Te Agamālohi​—Kua Vave Pulihi ʼo Talu Ai!

“Ko Te Agamālohi ʼe Fakatupu Tuʼutāmaki Ki te Fenua”​—The New York Times, Amelika.

“Te Agamālohi ʼi Te Loto Fale”​—O Globo, Pelesile.

“Te Agamālohi ʼe Hoko Tāfito Ki Te Hahaʼi Fafine”​—The Globe and Mail, Kanata.

ʼE HĀ ʼi te ʼu kupu tāfito ʼaia ʼo te ʼu sulunale ʼo Amelika ʼo te Potu Tokelau pea mo te Potu Toga, ʼe ʼi ai te tuʼutāmaki ʼe hoko ʼi te malamanei katoa. Ohage ko te meʼa ʼaē neʼe ʼui e te Kautahi Faka Malamanei Ki Te Maʼuli Mālōlō, “kua fakamataku te fakaʼāsili ʼa te ʼu faʼahiga agamālohi kehekehe ʼi te ʼu taʼu ʼaenī kua hili.”

Koutou vakaʼi te ʼu tānaki ʼaenī neʼe fai:

Te ʼu fai fakapō. ʼI Amelika Latina pea mo te ʼu Caraïbes, ʼe matehi te toko 1 250 ʼi te ʼaho fuli. Koia la ʼaē, “ ʼi te vaelua ʼo te ʼu fenua ʼo te potu ʼaia, ko te fai fakapō ʼe tuʼulaga lua ʼi te ʼu tupuʼaga ʼo te mate ʼa te hahaʼi tūpulaga ʼe taʼu 15 ki te 24.”

Te gaohi koviʼi ʼo te ʼu tamaliki. Ko te gaohi koviʼi, mo te fakaʼalikiʼi, pea mo te fakamatakuʼi ʼo te ʼu tamaliki ʼe ko he ʼu fihifihia ʼe hoko ʼi te malamanei katoa. Ohage la, “ ʼe hā mai ʼi te ʼu fakafehuʼi ʼaē neʼe fai ki te hahaʼi lalahi ʼo te ʼu fenua koloaʼia, ko te toko 10 ki te toko 15 kau tamaliki ʼi te teau, ʼe fakaʼalikiʼi nātou​—pea tāfito te ʼu kiʼi taʼahine.”

Te agamālohi ki te hahaʼi fafine. ʼI te ʼosi vakaʼi ʼo te ʼu maumau ʼaē neʼe fai ʼi te malamanei katoa ki te ʼu lao ʼo ʼuhiga mo te ʼāteaina ʼa te hahaʼi ʼi te taʼu 1997, neʼe fakahā ai e te hahaʼi fai kumi, “ko te agamālohi ʼi te loto fale neʼe ko te tupuʼaga tāfito ʼaia ʼo te lāvevea ʼa te hahaʼi fafine ʼi te teitei fenua fuli pe ʼo te malamanei.” (Human Rights Watch World Report 1998) Ko te agamālohi ʼi te loto fale ʼaē kua mafola ʼaupito kae mole faʼa lahi tona talanoaʼi, kua fakahigoa ko “te lakilisi fakalogologo ʼo te 20 sēkulō.”​—The Globe and Mail, Kanata.

ʼI te temi ʼo Noe, neʼe toe “fonu te kele ko te agamālohi.” (Senesi 6:​9-​12) Kae neʼe hāofaki e Sehova ʼAtua te tagata ʼaia “nee ina kalagai te susitisia” pea mo tona famili “i te temi nee ina fakahifo ai te tulivio o fakamou te malama o te hahai pagani.” ʼE toe fakahoko anai e te ʼAtua te faʼahi ʼaia ia ʼaho nei. ʼE ina hāofaki anai “te hahai agatonu” ʼi te temi ʼaē ka ina pulihi ai te hahaʼi agamālohi mo agakovi, pea ʼe ina fakaliliu anai te kele ʼaenī ko he palatiso ʼi te mālama foʼou ʼaē neʼe ina fakapapauʼi mai. (2 Petelo 2:​4-9; 3:​11-​13) ʼE mole koutou fiafia koa la ʼi takotou ʼiloʼi ʼaē kua vave pulihi te agamālohi ʼo talu ai?