He Koʼe Koa ʼe Mole Koutou Fakatahi Mo Nātou?

KO TE tagata ko Ndjaukua Ulimba, ʼe taʼu 73 pea ʼi te taʼu ʼaenī kua hili, neʼe fagona ia kilometa e 450. Neʼe haʼele lalo ʼi te ʼu kilometa katoa ʼaia, pea neʼe ina fai ia ʼaho e 16.

Neʼe fai e te matuʼa ʼaia te fagona loaloaga ʼaia ke feala hana kau ki te fakatahi ʼaē ʼe fai ʼi te taʼu fuli e te kau Fakamoʼoni ʼa Sehova. Hili ʼaia te fakatahi, kua fiafia ʼaupito pea mo mālohi ʼi te faʼahi fakalaumālie, pea neʼe toe liliu ki tona ʼapi​—ʼo toe haʼele ia ʼaho e 16. Neʼe ʼi ai koa he fua ʼo tana fai te meʼa ʼaia? Ei! ʼE fai e Ndjaukua Ulimba te fagona ʼaia ʼi te taʼu fuli talu mai ni ʼu taʼu.

ʼE kau te tagata Afelika ʼaia ʼi te toko 15 miliona tupu hahaʼi ʼaē neʼe ʼōmai mai te ʼu fenua e 230, ʼo kau ki te ʼu fakatahi ʼa te kau Fakamoʼoni ʼa Sehova ʼi te taʼu ʼaenī kua hili. ʼE mahino ia, tokolahi neʼe mole nātou haʼele lalo lolotoga ni ʼu ʼaho ke nātou aʼu ki te faʼahi ʼaē ʼe fai ai te fakatahi. Ko te tokolahi ia nātou neʼe ʼōmai ʼi te motokā, peʼe ʼi te kā, peʼe ʼi te saliote afi, peʼe ʼi te vakalele. Neʼe koutou kau koa ia nātou ʼaia?

ʼI te taʼu 1998, ʼe toe fai anai te ʼu fakatahi ʼi te malamanei katoa, pea ʼe fai tāfito anai lolotoga te ʼu māhina vevela. Kapau ʼe mole mahaki, pea ʼe mahino ia ʼe toe fai anai e Ndjaukua Ulimba te fagona loaloaga ʼaia ke kau ki te fakatahi ʼaia. Ko ia mo te ʼu hahaʼi ʼe lauʼi miliona ʼe nātou fakalogo anai ki he polokalama ʼe ʼaoga kia nātou, ʼe ina fakamālohiʼi tonatou tui, pea mo toe foaki kia nātou te mālohi. Kia nātou fuli ʼaē ka kau anai kiai, ko te fakatahi ʼe ko te faʼahi maʼuhiga anai ʼaia ʼo te taʼu. ʼE toe fakaafe mo koutou ke koutou kau kiai. ʼE fia fakahā atu anai e te kau Fakamoʼoni ʼa Sehova ʼo tokotou kolo te koga meʼa ʼaē ʼe ōvi atu, ʼaē ka fai ai te fakatahi.