Neʼe Nātou Lotomālohi ʼi Te ʼu Fakataga ʼAē Neʼe Fai e Te Kau Nasi
KO TANATOU nonofo agatonu pea mo tanatou mole matataku, ʼa te kau Fakamoʼoni ʼa Sehova ʼi te Siamani Nasi, neʼe hā lelei ai tanatou kehekehe mo te ʼu ʼēkelesia ʼo te Keletiate. Neʼe fakatokagaʼi te faʼahi ʼaia e te polofesea fai hisitolia ko John Weiss, ʼi tana tohi Ideology of Death. ʼE ina tohi fēnei:
“ ʼI te taʼu 1934, neʼe fakakinauʼi e te Lotu Polotesita ke ‘tali lelei [te kau Nasi] e te hahaʼi ʼa te lotu ʼo Luther,’ pea neʼe fakafetaʼi ki ‘te ʼAtua ʼAliki’ ʼi tana foaki ki te kau Siamani he ‘tuʼi ʼe aga faka lotu pea mo tau mo te falala.’ . . . Neʼe tohi fēnei e te ʼēpikopō Polotesita ki tona ʼēkelesia, ‘Neʼe fekauʼi mai e te ʼAtua ia [Itilele].’ ” ʼE toe ʼui fēnei e Weiss: “Ko te ʼēkelesia Méthodiste Siamani . . . neʼe manatu tahi mo te ’Ēpikopō ko Dibelius, ʼaē neʼe ko Itilele ʼaē neʼe ina hāofaki ia Siamani mai te agatuʼu faka Bolchevique ʼaē neʼe feala ke hoko, neʼe ina foaki te tokalelei mo te mālohi . . . Neʼe fakatokagaʼi e te lotu Mormon tana hahaʼi, ko te fakafeagai kia Itilele neʼe ko he maumauʼi ʼo te lao faka Mormon.” Pea neʼe ina toe ʼui fēnei: “Neʼe ʼui ki te kau Katolika neʼe ko he maʼua taputapu te fakalogo ki te puleʼaga foʼou ʼaia, ko he maʼua ʼe mole pulihi anai, logope la te kua ʼiloʼi e te Keletiate te ʼatu meʼa fakalialia ʼaē neʼe fai ʼi te potu hahake.”
Kae neʼe feafeaʼi ki te kau Fakamoʼoni ʼa Sehova? Neʼe fakahā e te Polofesea ko Weiss “ ʼi tonatou ʼuhiga kūtuga faka lotu, neʼe ko te kau Fakamoʼoni ʼa Sehova tokotahi pe ʼaē neʼe nātou fakafeagai ki te kau Nasi.” ʼE toe ʼui e te Polofesea ko Weiss ko te lauʼi afe ia nātou neʼe pilisoniʼi, “kae neʼe feala pe ke faka ʼāteaina te ʼu Fakamoʼoni fuli ʼaē neʼe ʼave ki te ʼu lotoʼā fakamamahi, mo kapau neʼe nātou sinie te pepa ʼaē ʼe fakahā ai tanatou fakafisi ki tanatou lotu.”
ʼO ʼuhiga mo te nofo agatonu ʼa te kau Fakamoʼoni ʼa Sehova, ʼe ʼui fēnei e te Polofesea ko Weiss: “ ʼE fakahā e tanatou faʼifaʼitaki te mālohi ʼo tanatou fakapapau pea mo tanatou lototoʼa ohage ko te lototoʼa ʼaē neʼe maʼu e te Lotu Faka Kilisitiano ʼi tona kamataʼaga, ʼi muʼa ʼo tana fakatuʼu te ʼu lekula pea mo kau ki te ʼu meʼa ʼo te sosiete, ʼo puli ai tana holi ʼaē ke mole ina fai he aga fakahehema. Ohage ko tona tohi e te pasitea Polotesita ʼo ʼuhiga mo nātou ʼaia, ‘Ko te hahaʼi ʼaia ʼaē neʼe laukoviʼi pea mo vāʼi, kae mole ko te ʼu lotu fuli, neʼe ko nātou ʼaē neʼe nātou ʼuluaki fakafeagai ki te ʼita lahi ʼo te kau Nasi, pea mo nātou lototoʼa ke nātou tauʼi te aga fakahehema, ʼo nātou mulimuli ki tonatou tui.’ ”