ʼE Nātou Fakavikiviki Fakalogologo Ki Tonatou Tupuʼaga

ʼE FAKAOFOOFO tuʼumaʼu hakita sio ki te tō ʼo te laʼā. Kae ko te tō ʼo te laʼā ki te muli moʼuga ʼaia ʼo te ʼu Alpes Apuannes ʼi Toscane ʼi Italia, ʼe mole hona fakatatau.

Ka tou sio kiai mai mamaʼo, pea ʼe hage ʼe tō te laʼā ki te loto moʼuga, ka mole hage ia ʼe tō ifo ʼi te muli moʼuga. Koteā tona tupuʼaga? Koteʼuhi ʼe hage ʼe ʼi ai he pu lahi neʼe keli ʼi te tumutumu ʼo te moʼuga. Koia, neʼe fakahigoaʼi te moʼuga ʼaia, ko te Monte Forato​—ko te Moʼuga ʼaē neʼe Puhi. ʼUhi ko te takafoli ʼo te kele ia tafa ʼo te laʼā, koia ʼe feala ai ke tou mamata tuʼa lua pe ʼi te taʼu ki te tō ʼo te laʼā ki te pu lahi ʼaia ʼo te Monte Forato.

Ohage ko te ʼu meʼa fuli ʼaē neʼe fakatupu, ko te ʼu meʼa ʼo te lagi ʼe nātou vikiʼi tonatou Tupuʼaga. ʼO feafeaʼi? ʼE hage pe ko te paki matalelei ʼaē ʼe feala ke tupu ai te vikiʼi ʼo te tagata faiva ʼaē neʼe ina pena. ʼI tona fakahagatonu, ko te ʼu meʼa ʼo te lagi ʼe nātou fakahā te mālohi, mo te poto, pea mo te Māʼoluga ʼa Sehova. Ohage ko tona ʼui e te tagata fai pesalemo, “ ʼe kalagaʼi e te lagi te kolōlia ʼo te ʼAtua; pea ko te lagi ʼe ina fakahā te gāue ʼo tona ʼu nima.” (Pesalemo 19:1; 69:34) Koia, kapau ko te laʼā pea mo te tahi ʼu meʼa ʼe nātou vikiʼi tonatou Tupuʼaga, pea ʼe tonu ke toe feiā mo tatou!​—Pesalemo 148:​1, 3, 12, 13.