ʼE Vikiʼi Te Fakatahi “Taulekaleka”

KO TE tagata tala logo ʼi te lātio ʼi Lima, ʼi te fenua ko Pelu, neʼe lotolotolua ʼo ʼuhiga mo te kau Fakamoʼoni ʼa Sehova. Kae ʼi tana ʼosi kau ʼi tanatou fakatahi faka tisitilike, neʼe fetogi ʼaupito tana faʼahiga manatu. ʼI tona fakahagatonu, neʼe ōfo ʼaupito pea neʼe ina fai te ʼu fakamatala lelei ʼi te lātio ʼo ʼuhiga mo nātou. Koʼeni te ʼu palalau ʼaē neʼe ina fai:

“Neʼe taulekaleka te fakatahi ʼaia. Neʼe mole leta he pepa pe ko he feʼaluʼaki ʼa he tagata fakatau koloā. Neʼe mole faigataʼa te feʼoloʼaki ʼo te ʼu motokā. Neʼe ʼōmai te toko 5 200 hahaʼi ki te malaʼe faigaoʼi ʼo nātou totogi e nātou totonu tanatou ʼolo kiai, ʼo tahi haʼu mo tana pākete, mo tana moʼi kie moʼo holo te efu, mo tana taufale, mo tana polosi, mo tona ʼu taganima, pea mo te ʼu meʼa ʼaē neʼe ʼaoga moʼo fai ʼaki te fakamaʼa ʼaia. Kapau neʼe ʼaoga ke pena he meʼa, pea neʼe nātou pena te meʼa ʼaia. Pea ko ai ʼaē neʼe ina totogi te faʼahi ʼaia? Neʼe nātou totogi e nātou totonu! Ka nātou ʼiloʼi ʼe ʼi ai he meʼa ʼe tonu ke nātou fai, pea ʼe nātou foaki atu aipe te falā ʼaē ʼe ʼaoga kiai. ʼE ʼau ʼui atu, ʼe hage ʼe tulemoe ʼosi te ’Ēkelesia Katolika mokā tonu ke ina fai he ʼu meʼa feiā. ʼE ʼau fia fakamālo ki te kau Fakamoʼoni ʼa Sehova pea mo nātou ʼaē neʼe nātou fai te ʼu fakatuʼutuʼu ʼo te fakatahi ʼaia. Pea ʼe ʼau fia ʼui age kia nātou ʼaki toku loto katoa, ʼOfa pe ke tokoni atu te ʼAtua kia koutou, pea mo ina tapuakinaʼi koutou.”

ʼI te ʼu kolo kehekehe ʼo te malamanei katoa ʼi te taʼu ʼaenī, ʼe fai anai e te kau Fakamoʼoni ʼa Sehova tanatou Fakatahi Faka Tisitilike “Ko Te Faʼahiga Maʼuli ʼAē ʼe Fakamaʼua Mai e Te ʼAtua.” ʼE koutou ʼolo anai koa kiai?

[Talanoa ʼo te pasina 32]

“Neʼe mole leta he pepa”