Ka ʼOlo Atu Te Kau Fakamoʼoni ʼa Sehova Ki Tokotou ʼApi
Koteā te meʼa ʼaē ʼe tonu ke fai e te kau Katolika mokā ʼaʼahi tonatou ʼapi e he Fakamoʼoni ʼa Sehova? Ko te kaupepa foʼou ʼaē neʼe fai e te Pilō ʼo te Fai Kapite ʼo te Fono ʼo te Kau ’Ēpikopō Italia, neʼe ina ʼui fēnei: “Ka kita fakafisi ki te fai palalau, ʼe mole faka ʼuhiga leva ʼe mole kita manavaʼofa, mo kapau ʼe kita agalelei, tatau aipe peʼe fai ʼaki he loto mālohi.”
Kae ʼe mole ʼio fuli te kau Katolika ki te faʼahi ʼaia, ohage ko tona hā ʼi te tohi ʼaenī ʼaē neʼe fai ki te nusipepa Gazzetta del Mezzogiorno, e te tagata ʼe nofo ʼi Foggia ʼi Italia:
“ ʼE mole ʼau kau ʼi te kau Fakamoʼoni ʼa Sehova. ʼE ʼau Katolika. Kae ʼe ʼau punamaʼuli ʼi te ʼu lekula ʼaē ʼe fakamaʼua e te ʼēkelesia ki tana hahaʼi tauhi, ʼi tana ʼui age ʼaē ke nātou ʼai ki tonatou ʼu matapā te ʼu pepa ʼe fakahā ai tanatou fakafisi ki te kau Fakamoʼoni ʼa Sehova. ʼI tona fakahagatonu, ʼe ʼave e te hahaʼi ʼaia te Folafola ʼa te ʼAtua pea mo nātou tokoni ki te hahaʼi ke nātou fakatuputupu tanatou mahino ki te Tohi-Tapu. ʼE ʼau manatuʼi te temi ʼaē neʼe tō ai ʼi Italia te taʼi mahaki ʼaē ko te choléra, pea neʼe foaki mai kia tatou te ʼu tokoni ʼo ʼuhiga mo te faʼahiga tauʼi ʼo te mahaki ʼaia.
“ ʼI taku manatu, ʼe fakahā mai e te faʼahi ʼaia, ko te ʼēkelesia ʼe ina fai tana ʼu fakatotonu ʼo ina meʼa noaʼi te ʼu meʼa ʼaē ʼe loto kiai tana hahaʼi tauhi. Kae ʼi te ʼu taʼu ʼaenī neʼe ʼau sio, māʼiape la mo te kau Katolika ʼe nātou ʼolo ʼi te ʼu ʼapi, ʼo nātou toe ʼaʼahi foki mo te ʼu ʼapi ʼo te kau Fakamoʼoni ʼa Sehova, pea neʼe nātou fakaafe nātou ke nātou fehūfi age ki fale, ʼo nātou fai palalau mo nātou, pea mole nātou fakafisi ki he tahi.”
ʼE mole fakakinauʼi e te kau Fakamoʼoni ʼa Sehova te hahaʼi ke nātou tali tanatou logo. Kae ʼe nātou faiga ke nātou vaevae mo te hahaʼi te ʼamanaki ʼaē ʼe tuʼu ʼi te Folafola ʼa te ʼAtua, ʼi tanatou mahino ʼaē ko te logo ʼaia ʼe fakaloto fīmālie ʼi te ʼu temi maveuveu ʼaenī. ʼI tanatou ʼolo ʼi te ʼu ʼapi pea mo tanatou palalau mo te hahaʼi ʼaē ʼe nātou felāveʼi mo nātou ʼi te ala, ʼe fakahā ai e te kau Fakamoʼoni ʼa Sehova te logo lelei ʼo te Puleʼaga ʼa te ʼAtua kia nātou ʼaē ʼe nātou fia logo kiai.—Mateo 24:14; Gāue 5:42; 17:17.