ʼE Teu ʼAki He Foʼi Hau Aulo

TALU mai te ʼu temi ʼāfea, neʼe leleiʼia ʼaupito e te hahaʼi te ʼu koloā aulo he neʼe maʼuhiga pea mo matalelei. ʼI tana liliu ko te tagata takitaki maʼuhiga ʼi Esipito, neʼe foaki e Falaone kia Sosefo te kahoa aulo. (Senesi 41:42) Neʼe foaki kia Lepeka te mama aulo ki te ihu pea mo te ʼu vesa aulo e lua, ʼaē ko tonatou totogi ʼi te temi nei ko te teitei 140 000. (Senesi 24:22) ʼE mahino papau ia, neʼe nā tali te ʼu meʼa ʼofa maʼuhiga ʼaia ʼaki he loto fakafetaʼi, pea neʼe nā leleiʼia te ʼai ʼo te ʼu koloā ʼaia.

ʼE talanoa te Tohi-Tapu ʼo ʼuhiga mo he ʼu koloā fakatātā, ʼe maʼuhiga age ʼi te ʼu koloā ʼaē neʼe ʼai e Sosefo pea mo Lepeka. ʼE ʼui fēnei ia Tāʼaga Lea 25:12: “Ko he foʼi hau aulo pea mo he koloā aulo makehe, ʼe feiā ki te taliga ʼo ia ʼaē ʼe fagono, ia ia ʼaē ʼe ina fakatonutonuʼi ʼaki te poto.” Ka foaki e he tahi he ʼu tokoni ʼe fakatafito ki te Folafola ʼa te ʼAtua kae mole fakatafito ki tana manatu ʼa ia totonu, pea ʼe ina foaki moʼoni he meʼa ʼofa maʼuhiga. Koteā tona tupuʼaga? Koteʼuhi ʼi tona fakahagatonu, ʼe haʼu te tokoni ʼaia mai ia Sehova totonu. ʼE ʼui fēnei mai e te Tohi-Tapu: “Ko te akonaki ʼa Sehova, Ê toku foha, ʼaua naʼa ke fakafisi kiai; pea ʼaua naʼa ke fehiʼa ki tana fakatonutonu, koteʼuhi ko ia ʼaē ʼe ʼofa ki ai ia Sehova, ʼe ina fakatonutonuʼi, ohage ko he tāmai ʼe ina fakatonutonuʼi tona foha ʼaē ʼe ina fakafiafia [tona loto].” (Tāʼaga Lea 3:​11, 12) Ka tali e he tahi ʼaki he agavaivai he tokoni pea mo mulimuli ki te tokoni ʼaia, ʼe hage ʼe ina ʼai hona foʼi hau aulo. ʼE hage pe ko te ʼui ʼa te tāʼaga lea faka Tohi-Tapu: “Manuʼia te tagata ʼaē neʼe ina maʼu te poto, pea mo te tagata ʼaē ʼe ina maʼu te fakasiosio tonu, heʼe lelei age te maʼu ʼo te ʼu koloā ʼaia, ʼi hakita maʼu te koloā ʼaē ko te siliva, pea [ʼe lelei age] te maʼu ʼo te ʼu meʼa ʼaia ʼi te [maʼu] ʼo te aulo.”​—Tāʼaga Lea 3:​13, 14.