Te ʼu Folafola e Hogofulu
NEʼE fakatokagaʼi e te ʼēpikopō ʼo Gloucester ʼi Pilitania, neʼe laka ʼi te vaelua te lahi ʼo te ʼu kaletinale ʼo tona ʼēkelesia ʼaē neʼe mole feala ke nātou lau fakaʼatamai te ʼu Folafola e Hogofulu, pea ko te toko 10 ʼi te teau ʼo nātou neʼe mole nātou ʼiloʼi peʼe tuʼu ʼifea te ʼu Folafola ʼaia ʼi te Tohi-Tapu. Kae neʼe hoko te faʼahi ʼaia kua hili kiai taʼu e 450. Kua fetogi koa te ʼaluʼaga ʼaia talu mai te temi ʼaia? Kailoa ia—ohage ko tona fakahā e te nusipepa Sunday Times mole heʼeki faʼa fualoa tona tā, ʼo ʼuhiga mo te kumi neʼe fai ki te kau kaletinale ʼo te lotu Anglican.
ʼI te toko 200 kau takitaki lotu ʼaē neʼe fakafehuʼi, neʼe ko te toko 34 pe ʼi te teau ʼaē neʼe feala ke nātou lau fuli fakaʼatamai te ʼu Folafola e Hogofulu. Ia nātou ʼaē neʼe toe, neʼe ʼui e te tahi ʼe lahi fau te ʼu tapu ʼaē ʼe maʼu ʼi te ʼu Folafola ʼaia, pea neʼe fakafisi e te tahi ki te ʼu Folafola ʼaia, ʼo ina ʼui ʼe mole kei ʼi ai honatou ʼaoga ki totatou temi, ki te ʼu fihifihia ʼo ʼuhiga mo te aga ʼaē ʼe tonu ke fai.
ʼE koutou ʼiloʼi koa pe koteā te ʼu Folafola e Hogofulu peʼe koutou ʼiloʼi koa peʼe tou maʼu ʼi te koga tohi fea? ʼE tuʼu ia Ekesote, te lua tohi ʼo te Tohi-Tapu, ʼi te kapite 20, ʼi te ʼu ʼuluaki vaega e 17. He koʼe koa ʼe mole koutou lau te ʼu vaega ʼaia? Koʼeni te faʼahiga tānaki faigafua ʼo te ʼu Folafola ʼaia. Ko te ʼu ʼuluaki folafola e fā, ʼe talanoa ʼo ʼuhiga mo tatatou tauhi ki te ʼAtua, ʼe faka maʼuhigaʼi e te nima folafola te maʼuli faka famili, ko te ono folafola ʼo aʼu ki te hiva ʼe talanoa ʼo ʼuhiga mo tatatou ʼu felogoi mo totatou kāiga, pea ko te hogofulu folafola ʼe mole hona fakatatau, koteʼuhi ʼe ina uga tatou ke tou sivi totatou loto, ke tou vakavakaʼi pe koteā te ʼu meʼa ʼaē ʼe tou taupau ʼi totatou loto. Koʼeni he fakamatala fakanounou ʼo ʼuhiga mo te faʼahiga maʼuliʼi e he Kilisitiano te ʼu pelesepeto.
ʼUluaki: Ke tou tauhi ki totatou Tupuʼaga tokotahi pe. Lua: Ke mole fakaʼaogaʼi he ʼu paki ʼi te tauhi. Tolu: Ke tou fakaʼapaʼapa tuʼumaʼu pea mo tou faka maʼuhigaʼi te huafa ʼo te ʼAtua. Fā: Ke tou fakaʼaogaʼi he temi moʼo vakavakaʼi lelei te ʼu faʼahi fakalaumālie, ʼo mole tou tuku he meʼa ke ina fakaleluʼi tatou. Nima: ʼU fānau, koutou fakaʼapaʼapa ki takotou ʼu mātuʼa. Ono: ʼAua naʼa tou fai fakapō. Fitu: ʼAua naʼa tou tono. Valu: ʼAua naʼa tou kaihaʼa. Hiva: Tou tala te moʼoni. Hogofulu: Tou tekeʼi te mānumānu.
Neʼe kau te ʼu Folafola e Hogofulu ki te ʼu lao ʼaē neʼe foaki age kia Moisese. Kae ko te ʼu pelesepeto ʼaē ʼe maʼu ai ʼe heʼegata ia. (Loma 6:14; Kolose 2:13, 14) ʼO ʼuhiga mo te faʼahi ʼaia, neʼe talanoa te ʼu tisipulo ʼa Sesu ki te ʼu Folafola ʼaia e Hogofulu pea mo nātou fakaʼaogaʼi. (Loma 13:8-10) ʼE mahino neʼe lagi fakafiafia age te maʼuli—pea mo fīmālie age—ʼi te temi nei, mo kanapaula neʼe fakaʼapaʼapa te hahaʼi fuli ki te ʼu pelesepeto fakaʼatua ʼaia pea mo nātou maʼuliʼi!