Te Fakapalatahi Pea Mo Te Lotu

“ ʼI TAKU haʼu ki Amelika ʼi te taʼu 1978, neʼe ʼau manatu neʼe kua fualoa te fakatokatoka e te fenua ʼaia tana ʼu fihifihia ʼo ʼuhiga mo te ʼu lanu, pea mo fakatatau te ʼaluʼaga ʼa te kau ʼuli pea mo te hahaʼi ʼo te tahi ʼu lanu,” ko te ʼu palalau ʼaia neʼe fai ʼi te nusipepa Time e Mark Mathabane, ko te tagata faitohi neʼe tupu ʼi Afelika Saute. “ ʼE moʼoni, neʼe lahi te ʼu fetogi ʼaē neʼe hoko ʼo ʼuhiga mo te fakapalatahi. Neʼe hage kia ʼau, ko Amelika neʼe muʼa ʼi Afelika Saute ia taʼu e teau. Kae neʼe ʼau mataku ʼaupito ʼi taku sio ʼaē, neʼe mole fetogi moʼoni te loto ʼa te hahaʼi.” Koteā ʼaē neʼe tupu ai tana fai ia te ʼu palalau ʼaia?

ʼE ʼui fēnei e Mathabane, “ko te temi ʼaē ʼe hā tāfito ai te fai fakapalatahi ʼi Amelika, ʼe ko te ʼAhotapu ʼi te matahi.” Neʼe ina fakatokagaʼi, māʼia ʼi te ʼu loto ʼēkelesia, ʼe mole loto e te hahaʼi ke nātou kau fakatahi ki te misa mo te hahaʼi ʼo te tahi lanu. Koia neʼe ina fai te fehuʼi ʼaenī, “Koia, e feafeaʼi koa tanatou felogoi mo te hahaʼi ʼaia ʼi te tahi ʼu ʼaho ʼo te vāhaʼa?” ʼI tana fakaloto mālohiʼi te hahaʼi ke nātou fakamuʼamuʼa te akoʼi ʼo te fānau ke fetogi te ʼaluʼaga ʼaia, neʼe ʼui fēnei e Mathabane: “ ʼAki te ako, ʼe feala ke kita tali te manatu ʼaē, ʼe tatau te hahaʼi fuli.”

ʼE faka tui te kau Fakamoʼoni ʼa Sehova ki te ʼui ʼaē, ʼe feala ke fakatokatoka te ʼu fihifihia ʼaki te akoʼi ʼo te hahaʼi, kae ʼe nātou faka maʼuhigaʼi tāfito te ako ʼo te Folafola ʼa te ʼAtua. Ei, ʼe tokoni te Tohi-Tapu kia nātou ke nātou tauʼi te fakapalatahi ʼo te ʼu lanu​—māʼia ʼi te ʼu fenua ʼaē ʼe ʼāsili kovi ai te fakapalatahi. ʼI te vāhaʼa fuli ʼi tanatou ʼu Fale ʼo te Puleʼaga, ko te hahaʼi ʼo te ʼu lanu kehekehe ʼe nātou fakatahi ke akoʼi nātou ʼi te ʼu lao pea mo te ʼu pelesepeto ʼa te Folafola ʼa te ʼAtua, ia te Tohi-Tapu. ʼE mole fai he tae falā ʼi te ʼu fono ʼaia. ʼE fakaafe koutou ke koutou ʼōmai kiai!