼu 1850, neʼe fai ai te ʼu fetogi. Neʼe mole kei maʼua ki te kau Suédois ke nātou papitema; kae neʼe kei nātou kau ki te ’Ēkelesia Luthérienne. Koia, neʼe tonu ke nātou foaki te koga e 1 ʼi te teau ʼo te falā ʼaē neʼe nātou maʼu pea mo toʼo mai ai te tukuhau, moʼo lagolago ki te ʼēkelesia pea mo totogi te ʼu meʼa ʼaē neʼe fai e te ʼēkelesia maʼa te hahaʼi fuli. ʼE mole heʼeki faʼa fualoa, neʼe hoko te tahi fetogi. Talu mai te 1952, ʼo mulimuli ki te lao, kua feala ki te kau Suédois ke nātou mavae ʼi tanatou lotu, pea ʼe mole kei maʼua kia nātou ke nātou totogi te koga lahi ʼo te tukuhau ʼaē ʼe totogi ki te ʼēkelesia.
ʼI te ʼu taʼu ʼaenī, neʼe puli māmālie te mālohi ʼo te ’Ēkelesia luthérienne ʼi Suède. Neʼe mole feala ke tāʼofi te hoko ʼo te meʼa ʼaia, koteʼuhi ko te toko 10 ʼi te teau ʼo te hahaʼi ʼo Suède ʼe ko te kau matāpule, pea ʼe mole nātou luthériens, kae ʼe toe kau ki ai mo te kau Sutea, te kau Katolika pea mo te kau Mahometa. Koia ʼi te kamata ʼo te 1996, ko te toko 86 ʼi te teau ʼo te kau Suédois neʼe nātou kau ki te ’Ēkelesia Luthérienne, pea kua fakahaʼuhaʼu ʼo tokosiʼi te hahaʼi ʼaia.
Kua fakaʼāsili lahi te lotonoa ʼa te hahaʼi ʼi te faʼahi faka lotu, pea ʼe tupu ʼaki ai te mavetevete ʼo te ’Ēkelesia pea mo te Puleʼaga. Neʼe kua ʼosi ʼui ʼe mole kei fakamaʼua ki te hau ke kau ki te lotu luthérienne, pea ko te ʼu fānau ʼa he tahi ʼe luthérien ʼe mole nātou kau ki te ’Ēkelesia Luthérienne ʼo te Puleʼaga ʼi tanatou tupu. Tahi ʼaē meʼa, ohage ko te ʼui ʼa te nusipepa The Dallas Morning News, ʼi te taʼu 2000 “ ʼe tonu anai ki te ʼu ʼēkelesia ʼo te ʼu kolo pea mo te puleʼaga ke nātou fakafuafua te lahi ʼo tonatou ʼu koloā pea mo nātou vaevae. Ko te ʼēkelesia ʼe tonu anai ke ina fakasiʼisiʼi te 168 miliale falā ʼaē neʼe fakatuʼutuʼu ke ina fakaʼaogaʼi ʼi te taʼu katoa, pea ko te koga lahi ʼo te falā ʼaia ʼe tānaki ʼaki te ʼu tukuhau.” ʼI te fakaʼosi ʼo te sēkulō ʼaenī, ʼe hinoʼi tonu anai e te ʼēkelesia tana ʼu ʼēpikopō.
Ko te Keletiate ʼe tau mo te lotonoa ʼi te faʼahi faka lotu pea ko te tokosiʼi ʼe nātou kau kiai, kae ʼe haga tuputupu aipe te kau Fakamoʼoni ʼa Sehova ʼi Suède. Ko te tohi Lʼannuaire des Témoins de Jéhovah 1997, ʼe ina fakamatala ai ko te ʼu kaugā fai faka mafola ʼo te Puleʼaga ʼa te ʼAtua ʼi te fenua ʼaia ʼe toko 24 487, pea ʼe teitei toko 10 ʼi te teau ia nātou ʼaē ʼe nātou gāue pionie, ʼo fai faka mafola ʼi te temi katoa. Ko te tokolahi ia nātou ʼaia ʼe nātou fia maʼu te ʼu pilivilesio ʼe lahi age ʼi te selevisi pionie. Ohage la, ʼi te ʼu fakatahi faka tisitilike ʼa te kau Fakamoʼoni ʼa Sehova ʼi te 1995, ko te ʼu taumatuʼa e toko 20 neʼe nātou kole ke nātou kau ki te ako faka misionea ʼi te Faleako Faka Tohi-Tapu ʼo Kalaate. ʼI te temi ʼaia, ʼe ko te toko 75 ʼo te ʼu misionea Suédois ʼaē neʼe kau ki te ako ʼaia, pea ʼe kei nātou kau ʼi te gāue faka misionea ʼaē ʼe fai ʼi te ʼu potu kehekehe ʼo te malamanei. ʼE mahino ia, ko tanatou faʼifaʼitaki lelei, mo tanatou ʼu tohi fakaloto mālohi pea mo tanatou ʼu ʼaʼahi, ʼe ko he meʼa fakaloto mālohi kia nātou ʼaē ʼe nātou fakakaukau ke nātou kau ki te pilivilesio lahi ʼaia.
Koia, ko te toko lauʼi miliona hahaʼi ʼi te Keletiate ʼe nātou lotovaivai ʼuhi ko te mamahi ʼo tonatou loto, kae ko te kau Fakamoʼoni ʼa Sehova “ ʼe nātou kalaga fakafiafia ʼuhi ko te lelei ʼo tonatou loto.”—Isaia 65: 13, 14.
[Mape ʼo te pasina 30]
Suède