Ko Te Kau Faka Mafola ʼo Te Puleʼaga ʼe Nātou Fakamatala
Te Mālohi Fakamaʼa ʼo Te Folafola ʼa Te ʼAtua
ʼE ʼUI ko nātou ʼaē ʼe nātou fakaʼaogaʼi te toloke ʼe nātou toe toloke ʼi tanatou ʼosi mavae mai te ʼu fale mahaki ʼaē ʼe faiga ke faitoʼo ai nātou. Kae ko te Folafola ʼa te ʼAtua, ʼe feala tana fai te ʼu meʼa ʼaē ʼe mole feala ki te hahaʼi ʼo te ʼu fale mahaki ke nātou fai. (Hepeleo 4:12) Ko te tokolahi neʼe tokoni kia nātou te laumālie pea mo te Folafola ʼa te ʼAtua, ke nātou hāo mai te toloke pea mo muliʼi te tokoni ʼaenī: “Tou fakamaʼa ia tatou mai te ʼu meʼa ʼuli fuli pe ʼo te kakano pea mo te laumālie, ʼo fakakatoa te maʼoniʼoni ʼi te manavasiʼi ki te ʼAtua.”—2 Kolonito 7:1.
ʼE ʼi ai tona faʼifaʼitaki neʼe hoko ʼi te fenua ko Myanmar. Ko te tagata neʼe faiga mālohi lolotoga ni ʼu taʼu ke ina tuku tana fakaʼaogaʼi te toloke, pea ʼe ina fakamatala fēnei: “Neʼe ʼau kamata fakaʼaogaʼi te toloke ʼi toku kei tūpulaga. Neʼe tuʼa lahi taku faiga ke ʼau hāo mai te toloke, kae neʼe mole hona fua. Ke feala haku totogi te toloke ʼaē neʼe ʼau fakaʼaogaʼi, neʼe ʼau liliu ko te tagata kaihaʼa. Ko te meʼa ʼaē neʼe hoko ai, neʼe pilisoniʼi ʼau ʼi te taʼu 1988 lolotoga te taʼu katoa.
“ ʼI taku ʼosi mavae mai te fale pilisoni, neʼe ʼau toe fetaulaki mo toku ʼu kaumeʼa ʼāfea. Neʼe mole tuai, pea neʼe ʼau toe fakaʼaogaʼi te toloke. Ko toku faʼahiga maʼuli fakatupu tuʼutāmaki ʼaia neʼe tupu ʼaki ai toku līaki e toku ʼu kāiga. Tahi ʼaē meʼa, ʼuhi ko toku maʼuli agakovi ʼaia, neʼe matataku ai te tokolahi ia ʼau, pea ʼo toe feiā mo nātou, neʼe nātou līaki ʼau.
“Pea ʼi te tahi ʼaho, neʼe hoko kia ʼau te meʼa ʼaē ʼe tau hoko kia nātou ʼaē ʼe nātou fakaʼaogaʼi te toloke—neʼe lahi fau te toloke ʼaē neʼe ʼau toʼo. Neʼe toe ʼave ʼau ki te fale pilisoni ke ʼau nofo ai ia taʼu e tolu. Logope la neʼe faigataʼa ʼaupito te maʼuli ʼi te fale pilisoni, kae neʼe ʼau kātakiʼi te ʼaluʼaga ʼaia.
“ ʼI taku ʼosi mavae mai te fale pilisoni, neʼe ʼau toe liliu ki fale, pea neʼe ʼau kole age ki toku famili ke fakamolemole mai kia ʼau ʼi te ʼu hala ʼaē neʼe ʼau fai ki muʼa atu. ʼAki he lotoʼofa, neʼe nātou tali ʼau ʼi fale, kae ʼaki te temi, ko toku ʼu kaumeʼa neʼe nātou uga ʼau ke ʼau toe liliu ki toku faʼahiga maʼuli ʼāfea.
“Ko te meʼa ʼaē neʼe fai e taku kui fafine, neʼe ina fekauʼi ʼau ki te patele ʼo te kolo ke ʼau ako ai te Tohi-Tapu. Neʼe tali e te patele te faʼahi ʼaia. Kae ia muʼa ʼo taku ʼalu ki te ako ʼaia, ko te tokolua ʼo taku tāmai ʼaē ko te Fakamoʼoni ʼa Sehova, neʼe ina ʼui mo kapau ʼe ʼau loto moʼoni ke ʼau ako te Tohi-Tapu, pea ʼe tonu ke ʼau ako mo te kau Fakamoʼoni.
“Neʼe ʼau ʼalu ki te Fale ʼo te Puleʼaga pea neʼe ʼau fai palalau mo te tagata neʼe lotolelei ke ina ako kia ʼau te Tohi-Tapu. Ko nātou ʼaē neʼe kau ki te fono ʼaia neʼe nātou ʼalofa fakamalotoloto mai kia ʼau pea mo nātou fakahā mai he ʼofa moʼoni.
“ ʼI taku kamata ako te Tohi-Tapu pea mo kau ki te ʼu fono faka Kilisitiano, ko taku holi mālohi ki te toloke neʼe fetogi ʼaki te holi ʼaē ke ʼau fakaōvi ki te ʼAtua. Hili kiai te taʼu katoa, neʼe ʼau tuputupu ʼi te faʼahi fakalaumālie pea neʼe ʼau foaki ai toku maʼuli kia Sehova ʼAtua, pea mo ʼau papitema.
“Mole heʼeki faʼa fualoa, ʼi taku ʼalu ʼo faka mafola ʼi te ʼu ʼapi, neʼe ʼau felāveʼi mo toku kaumeʼa ʼāfea neʼe ina fakaʼaogaʼi te toloke. Neʼe punamaʼuli ki te ʼu fetogi fakaofoofo ʼaē neʼe ʼau fai ʼi toku maʼuli. Neʼe ʼau faka mafola kia ia, pea neʼe ʼau fakahā kia ia te ʼamanaki ʼo te Puleʼaga.
“ ʼI te temi nei, kua ʼau maʼu te fakatuʼutuʼu pea mo te faka ʼuhiga moʼoni ʼo toku maʼuli. ʼAki te tokoni ʼa Sehova pea mo tana Folafola, ʼe feala ʼi te temi nei ke ʼau tokoni ki ʼihi ke nātou hāo mai te aga fakatupu lotomamahi ʼaē ko te fakaʼaogaʼi ʼo te toloke.”