Ko Te ʼu Aga ʼe Lelei ʼe Tupu Ai Te Fakavikiviki

KO TE sulunale Italia La Gazzetta del Mezzogiorno, neʼe ina fakavikiviki te kau Fakamoʼoni ʼa Sehova ʼuhi ko tanatou tā te alatike “Matera la troglodyte.” Neʼe tā te alatike ʼaia ʼi te Réveillez-vous! Fakafalani ʼo te ʼaho 8 ʼo Sūlio 1997, pea neʼe lahi tona tufa ʼi te ʼu lea kehekehe. Ia ʼaho nei, ʼe fakaliliu te Réveillez-vous! ia lea e 81 pea ʼe tā te ʼu nusipepa feiā e 19 miliona ʼi te malamanei katoa. Neʼe ʼui e te sulunale, ʼi te fasiga taʼu māfana ʼaia, ko te Réveillez-vous! neʼe ko te nusipepa ʼaē neʼe lelei tokotahi “tana vikiʼi ia te ʼu koga meʼa matalelei pea mo faka hisitolia ʼo te kolo [ko Matera].”

Neʼe fakavikiviki e te nusipepa ʼaia te kau Fakamoʼoni ʼa Sehova ʼuhi ko te Fakatahi Faka Tisitilike “Te Tui Ki Te Folafola ʼa Te ʼAtua” ʼaē neʼe fai ʼi Matera ʼi te taʼu 1997. Neʼe fakahā e te alatike ʼaia, ko te kau Fakamoʼoni ʼa Sehova neʼe nātou lava “fakatahi te toko 4 000 ʼi te malaʼe faigaoʼi ʼaē ʼe higoa ko 21 Settembre, logope la te temi vela pea mo te mālohi ʼo te laʼā; neʼe nātou tokakaga ki te fakamaʼa, mo te fakafoʼou ʼo te pena, pea mo fai he ʼu fetogi ke lelei te malaʼe faigaoʼi ʼaia (tāfito ʼo ʼuhiga mo te ʼu fale vao), ʼo nātou totogi e nātou totonu te ʼu meʼa ʼaē neʼe ʼaoga ki te gāue ʼaia.”

ʼE faiga e te kau Fakamoʼoni ʼa Sehova ke nātou vāhaʼa lelei mo te hahaʼi. (Mateo 22:37-39) ʼE nātou toe fakalogo foki ki te fakatotonu faka Tohi-Tapu ʼaenī: “Koutou taupau he aga matamatalelei ʼi te lotolotoiga ʼo te ʼu puleʼaga, ke . . . nātou faka kolōliaʼi te ʼAtua ʼi te ʼaho ʼo tana ʼaʼahi, he neʼe nātou sio mata ki takotou ʼu gāue lelei.”​—1 Petelo 2:​12.