Ko Te Kau Faka Mafola ʼo Te Puleʼaga ʼe Nātou Fakamatala

ʼE Fakavikiviki Te Kau Tūpulga Ki Te ʼAtua ʼi Te Lepupilika ʼo Congo

KUA hili kiai te ʼu sēkulō, neʼe fai te fakaafe fakafiafia e te tagata fai pesalemo ki te kau tūpulaga ke nātou fakavikiviki te Hau ʼo te heʼegata: “Kau tūpulaga pea mo koutou kau taʼahine taupoʼou, kau matutuʼa pea mo te ʼu tama . . . , koutou fakavikiviki te huafa ʼo Sehova, he ko tona huafa tokotahi pe ʼaē ʼe māʼoluga ʼaupito.” (Pesalemo 148:12, 13) Ko te ʼu fakamatala ʼaē ʼe hoa mai, mai te Lepupilika Temokalatike ʼo Congo ʼe nātou fakahā lelei mai te maʼuhiga ʼo te pilivilesio taulekaleka ʼaia.

• Ko te patolo ʼo te pionie makehe neʼe lave mālohi kia ia te aga ʼa te kau Fakamoʼoni ʼa Sehova. Koia neʼe ina tuku ai ki te kau Fakamoʼoni ʼa Sehova ke nātou fai te ako Tohi-Tapu ʼa tona ʼofafine ʼe taʼu nima, ʼe higoa ko Fifi. ʼI tana sio ki te haʼele lelei ʼo te ako ʼa Fifi ʼi te tohi Recueil d’histoires bibliques,a neʼe fakagafua leva e tana tāmai ke ʼalu ki te ʼu fono ʼaē ʼe fai ʼi te Fale ʼo te Puleʼaga. ʼI te fale fono, neʼe ako ai e Fifi te ʼu hiva ʼi te tohi katiko ʼa te kau Fakamoʼoni ʼa Sehova. Neʼe ina leleiʼia tāfito te katiko 4, ʼaē ko tona kupu tāfito “Ko Te Fakapapau Fakaʼatua Ki He Palatiso.”

ʼI te tahi ʼaho neʼe fakatuʼutuʼu e te tāmai ʼa Fifi ke ina ʼave ia ia ki tona ʼēkelesia. Neʼe punamaʼuli te tokolahi, koteʼuhi neʼe mole fia hiva e Fifi te ʼu hiva ʼo te ʼēkelesia. Koteā tona tupuʼaga? Koteʼuhi neʼe ina fakatokagaʼi ko te ʼu hiva ʼaē ʼe hiva ʼi te ʼēkelesia ʼo tana tāmai neʼe mole ʼalutahi mo te meʼa ʼaē neʼe ina ako ʼi tana ako te Tohi-Tapu. ʼAki he lotomālohi, neʼe ina hivaʼi tana katiko ʼaē ʼe ina leleiʼia.

ʼI te ʼosi faiga ʼa te kau takitaki lotu ke nātou fetogi tana manatu, neʼe nātou fakatuʼutuʼu ai leva ke nātou fakamavae ia Fifi ʼaē kei taʼu nima! Logope la te gaohi koviʼi ʼo Fifi, neʼe nofo fakalogologo tana tāmai. Neʼe fiafia ia ʼuhi ko te pipiki mālohi ʼa Fifi ki te meʼa ʼaē ʼe tui kiai. Neʼe loto te ʼu mātuʼa ʼa Fifi ke hoko atu tana fakatahitahi mo te kau Fakamoʼoni ʼa Sehova.

• Neʼe fakatuʼutuʼu e te kiʼi tama ko Lukodi ke ina ako te Tohi-Tapu mo te kau Fakamoʼoni ʼa Sehova, kae neʼe fakafeagai ʼaupito tana tāmai ki te faʼahi ʼaia. ʼI te tahi ʼaho, neʼe teuteu ai ia Lukodi ke ʼalu ki te fono ʼaē ʼe fai ʼi te Fale ʼo te Puleʼaga, pea neʼe ʼoho age tana tāmai kia ia mo te hele. ʼI te tahi ʼaho neʼe tāʼi ia Lukodi e tana tāmai ʼaki te kauʼi ʼakau, ʼo lavea kovi tona tuʼa. Māʼiape la mo te fakafeagai mālohi ʼaia, neʼe taupau maʼu e Lukodi tana fakatuʼutuʼu ʼaē ke liliu ko he Fakamoʼoni ʼa Sehova. Neʼe hoko atu tana tuputupu pea neʼe papitema. ʼI te temi nei ʼe pionie katoa.

Ko Sona, te tokolua veliveli ʼo Lukodi, neʼe malave kia ia te pipiki maʼu ʼo tona tokolua ki te meʼa ʼaē ʼe ina ako ʼi te Tohi-Tapu, pea neʼe ina kamata ai tana ako te Tohi-Tapu mo te kau Fakamoʼoni ʼa Sehova. Kae moʼo tāʼofi ʼo tana ako, neʼe ʼave ia Sona e tana tāmai ke ʼalu ʼo ako ʼi te tahi kolo, ʼe mole ʼi ai he ʼu Fakamoʼoni ʼa Sehova. Kae neʼe palalau tuʼumaʼu ia Sona ki te tamaliki ako ʼo ʼuhiga mo te ʼu meʼa ʼaē neʼe ina ako. Ki muli age, neʼe toe fia fai mo tona tokolua mataʼi tama ki te moʼoni.

ʼI te kolo ʼe ōvi mai ki te faleako, neʼe logo te kau Fakamoʼoni ʼa Sehova ki te fai faka mafola ʼa Sona, pea neʼe nātou fakatuʼutuʼu ke nātou ʼaʼahi ia ia pea ke nātou fai hana ako Tohi-Tapu. Neʼe hoko atu tana tuputupu pea mole tuai pea papitema ohage pe ko tona tokolua, ʼo liliu ko te Fakamoʼoni ʼa Sehova. Pea ko tona tokolua mataʼi tama, kua liliu ʼi te temi nei ko he kaugā fagona, pea kua fai te ako tohi ʼi te kolo ʼaia.

ʼE fakaofoofo pea mo fakaloto fiafia mokā ʼe kau te kau tūpulaga ki te fakavikiviki ʼo te huafa ʼo Sehova!

[Nota ʼi te lalo pasina]