Ko Te Kau Faka Mafola ʼo Te Puleʼaga ʼe Nātou Fakamatala
ʼAua Naʼa Koutou Fakatātāʼofi ʼi Te Fakahā ʼo Te Logo Lelei
ʼI TE ʼuluaki ʼaʼahi e te hahaʼi kumi fenua ʼo Eulopa te Pokoga ʼo Venesuela pea mo te Vaitafe ʼo Maracaibo, neʼe lahi te ʼu kiʼi fale neʼe laga ʼi te fuga vaitafe. Neʼe nātou manatuʼi ai te kolo ʼo Venise ʼi Italia ʼaē neʼe laga ai e te hahaʼi tonatou ʼu ʼapi ʼi te matatai. Ko te tupuʼaga la ʼaia ʼo tona fakahigoaʼi e te kau Sepania te potu fenua ʼaia ko Venesuela, ko tona faka ʼuhiga ko te “Venise Veliveli.”
Ia ʼaho nei, ʼe ʼi ai te tahi faʼahiga laga ʼe fai ʼi te fenua matalelei ʼaia, ʼe ko he laga ʼi te faʼahi fakalaumālie. ʼE gāue mālohi ai te kau Fakamoʼoni ʼa Sehova ke nātou to te pulapula ʼo te Puleʼaga ʼi te ʼu faigamālie fuli. Ko te ʼu fua ʼo te taʼukai fakalaumālie ʼe ko te fakavikiviki ʼo “te ʼAliki ʼo te taʼukai,” ia Sehova ʼAtua.—Mateo 9:37, 38.
ʼI Zulia ʼi te potu tokelau-hihifo ʼo Venesuela, neʼe ʼaʼahi ai e te tagata taupau feʼaluʼaki te kokelekasio, pea ko te kau Fakamoʼoni ʼo te potu fenua ʼaia neʼe nātou fakatuʼutuʼu ke ʼalu mo tona ʼohoana ki Toas, te kiʼi motu neʼe ōvi mai kiai. ʼI tanatou lolotoga talitali ki te vaka, ko Mery te ʼohoana ʼo te tagata taupau feʼaluʼaki, neʼe ina ʼui age ki te tuagaʼane pionie ʼaē neʼe kaugā gāue mo ia, ke nā palalau ki ʼihi kau gāue ʼi te vaka. Neʼe tali te faʼahi ʼaia e te tuagaʼane pionie.
Neʼe kamata palalau ia Mery mo te tagata gāue masini, ʼo ina fakahā age te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. Neʼe ina fakahā kia ia te kapite “Ko Te Faʼufaʼu ʼo He Famili ʼe Ina Faka Maʼuhigaʼi Te ʼAtua,” pea neʼe hage neʼe leleiʼia e te tagata te kapite ʼaia. Neʼe fakamahino age e Mery ki te tagata, ʼaki te tohi ʼaia ʼe feala ke fai hana ako Tohi-Tapu ʼi tona ʼapi. Neʼe ina tali te tohi, pea neʼe nā fai he ʼu fakatuʼutuʼu ke ʼaʼahi e he tahi ia ia pea mo tona famili.
Mole tuai pea neʼe fai ai te fakatahi makehe ʼaho tahi. Pea neʼe punamaʼuli ia Mery ʼi tana sio ki te tagata gāue masini ko Nava mo tona ʼohoana pea mo tanā ʼu kiʼi taʼahine e lua! Neʼe fehuʼi e Mery ki te fafine pe koteā tana manatu ʼo ʼuhiga mo tanatou ako faka famili. Neʼe fakapunamaʼuli ʼaupito tona tali.
Neʼe ina ʼui fēnei: “ ʼE ʼau fakamālo kia Sehova he kua mātou ako te moʼoni.” Pea neʼe ina fakamatala fēnei: “ ʼI te ʼaho ʼaē neʼe ke palalau ai mo toku ʼohoana, neʼe mole heʼeki faʼa fualoa tamā mavete pea neʼe nofo toku ʼohoana mo te tahi fafine. Neʼe lahi tana ʼinu kava. ʼI ʼihi temi neʼe tauvele mokā konahia, pea neʼe mole leleiʼia tana aga ʼaia e te hahaʼi ʼo te motu. Tahi ʼaē meʼa, neʼe faifakalauʼakau. Kae ko te ʼatamai mālama ʼaē neʼe ina maʼu ʼi tana ako te Tohi-Tapu, neʼe tokoni kia ia ke ina fetogi tona maʼuli. Neʼe ina tuku tana ʼu aga heʼeʼaoga fuli. Neʼe punamaʼuli tana ʼu mātuʼa Katolika ʼi te ʼu fetogi ʼaia. ʼE nā fiafia ʼaupito he kua liliu ko he tagata pea mo he tāmai aga fakapotopoto ʼi te temi nei.”
Neʼe papitema ia Nava ʼi te taʼu 1996 pea ʼe pionie ʼi te temi nei. Neʼe papitema tona ʼohoana ko Jenny ʼi te taʼu 1997. Neʼe punamaʼuli ʼaupito te pule kolo ʼi te ʼu fetogi ʼo te maʼuli ʼo te tagata, pea neʼe ina kole ai ke fai hana ako Tohi-Tapu. ʼE fiafia te ʼu tuagaʼane he neʼe mole nā fakatātāʼofi ʼi te fakahā ʼo te logo lelei ʼi tanā talitali ki te vaka ʼi te uhu ʼaia!
[Paki ʼo te pasina 7]
Neʼe maʼu te ʼu fua lelei ʼi tanā fakahā te logo lelei ki te tagata gāue masini ʼo te vaka