ʼE Pulihi Anai Koa Te ʼu Meʼa ʼAē ʼe Hā ʼi Te Paki ʼAenī?

TATAU aipe pe kofea ʼaē ʼe tou ʼolo kiai ʼi te ʼu ʼaho ʼaenī, ʼe tou sio ki te tokakovi, te maveuveu pea mo te ʼu tau. Kae ko te fakatuʼutuʼu ʼo te nusipepa ʼaenī ʼe mole ko te fakamatala ʼo te ʼu logo kovi ʼaē kua koutou ʼiloʼi. Kae ko te nusipepa makehe ʼaenī ʼe ina fakahā atu anai te ʼu moʼoni e lua ʼe fakaloto fīmālie. ʼUluaki, ko te ʼu lea faka polofeta ʼāfea ʼo te Tohi-Tapu, neʼe nātou fakakikite te tuʼuga meʼa kovi pea mo fakaofoofo ʼaē ka hoko ʼi totatou temi; lua, ko te tohi faka polofeta ʼaia ʼe ina fakakikite te temi ʼaē ka pulihi ai te ʼu meʼa ʼaē ʼe hā ʼi te paki ʼaenī. ʼE mole toe ʼi ai anai he ʼu tau. ʼE pulihi anai te ʼu fakapō ʼaē ʼe fai ʼaki te ʼu foʼi pulu, te ʼu fana, te ʼu foʼi pulu ʼaē ʼe tanu fakafūfū ʼi te kele, pea mo te ʼu fai fakapō fakamataku. ʼE mole toe ʼi ai anai he fānau ʼe hala mo tāmai pea mo faʼe ʼe nātou loto tuʼania, pea ʼe mole toe ʼi ai anai he ʼu hahaʼi ʼe feholaki mai tonatou fenua pea ʼe mole honatou ʼapi. Ko te tokalelei moʼoni pea mo te fakaloto fīmālie ʼe maʼu anai ʼi te malamanei ʼaē ka haʼu. ʼE koutou fia sio koa ki te temi ʼaia? ʼE mātou fakaloto mālohiʼi koutou ke koutou vakaʼi pe koteā te ʼu meʼa ʼaē ʼe fakahā e te Tohi-Tapu. ʼE feala ke koutou maʼu ai te fakaloto fīmālie ʼaē neʼe mole koutou ʼamanaki kiai.