Tou Fakahā Te ʼOfa Kia Nātou ʼAē ʼe Tau Mo Te ʼu Fihifihia
ʼE FAKAMAʼUA ki te kau Kilisitiano ke nātou ʼofa ki ʼonatou ʼu tēhina mo tuagaʼane ʼaē ʼe tau mo te ʼu fihifihia, pea ʼe ko he pilivilesio te fai ʼo te faʼahi ʼaia. (1 Soane 3:17, 18) Neʼe tohi fēnei e te ʼapositolo ko Paulo: “Tou fai ia te lelei ki te tagata fuape, kae tāfito ia te lelei ki te kāiga ʼo te tui.” (Kalate 6:10) Mole heʼeki faʼa fualoa, ko te tēhina kua taʼu fāgofulu tupu tana tauhi kia Sehova, neʼe fakahā ki ai he ʼofa lahi e te ʼu tēhina ʼo tona kokelekasio, ʼi te temi ʼaē neʼe mahaki ai tona ʼohoana pea neʼe mate ai. ʼE ina tohi fēnei:
“Mai tona ʼuhiga ʼaē neʼe ʼau nofo ʼi fale moʼo taupau toku ʼohoana ʼi te temi ʼaē neʼe mahaki ai, neʼe mole feala haku gāue ia māhina e lua. Neʼe ko he fakaloto fīmālie lahi, te temi ʼaē neʼe tokoni mai ai tomā ʼu kaumeʼa ʼi te kokelekasio kia māua! Neʼe lahi te falā neʼe foaki mai kia māua—pea neʼe tohi ʼi te ʼu sila ʼaē neʼe foaki mai, neʼe ko he falā ‘moʼo totogi ʼo te ʼu meʼa ʼaē neʼe ʼaoga’ kia māua—pea neʼe ʼaoga mo huʼi ʼaki te ʼu maʼua ʼo tomā ʼapi, mo te hila, te vai, pea mo te tahi ʼu meʼa ʼaē neʼe tonu ke ma totogi.
“Ia vāhaʼa e lua ʼi muʼa ʼo te mate ʼo toku ʼohoana, neʼe fai e te tagata taupau faka silikosikilipisio te ʼaʼahi neʼe fakaloto mālohi kia māua. Neʼe ina fakahā mai kia māua te ʼu paki ʼaē ka ina fakahā anai ʼi te fono ʼo te ʼAhotapu. Neʼe ma fakalogo ki te ʼu fono ʼaki te telefoni—ʼo kau ai mo te ʼu fono ʼaē neʼe fai e te tagata taupau ki te gāue faka mafola. ʼI te tahi fono, neʼe ina kole age kia nātou ʼo te fono ʼaia ke nātou fakaʼalofa fuli ki toku ʼohoana ʼi te telefoni. Koia, logope la neʼe mole feala ke ʼalu toku ʼohoana ki te ʼu fono, kae neʼe mole he temi neʼe ina logoʼi ai ʼe nofo tokotahi.
“ ʼI te temi ʼaē neʼe mate ai toku ʼohoana, ko te kau tagata ʼāfea fuli ʼo te kokelekasio neʼe nātou ʼōmai ki toku ʼapi ʼi te hola ʼaē neʼe hoa mai kiai. Ko te toko teau tupu tēhina mo tuagaʼane neʼe nātou ʼaʼahi ʼau ʼi te ʼaho pe ʼaia. Meʼa fakaofoofo foki, neʼe feʼauga te meʼa kai maʼa nātou fuli ʼaia. ʼE mole feala haku lau ia te ʼu meʼa ʼofa, te ʼu agaʼofa ʼa te ʼu tēhina, mo te ʼu palalau fakaloto fīmālie, pea mo te ʼu faikole ʼaē neʼe fai ʼo ʼuhiga mo ʼau. ʼI meʼa fakaloto fīmālie leva! Ki muli age, neʼe ʼau kole age ki te ʼu tēhina ke nātou tuku tanatou foaki he ʼu meʼa kai pea mo tanatou fai menasi tuʼumaʼu!
“ ʼE feala koa ki te hahaʼi ʼaē ʼe mole kau ki te kautahi ʼa Sehova, ke nātou fakahā ia te manavaʼofa, mo te agaʼofa pea mo te ʼofa ʼaia? Ko te tokolahi ʼo te hahaʼi ia ʼaho nei, ʼe mole lahi tonatou ʼu kaumeʼa moʼoni. Neʼe tapuakina tatou e Sehova ʼi tana foaki mai kia tatou totatou foʼi famili, ko te ʼu tēhina mo tuagaʼane ʼi te faʼahi fakalaumālie!”—Maleko 10:29, 30.