“Koutou Fai Ni ʼu Tisipulo ʼi Te Hahaʼi ʼo Te ʼu Fenua Fuli Pe”
“KOUTOU ʼolo pea ke koutou fai ni ʼu tisipulo ʼi te hahaʼi ʼo te ʼu fenua fuli pe, ʼo papitemaʼi ia nātou ʼi te huafa ʼo te Tāmai pea mo te ʼAlo pea mo te laumālie maʼoniʼoni.” Neʼe fakaliliu e te Tohi-Tapu te Traduction du monde nouveau te fakatotonu ʼa Sesu ʼaē ʼe tuʼu ia Mateo 28:19. Kae neʼe fakafihiʼi e ʼihi te fakaliliu ʼaia. Ohage la, ʼe ʼui fēnei e te nusipepa faka lotu: “Ko te fakaliliu pe e tahi ʼo ʼuhiga mo te koga tohi faka Keleka: ‘Koutou fai ni ʼu tisipulo ʼi te ʼu fenua fuli pe!’ ” ʼE moʼoni koa te faʼahi ʼaia?
ʼE lahi te ʼu Tohi-Tapu ʼaē ʼe maʼu ai te ʼu kupu ʼaenī, “Koutou fai ni ʼu tisipulo ʼi te ʼu fenua fuli pe,” pea ʼe ko he fakaliliu fakahagatonu mai te faka Keleka. Kae ʼe fakatafito kiteā te fakaliliu ʼaenī “Koutou fai ni ʼu tisipulo ʼi te hahaʼi ʼo te ʼu fenua fuli pe, ʼo papitemaʼi ia nātou”? ʼE fakatafito ki te ʼu meʼa ʼaē neʼe tohi ʼi muʼa atu peʼe ki muli age ʼo te vaega ʼaia. Ko te kupuʼi palalau “ ʼo papitemaʼi nātou” ʼe faka ʼuhiga lelei ki te hahaʼi, kae mole faka ʼuhiga ki te ʼu fenua. ʼE ʼui fēnei e te tagata poto Siamani, ko Hans Bruns: “Ko te [kupu] ‘nātou’ ʼe mole faka ʼuhiga ki te ʼu fenua (ʼaē ʼe fakakeheʼi lelei ʼi te lea faka Keleka), kae ʼe faka ʼuhiga ki te hahaʼi ʼo te ʼu fenua.”
Tahi ʼaē meʼa, ʼe tonu ke tou fakatokagaʼi pe neʼe fakahoko feafeaʼi te fakatotonu ʼaia ʼa Sesu. ʼO ʼuhiga mo te fai faka mafola ʼa Paulo pea mo Palenapasi ʼi Telepē, te kolo ʼi Asie Mineure, ʼe tou lau fēnei: “ ʼI tanā ʼosi fagonogono te logo lelei ki te kolo ʼaia pea mo fai ni ʼu tisipulo ʼe tokolahi, neʼe nā toe liliu ki Lisite pea ki Ikoniome pea mo Atiokia.” (Gāue 14:21) Koutou fakatokagaʼi neʼe fai e Paulo pea mo Palenapasi te ʼu tisipulo, neʼe mole ko he ʼu tisipulo ʼo te kolo ʼo Telepē, kae ko ʼihi ʼi te ʼu hahaʼi ʼo Telepē.
ʼO toe feiā pe, ʼo ʼuhiga mo te temi fakaʼosi, neʼe fakakikite e te tohi ʼo te Fakahā, ʼe mole tauhi anai te ʼu fenua katoa ki te ʼAtua, kae ko “te toe hahaʼi tokolahi . . . mai te ʼu fenua fuli pea mo te ʼu telepi pea mo te ʼu hahaʼi pea mo te ʼu lea fuli” ʼaē ka nātou tauhi anai ki te ʼAtua. (Fakahā 7:9) Koia, ʼe fakamoʼoni e te Tohi-Tapu ʼo te Traduction du monde nouveau, ʼe ko he fakaliliu ʼe feala ke tou falala kiai ʼo ʼuhiga mo ‘te Tohi-Tapu katoa, ʼaē ʼe haʼu mai te ʼAtua.’—2 Timoteo 3:16.