Ko Te Kau Faka Mafola ʼo Te Puleʼaga ʼe Nātou Fakamatala
Tou Fakaʼaogaʼi Te ʼu Temi Faigamālie Fuli
KUA ʼiloa te kau Fakamoʼoni ʼa Sehova ʼi te malamanei katoa, ʼuhi ko tanatou gāue ʼaē ko te akoʼi ʼo te Tohi-Tapu ki te hahaʼi. Kae ʼe nātou fai te tahi ʼu ako ʼe fua lelei ki te sosiete. Kua tali lelei te gāue ʼaia ʼaē ʼe fai ki te kaugamālie, ohage ko tona fakahā ʼi te ʼu meʼa ʼaenī neʼe hoko ʼi Équateur.
◻ Ko te kau takitaki ʼo te fale gāue lahi ʼe gaohi ai te sioʼata, neʼe nātou fia fakatuʼutuʼu ke fai he ako ki tanatou ʼu hahaʼi gāue, ʼo ʼuhiga mo te maʼuli faka famili. Ko te tagata pule ʼaē ʼe tokaga ki te hahaʼi gāue neʼe ina fakaafe he kau patele ke nātou ʼōmai ʼo kau kiai, kae neʼe mole nātou ʼōmai. Ko te tahi patele neʼe ina ʼui ki te tagata pule ʼaia, ʼe lahi te kau patele ʼaē ʼe mole nātou ʼiloʼi he meʼa ʼo ʼuhiga mo te faʼahi ʼaia, koia neʼe mole feala ai ki he tahi ia nātou ke kau kiai. ʼI tana logo ki te meʼa ʼaia, ko te fafine ʼe ko te Fakamoʼoni ʼa Sehova ʼe gāue ai, neʼe ina fai he ʼu fakatuʼutuʼu ke ʼaʼahi te fale gāue ʼaia e te tēhina ʼaē ʼe fai faka mafola ʼi te telituale ʼaē ʼe tuʼu ai te ʼu fale gāue.
ʼI te ʼapogipogi ake, neʼe ʼalu te Fakamoʼoni ʼaia ki te tagata pule ʼa te kau gāue, ʼo fakahā age ki ai te polokalama ako ʼaē neʼe feala ke ina fai. Neʼe ina filifili te ʼu kupu tāfito mai te ʼu tohi kehekehe ʼo te Sosiete Watch Tower. Neʼe punamaʼuli ai te tagata pule pea neʼe ina filifili te ʼu kupu tāfito e tolu—te ʼu felogoi mo te hahaʼi, mo te aga ʼaē ʼe tonu ke fai ʼi te gāue pea mo te famili. ʼOsi ʼaia pea neʼe fai he ʼu fakatuʼutuʼu ke vakaʼi te ʼu faʼahi ʼaia mo te hahaʼi gāue fuli.
Neʼe vaheʼi te ʼu hahaʼi gāue ko kūtuga e fitu ʼo nātou toko 30 takitahi, pea ko te ʼu tēhina e toko tolu neʼe faiakonaki kia nātou. Neʼe koteā tona ʼu fua? Ko te tokolahi ʼo te hahaʼi gāue neʼe nātou kole ke ʼaʼahi nātou, pea neʼe tufa te ʼu tohi faka Tohi-Tapu e 216. Neʼe ōfo te ʼu hahaʼi pule ʼo te fale gāue ʼaia, koia neʼe nātou kole ai ki te kau Fakamoʼoni ʼa Sehova ke nātou teuteu te tahi ʼu akonaki.
◻ Mole heʼeki faʼa fualoa, neʼe fai ʼi Équateur te lao ʼe fakagafua ai ke akoʼi te lotu ʼi te ʼu faleako. Ko te tuagaʼane misionea neʼe ina ʼaʼahi te fafine pule ʼo te faleako ʼo te tamaliki liliki, ʼo ina fehuʼi age ki ai peʼe nātou fakaʼaogaʼi feafeaʼi te lao ʼaia. Neʼe ʼui age e te fafine pule ʼaia, neʼe ina faigaʼi ke kamata te polokalama ako ʼo ʼuhiga mo te tauhi kia Malia, kae neʼe heʼeki fai te ako ʼaia. Neʼe fakatokagaʼi age e te tuagaʼane ʼaia neʼe feala ke tupu ai he ʼu fihifihia ki te kau tamaliki ʼaē ʼe mole Katolika, pea neʼe fakamoʼoni kiai te fafine pule. Pea neʼe ʼui fēnei age e te tuagaʼane: “Kae, ʼe ʼi ai tamatou polokalama ʼe mātou akoʼi ai te aga ʼaē ʼe tonu ke fai ʼo mulimuli ki te Tohi-Tapu, pea ʼe mole ina fakamaʼua ai ki he tahi ke ina tali he faʼahiga lotu.” Neʼe fehuʼi fēnei e te fafine pule: “ ʼE feala ke ke haʼu ʼafea? ʼI te anoiha?” ʼI te ʼosi fakahā age kia ia e te tuagaʼane misionea te tohi Écoutez le grand Enseignant, neʼe nā fakatotonu ʼe vakaʼi anai te kapite “Heureux les pacifiques” (Manuʼia ia nātou ʼaē ʼe manako ki te tokalelei).
ʼI te toe liliu ʼa te tuagaʼane ki te faleako ʼaia, neʼe nofo ai ia hola e tolu ʼo ʼaʼahi te ʼu kalasi e fitu, pea ko te fafine pule neʼe fakalogo ki tana ʼu akonaki. ʼI te ʼosi ʼo te ako ʼaē neʼe fai ki te kalasi CM1, neʼe ʼui fēnei ai e te kiʼi tama: “Fakalelei age, kae ʼe tonu ke ke ʼalu ʼo vakaʼi te CM2. ʼE nātou faiga tuʼumaʼu ke nātou laga kē pea ke nātou tā mātou!” Neʼe fakatokagaʼi fēnei e te tahi fafine faiako: “Ko te agamālohi ʼe ko he faʼahi ʼe maʼuhiga ke tou palalau kiai. ʼE tonu ke lahi totatou palalau ki te faʼahi ʼaia.”
Neʼe fai te ʼu fakatuʼutuʼu ke toe ʼaʼahi te faleako pea ke fai ai he ʼu akonaki ʼo ʼuhiga mo te fakalogo pea mo te loi. ʼO aʼu ki te temi nei, neʼe maʼu ai te ʼu fua lelei. Ka haʼele te tuagaʼane ʼi te ala, ʼe feleleʼi mai te tamaliki kia ia pea ʼe nātou fai ki ai te ʼu fehuʼi ʼo ʼuhiga mo te Tohi-Tapu. Ko ʼihi ʼe nātou faka feʼiloʼiʼaki ia ia mo tanatou ʼu mātuʼa. Tahi ʼaē meʼa, neʼe kamata te ako Tohi-Tapu mo te ʼu tamaliki ako e toko lua.