Ko He Mālama Moʼo Takitaki ʼo Koutou ʼi Te Ala ʼo Te Maʼuli
ʼE ʼAU ʼiloʼi pe, Ê Sehova, ko te tagata ʼaē neʼe toʼo mai te kele ʼe mole ʼa ia tona ala. ʼE mole ʼa te tagata ʼaē ʼe haʼele te takitaki ʼo tana haʼele.” (Selemia 10:23) ʼAki te ʼu palalau ʼaia neʼe fakahā ai e te polofeta ko Selemia ʼe mole feala ke fua lelei te takitaki ʼa te tagata tona ala mo kapau ʼe mole ina maʼu he tokoni. ʼE maʼu koa ʼifea te tokoni ʼaia? ʼE tali fēnei e te tagata fai pesalemo ʼi tana faikole kia Sehova ʼAtua: “Ko tau folafola ʼe ko he mālama ki toku vaʼe, pea ʼe ko he mālama ki toku ala.”—Pesalemo 119:105.
Ko nātou ʼaē ʼe nātou fakatuʼutuʼu ke nātou ako te Folafola ʼa te ʼAtua, te Tohi-Tapu, pea mo nātou maʼuliʼi te ʼu meʼa ʼaē ʼe ina ʼui mai, ʼe nātou hage anai ko he tahi ʼe kamata gāue ʼi he ʼaho ka kei hegihegi. ʼI te kamata, ʼe mole feala tana sio koteʼuhi ʼe fakapōʼuli. Kae ʼi te kamata tuʼu ʼo te laʼā, ʼe feala ai ke sio lelei. Pea ʼe gigila te laʼā mai ʼoluga. Pea sio ia ki te ʼu meʼa fuli kua mālama lelei. Ko te taʼi fakatā ʼaia ʼe ina fakamanatuʼi mai te tāʼaga lea faka Tohi-Tapu ʼaenī: “Kae ko te ala ʼo te kau faitotonu ʼe hage ko te mālama ʼo te ʼaho ʼaē ʼe mafoa māmālie ʼo aʼu ki te katoa ʼo te mālama ʼo te ʼaho.”—Tāʼaga Lea 4:18.
E feafeaʼi koa ia nātou ʼaē ʼe nātou fakafisi ki te takitaki ʼa te ʼAtua? ʼE ʼui fēnei e te Tohi-Tapu: “Ko te ala ʼo te kau agakovi ʼe hage ko te fakapōʼuli; ʼe mole nātou ʼiloʼi te meʼa ʼaē ʼe nātou tūkia ai.” (Tāʼaga Lea 4:19) ʼIo, ko te kau agakovi ʼe nātou hage ko he tagata ʼe tūkia ʼi te fakapōʼuli. ʼO toe feiā pe mo te ʼu meʼa ʼaē ʼe nātou fai pea ʼe hage ʼe haʼele lelei faka temi pe ia, heʼe “mole ʼi ai he poto, he fakasiosio tonu, pea mo he tokoni ʼe fakafeagai kia Sehova.”—Tāʼaga Lea 21:30.
Koia, koutou mulimuli ki te takitaki ʼa te Folafola ʼa te ʼAtua, te Tohi-Tapu. Kapau ʼe koutou fai feiā, pea ʼe koutou tokagaʼi anai te moʼoni ʼo te ʼu palalau ʼaē ʼe tuʼu ia Tāʼaga Lea 3:5, 6: “Falala kia Sehova ʼaki tou loto katoa, pea ʼaua naʼa ke falala ki tou ʼatamai ʼo koe totonu. ʼI tou ʼu ala fuli tokagaʼi ia ia, pea ko ia, ʼe ina fakatonutonu anai tou ʼu ala foufou.”