Koteā Te ʼu Fakapapau ʼAē ʼe Feala Ke Koutou Falala Kiai?
ʼI TE taʼu 1893, neʼe maʼopoʼopo te kau tagata popoto e toko 74 ʼi te Fakahaoga faka malamanei ʼi Chicago, ke nātou fai palalau ʼo ʼuhiga mo te ka haʼu. (ʼE hā ʼi te paki ʼaē ʼi ʼoluga te koga meʼa ʼaē neʼe fai ai te lafeti ʼaia.) ʼI tanatou vakaʼi pe koteā te meʼa ʼaē ʼe feala ke hoko ʼi te ʼu taʼu e teau ka haʼu ʼo kamata mai te taʼu 1993, neʼe nātou fakakikite fēnei: “ ʼE tokolahi anai te hahaʼi ʼaē ka maʼuʼuli ia taʼu e 150.” “ ʼE pulihi anai te ʼu fale pilisoni pea ʼe mole toe ʼi ai anai he mavete ʼohoana.” “ ʼE lelei age anai te faʼahiga fakatuʼutuʼu ʼo te ʼu puleʼaga, koteʼuhi ʼe ko he puleʼaga ʼe lelei ʼaupito anai, pea mo faigafua age tona fakaʼaluʼalu.”
ʼO ʼuhiga mo te faʼahi ʼaia, neʼe fakakikite fēnei ʼi te tohi The Year 2000 ʼi te taʼu 1967: “ ʼI te taʼu 2000, ko te ʼu olotinatea ʼe nātou hage anai ko te tagata, ʼo nātou faʼifaʼitakiʼi anai ia nātou, pea lagi ʼe lelei age anai tanatou fakakaukau ʼi te fakakaukau ʼa te tagata, ʼo nātou maʼu te fealagia ʼaē ke nātou fakatupu he ʼu meʼa matalelei.” “ ʼE toe feala foki ke tou manatu, ʼi te taʼu 2000, ko he ʼu masini ʼe mole totogi kovi, ʼe nātou fai anai te menasi.”
Ko te mole feala ʼa te tagata ke ina tala fakatomuʼa te ʼu meʼa ʼo te ka haʼu, ʼe kehekehe ʼaupito mo te fealagia ʼa te ʼAtua ke ina fakahoko te faʼahi ʼaia. Ohage la, koutou vakaʼi te fakakikite ʼaē neʼe fai e te Tohi-Tapu kua hili kiai sēkulō e 20 ʼo ʼuhiga mo te hahaʼi ʼo totatou temi: “ ʼE liliu anai te hahaʼi ʼo tahi ʼofa pe kia te ia, ʼo mānumānu paʼaga, ʼo fiatuʼu, ʼo loto lahi, ʼo fasituʼu, ʼo talagataʼa ki ʼanatou mātuʼa, ʼo agavale, ʼo sakililesio, ʼo heʼeʼofa, ʼo loto fefeka, ʼo laukovi, ʼo maveuveu, ʼo kanivao, ʼo fehiʼa ki te lelei, ʼo kākā, ʼo hoko ʼoho, ʼo kivi ʼi te fialahi, ʼo manako ki te ʼu fiafia kae ʼe mole he ʼofa ki te ʼAtua; ʼo taupau te faʼahiga aga ʼa te lotu, kae kua nātou fakafisi ki tona mālohi.”—2 Timoteo 3:1-5.
Ko te lea faka polofeta ʼaia ʼa te Tohi-Tapu ʼo ʼuhiga mo “te ʼu ʼaho fakamuli,” ʼe ko he faʼifaʼitaki ʼaia ʼo te ʼu lea faka polofeta ʼaē kua hoko ʼi totatou temi. Neʼe fakakikite e te Folafola ʼa te ʼAtua ko “te fakaʼiloga” ʼo te ʼi henī ʼa Sesu, ʼe kau anai kiai mo te tau, te ʼu hoge, te ʼu mahaki, te ʼu mafuike, pea mo te faka mafola ʼo te logo lelei ʼo te Puleʼaga ʼa te ʼAtua ʼi te malamanei katoa.—Mateo 24:3-14; Luka 21:11.
Ko te hoko tuʼumaʼu ʼo te ʼu fakapapau ʼa te ʼAtua neʼe ina uga te tahi tagata faitohi ʼo te Tohi-Tapu ke ina fai te ʼu palalau ʼaenī, kua hili kiai ni ʼu sēkulō: “Neʼe mole tō noa he folafola ʼi te ʼu folafola lelei fuli ʼaē neʼe ʼui atu e Sehova, tokotou ʼAtua. Neʼe mole he folafola e tahi neʼe tō noa.”—Sosue 23:14.
Ei, ʼe feala hatatou tui papau, mole kei tuai pea ʼe hoko fuli anai te ʼu fakapapau ʼa te ʼAtua. Ko te Puleʼaga ʼa te ʼAtua ʼe ina fakagata anai te ʼu mahaki, te agamālohi, te fakaʼaogaʼi ʼo te toloke, te ʼu hoge pea mo te ʼu tau—ko te kele katoa ʼe liliu anai ko he palatiso. (Pesalemo 37:10, 11, 29; Fakahā 21:3, 4) Koutou falala ʼe hoko moʼoni anai te ʼu lea faka polofeta ʼaia! ʼE ko he ʼu fakapapau ʼo totatou Tupuʼaga, “ia ia ʼaē ʼe mole lohi.”—Tito 1:2; vakaʼi ia Hepeleo 6:13-19.
[Haʼuʼaga ʼo te paki pasina 32]
Cleveland State University Archive