“Ko Ai Koa ʼAē Neʼe Ina ʼAi Te Poto Ki Te ʼu ʼAo”?
“KA KOUTOU sisio ki he ʼao ʼe ʼalu ake ʼi te ʼu potu fenua ʼo te potu hihifo, pea ʼe koutou ʼui atu aipe, ‘Ko te afā ka haʼu,’ pea ʼe ko te meʼa ʼaia ʼe hoko. Pea ka koutou sisio ko te matagi mai te potu toga ʼaē ʼe agiagi, ʼe koutou ʼui, ‘ ʼE ʼi ai anai he vevela kovi,’ pea ʼe ko te meʼa ʼaia ʼe hoko.” Ko te ʼu palalau ʼaia ʼa Sesu, ʼaē neʼe tohi e te tagata faitohi Evaselio ko Luka, ʼe ko he faʼifaʼitaki ʼo te tala fakatomuʼa e te hahaʼi ʼo te Palesitina ʼāfea te agaaga ʼo te temi. (Luka 12:54, 55) ʼI ʼihi ʼu ʼaluʼaga, ko te hahaʼi ʼo te temi ʼāfea neʼe feala ke nātou mahino ki te ʼu fakaʼiloga, pea neʼe totonu te ʼu meʼa ʼaē neʼe nātou tala fakatomuʼa.
Ia ʼaho nei, ʼe fakaʼaogaʼi e te hahaʼi ʼo te meteo te ʼu meʼa gāue lalahi, ohage ko te ʼu satelite, mo te radar ʼo Doppler, pea mo te ʼu olotinatea mālohi, ke nātou tala fakatomuʼa pe koteā anai te ʼu agaaga ʼo te temi. Kae ʼe tautau hala te ʼu meʼa ʼaē ʼe nātou tala. Koteā tona tupuʼaga?
ʼE lahi te ʼu faʼahi kua nātou faka faigataʼa te tala fakatomuʼa ʼo te agaaga ʼo te temi. Ohage la ko he ʼu fetogi fakafokifā ʼo te māfana peʼe ko te momoko, mo te māhūhū, mo te pression atmosphérique, pea ʼe feala ke toe ʼāsili faigataʼa ʼaki te agiagi vave ʼo te matagi pea mo te faʼahi ʼaē ʼe agiagi ai. ʼE toe hilifaki kiai te meʼa ʼaē ʼe hoko ʼaki te laʼā, mo te ʼu ʼao, pea mo te tai, ʼaē ʼe mole heʼeki mahino katoa kiai te hahaʼi popoto. ʼUhi ko te ʼu faʼahi ʼaia, koia ʼe mole heʼeki totonu lelei ai te ʼu meʼa ʼaē ʼe tala fakatomuʼa e te meteo.
Ko te tuʼakoi ʼo te mālama ʼa te tagata ʼo ʼuhiga mo te temi, ʼe ina fakamanatuʼi mai kia tatou te ʼu fehuʼi ʼaenī ʼaē neʼe fai e Sopo: “Ko ai koa ʼaē neʼe ina fānauʼi te ʼu toʼi hahau? Ko te fatu ʼo ai ʼaē ʼe haʼu mai ai te ʼaisi? . . . ʼE feala koa ke ke fakaaʼu tou leʼo ki te ʼao, ke ʼaofi ai koe e he toe vai ʼe tokakovi? . . . Ko ai koa ʼaē neʼe ina ʼai te poto ki te ʼu ʼao, peʼe ko ai koa ʼaē neʼe ina foaki te poto ki te meʼa ʼaē ʼe hoko ʼi te lagi? Ko ai koa ʼaē ʼe feala ʼaki te poto ke ina ʼui totonu mai pe ko ʼao e fia, peʼe ko ai koa ʼaē ʼe feala ke ina huaʼi te ʼu ipu ʼo te lagi?”—Sopo 38:28-37.
Koʼeni te tali ki te ʼu fehuʼi fuli ʼaia, ʼE mole ko te tagata kae ko Sehova ʼAtua. Tatau aipe pe koteā te poto ʼaē ʼe lagi maʼu e te tagata, kae ʼe lahi ʼaupito age te poto ʼo totatou Tupuʼaga. Neʼe ko he ʼofa moʼoni ʼaē neʼe ina fakahā mai kia tatou, ʼi tana faka fealagia ʼaē ke tou maʼu tona poto ʼi te Tohi-Tapu, ke fua manuʼia ai ki totatou maʼuli.—Tāʼaga Lea 5:1, 2.