Ko He Tali Maʼuhiga

MOLE heʼeki faʼa fualoa, neʼe tā e te nusipepa Katolika Loma ʼo Pilitania, te Catholic Herald, te tohi ʼaenī mai te tagata lautohi ʼi te fenua ʼo Galles: “ ʼI te tahi po, neʼe ʼōmai te ʼu Fakamoʼoni ʼa Sehova e toko lua ki toku ʼapi. Neʼe ʼau maʼu ai te faigamālie ke ʼau ʼui age kia nāua neʼe ko te ’Ēkelesia Katolika ʼaē neʼe ina ʼui ʼe moʼoni te Tauhi Foʼou ʼaē ʼe nātou fakaʼaogaʼi. Neʼe ʼau punamaʼuli ʼi te fakamoʼoni kiai ʼo te tahi ia nāua. Neʼe ina ʼui fēnei: ‘Ei, ʼe koutou fakamoʼoni kiai, kae ʼe mole koutou mulimuli kiai. Neʼe ʼui fēnei e Sesu “koutou feʼofaʼofani ohage ko taku ʼofa ʼaē kia koutou,” kae ko koutou ia, ʼe koutou fematematehiʼaki. ʼI te tau fakamaʼuli ʼaenī, neʼe matehi e te kau Katolika te tahi kau Katolika, kae neʼe mole matehi e te kau Fakamoʼoni ʼa Sehova tonatou ʼu [kaumeʼa] Fakamoʼoni.’ Neʼe mole feala ke ʼau fakafifihi ki te faʼahi ʼaia. ʼE lava feafeaʼi hatatou faikole ke tou logo tahi mo ‘ ʼotatou ʼu tēhina ʼaē ʼe mole tou tauhi tahi,’ mo kapau ʼe mole maʼu he logo tahi moʼoni ia tatou totonu? ʼE mole tonu koa la ke ʼuluaki fetogi muʼa te meʼa ʼaia?”​—Soane 15:12.

Neʼe kamata te ʼu tau faka malamanei ʼaē e lua ʼo te 20 sēkulō ʼi te Keletiate pea neʼe mamate ai te hahaʼi e toko 50 peʼe 60 miliona. Kae ʼe feala ke tou ʼui moʼoni neʼe mole kau te kau Fakamoʼoni ʼa Sehova ki te ʼu tau ʼaia, pea ʼe mole honatou pikipikiga mo te ʼu tau ʼaē ʼe hoko ʼi te temi ʼaenī. ʼE lava feafeaʼi te faʼahi ʼaia? ʼE lelei anai ke lahi age takotou mahino ki te ʼofa pea mo te logo tahi faka Kilisitiano ʼaē ʼe fakahā e te toko nima miliona tupu kau Fakamoʼoni ʼa Sehova.​—Vakaʼi ia Isaia 2:4.

[Haʼuʼaga ʼo te paki pasina 32]

U.S. National Archives photo