Ko He Tohi-Tapu Foʼou ʼi Te Lea Faka Keleka ʼo Totatou Temi
ʼI TE ʼaho 23 ʼo ʼAukusito 1997, neʼe ko te ʼaho makehe ʼaia kia nātou ʼaē neʼe kau ki te Fakatahi Faka Tisitilike ʼi Heleni, ʼaē ko tona kupu tāfito “Ko Te Tui Ki Te Folafola ʼa Te ʼAtua.” ʼI te fakaʼosi ʼo te polokalama ʼo te hili hoʼatā, neʼe fakahā te Tohi-Tapu foʼou—Les Saintes Écritures—Traduction du monde nouveau ʼi te lea faka Keleka ʼo totatou temi. Neʼe punamaʼuli te hahaʼi ʼaē neʼe kau ki te fakatahi ʼaia, ʼo nātou fetāgihi pea mo pasipasi fualoa!
Talu mai te taʼu 1905, neʼe fakaʼaogaʼi e te kau Fakamoʼoni ʼa Sehova te Tohi-Tapu ʼo te 19 sēkulō, ʼaē neʼe tā e te takitaki lotu ʼo te lotu Orthodoxe Keleka. Neʼe nātou fakaʼaogaʼi lahi te Tohi-Tapu ʼaia lolotoga ni ʼu taʼu. Kae ʼi te tahi temi, neʼe loto leva e te kau Fakamoʼoni ʼa Sehova ke ʼi ai he Tohi-Tapu ʼe totonu age pea mo mahino gafua. ʼI te taʼu 1993, neʼe nātou fiafia ʼi tanatou maʼu Les Écritures Grecques Chrétiennes—Traduction du monde nouveau ʼi te lea faka Keleka. Kae ʼi te temi ʼaenī, kua lahi age tanatou fiafia he kua nātou maʼu te Tohi-Tapu katoa ʼi te lea faka Keleka.
Ko te tuagaʼane loto fakafetaʼi, neʼe ina fakahigoa te Traduction du monde nouveau ko he “ ʼu palalau fakatuketuke, ko he kiʼi matagi mokomoko mai te leʼo ʼo Sehova, pea kua tou hoki mahino lelei leva kiai ʼi tatatou lea.” Ko ʼihi neʼe nātou kamata lau atu aipe tanatou Tohi-Tapu foʼou ʼi tanatou tau kiō nātou. Ko te tagata neʼe kau ki te fakatahi neʼe loto fiafia, pea neʼe ina lau tana Tohi-Tapu ʼo aʼu ki te hola tahi māfoatā, ʼi tana ʼosi lau katoa te tohi ʼo Sopo!
Ko te Tohi-Tapu Les Saintes Écritures—Traduction du monde nouveau ʼi te lea faka Keleka, ʼe ko te fua ʼaia ʼo te gāue kinakina ʼaē neʼe fai lolotoga taʼu e fitu. Neʼe momoli te tohi ki te Sosiete ʼe ʼui fēnei ai: “Ke koutou ʼiloʼi papau ʼe lahi anai tamatou fakaʼaogaʼi te Traduction du monde nouveau ʼaia, moʼo tokoni ki te hahaʼi fakamalotoloto ke nātou ako ke feala hanatou ʼiloʼi ia Sehova.”